စပါးပေါ်ချိန်တွင် ဈေးအလွန်အမင်းကျဆင်းမှုမှ ကာကွယ်တားဆီးနိုင်ရန် နိုင်ငံအများစုတွင်ဆောင်ရွက်သည့် ဈေးကျချိန်တွင်ရောင်းရန်မလိုဘဲ ဈေးတက်ချိန် စောင့်ရောင်းနိုင်သည့် သိုလှောင်ရုံကုန်အပ်လက်မှတ်ကို အခြေခံပြီး ချေးငွေထုတ်ပေးသည့်စနစ် (Warehouse Receipt Financing System)ကို စနစ်တကျ စတင်ဆောင်ရွက်နိုင်ရန် ပြင်ဆင်ဆောင်ရွက်ပေးရေးကို နိုင်ငံတော်အစိုးရထံ တင်ပြထားကြောင်း  မြန်မာနိုင်ငံ ဆန်စပါးအသင်းချုပ်မှ သိရသည်။

ပြည်ပသို့ ဆန်တင်ပို့ရာတွင် နိုင်ငံတကာ ပေါက်ဈေးမြင့်နေချိန်ကို အချိန်ကိုက်၍ ရောင်းနိုင်ခြင်းဖြင့် ပို့ကုန်ဝင်ငွေ ပိုမိုရရှိနိုင်သည့်အချက်ကို ဦးစားပေးဖော်ဆောင်ရန် လိုအပ်နေကြောင်း သိရသည်။

ထိုကဲ့သို့ အချိန်ကိုက် စောင့်ရောင်းနိုင်ရန်အတွက် သိုလှောင်ရုံများ လိုအပ်ခြင်းအပြင် ငွေကြေးဖြင့်တောင့်ခံထားနိုင်ရန်လည်း လိုအပ်ကြောင်း တင်ပြခဲ့သည်။

စပါးပေါ်ချိန် တောင်သူများထံ ငွေလုံးငွေရင်းများဖြင့် ဈေးကောင်းပေးဝယ်ယူနိုင်ရန်အတွက် ဆန်စက်ပိုင်များ၊ ဆန်ကုန်သည်နှင့် Exporter များအား ချေးငွေထုတ်ပေးနိုင်မည့်စနစ်တစ်ခု စဉ်းစားသုံးသပ်ပေးရန် အစိုးရထံအကြံပြုတင်ပြထားကြောင်း မြန်မာနိုင်ငံဆန်စပါးအသင်းချုပ်မှ သိရသည်။

“အိမ်နီးချင်းနိုင်ငံတစ်ခုကို ဆန်ရောင်းပါတယ် စုစုပေါင်းဆန်တန်ချိန်တစ်သိန်းပါ ဘယ်အချိန်မှာလည်းဆိုတော့ ကျွန်တော်တို့ စပါးသစ်ပေါ်တဲ့ သီတင်းကျွတ်ကာလပေါ့ သီတင်ကျွတ်ကာလဆိုတော့ တင်ပို့ဖို့စာချုပ် ချုပ်ပါတယ်။ အစိုးရချင်းဖြစ်တဲ့အခါမှာ G to G ဖြစ်တဲ့အတွက် LC နဲ့ ရောင်းရပါတယ်။ LC နဲ့ရောင်းတဲ့အခါကျတော့ ဒီဇင်ဘာလောက်မှ ငွေကြေးတွေ ဝင်လာပါတယ်။ စုစုပေါင်း ဒေါ်လာ ၄၄ သန်းဖိုးလောက်ရောင်းရပါတယ်။ ရောင်းတဲ့အခါမှာ လက်ထဲမှာ Exporter ၁၀ ခုလောက်ကနေ တင်ပို့ပါတယ်။ တင်ပို့တဲ့အခါမှာ ကျွန်တော်တို့ လက်ထဲမှာ စပါးတွေပေါ်လာတဲ့အချိန်မှာ လုံလုံလောက်လောက်ဝယ်ပေးဖို့ မလောက်ပါဘူး မလုံလောက်တဲ့အခါမှာ ပြည်တွင်းဘဏ်တစ်ခုကနေ ကျွန်တော်တို့ ရောင်းတဲ့ LC ကို  ဒီဇင်ဘာမှ ဝင်မယ်ငွေကို ၁၀ လပိုင်းမှာ TT ပေးပါဆိုတော့ ပြည်တွင်းဘဏ်တစ်ခုကနေ ၇၀ ရာခိုင်နှုန်း TT Financing ကြိုပေးပါတယ်။ ဒီလိုမျိုးကြိုပေးလိုက်တဲ့အခါ ဆန်ပိုင်တွေ စပါးကုန်သည်တွေ လယ်သမားတွေဆီ စပါးကို ဈေးကောင်းပေးပြီး ဝယ်နိုင်တယ်”  ဟု မြန်မာနိုင်ငံ ဆန်စက်လုပ်ငန်းရှင်များအသင်း အတွင်းရေးမှူး ဦးနေလင်းဇင်က ပြောကြားသည်။

နှစ်စဉ် ဆန်စပါးအခြေခံဈေးနှုန်းများ ထုတ်ပြန်ခြင်းကို မိုးစပါးအတွက် မတ်နှင့် ဧပြီတွင်လည်းကောင်း၊ နွေစပါးအတွက် နိုဝင်ဘာနှင့် ဒီဇင်ဘာလတို့တွင်လည်းကောင်း ထုတ်ပြန်ကြေညာပေးရန် နိုင်ငံတော်အစိုးရ ထံ တင်ပြထားကြောင်း မြန်မာနိုင်ငံဆန်စပါးအသင်းချုပ်မှ သိရသည်။

မြန်မာနိုင်ငံဆန်စပါးအသင်းချုပ်မှ ၂၀၁၈ ခုနှစ် အခြေခံရည်ညွှန်းစပါးဈေးနှုန်းအဖြစ် တင်း ၁၀၀ လျှင် ကျပ်ငါးသိန်းသတ်မှတ်လိုက်ပြီး စိုက်ပျိုးထုတ်လုပ်မှုရာသီအလိုက်ဖြစ်သင့်သည့် အခြေခံဈေးနှုန်းများ ထုတ်ပြန်ပေးသွားမည်ဖြစ်ကြောင်း သိရသည်။