ကိုရီးယားတွင် အလုပ်လုပ်ကိုင်နိုင်ရန် စာမေးပွဲဖြေဆိုခွင့် လျှောက်လွှာပုံစံ တင်သူများအား တွေ့ရစဉ်
တောင်ကိုးရီးယားနိုင်ငံ၏ ကုန်ထုတ်လုပ်ငန်း၊ ဆောက်လုပ်ရေးလုပ်ငန်း၊ စိုက်ပျိုးရေးနှင့် မွေးမြူရေးလုပ်ငန်း စသည်တို့တွင် သွားရောက် အလုပ်လုပ်ရန်အတွက် စာမေးပွဲဖြေဆိုခွင့် လျှောက်လွှာပုံစံ လာရောက် တင်သွင်းသူ သုံးသောင်းဝန်းကျင်ရှိပြီး မနှစ်က ထက်လျော့နည်းသွားကြောင်း မတ် ၁၆ ရက်က အလုပ်သမား ညွှန်ကြားရေးဦးစီးဌာနက စုံစမ်းသိရသည်။
တောင်ကိုရီးယားနိုင်ငံသို့ သွားရောက် အလုပ်လုပ်ကိုင် လိုသူများအတွက် စာမေးပွဲ ဖြေဆိုခွင့် လျှောက်လွှာများကို ကိုရီးယားဘာသာစကားသင် သင်တန်းကျောင်းများတွင် ကြိုတင်ပေးထုတ်ပေးထားပြီး မတ် ၁၂ ရက်မှ ၁၅ ရက်အထိ ရန်ကုန်တိုင်းဒေသကြီးနှင့် မန္တလေးတိုင်းဒေသကြီးတို့တွင် အခမဲ့ ထုတ်ပေးခဲ့သည်။ လျှောက်လွှာပြန်တင်ခြင်းကိုမူ မတ် ၁၂ ရက်မှ ၁၅ ရက်အထိ လေးရက်တည်းသာ လက်ခံခဲ့သည်။
ယင်းသို့လျှောက်လွှာ ထုတ်ပေးခြင်းနှင့် လျှောက်လွှာလက်ခံခြင်းကို ဆောင်ရွက်ရာတွင် မတ် ၁၂ ရက်မှ ၁၅ ရက်အတွင်း ရန်ကုန်တိုင်းဒေသကြီး မြောက်ဒဂုံမြို့နယ် ပင်လုံအလုပ်သမားသင်တန်းက ကျောင်းသို့ လျှောက်လွှာ လာရောက် ထုတ်ထားသူများနှင့် သင်တန်းကျောင်းများတွင် ကြိုတင်ထုတ်ထားပေးသူမှာ ၂၂၀၀၀ ကျော် အထိရှိပြီး လျှောက်လွှာပြန်တင်သူ ဦးရေမှာ၂၁၆၀၀ ကျော်ရှိကြောင်း သိရသည်။
“ရန်ကုန်မှာက ဘာသာစကားသင် သင်တန်းကျောင်းတွေကို ကြိုထုတ်ပေးတာနဲ့ မတ် ၁၂ ရက်က ၁၅ ရက်အထိ ထုတ်ပေးထားတာဆိုရင် စုစုပေါင်းလျှောက်လွှာ ၂၂၄၀၀ ကျော်လောက်ရှိတယ်။ ဖောင်ပြန် တင်တာကတော့ ၂၁၆၀၀ လောက်ရှိတယ်။ မနှစ်ကတော့ ရန်ကုန်တစ်ခုတည်းမှာ ထုတ်ပေးတုန်းက လျှောက်လွှာ လာတင်တာ ၃၃၀၀၀ လောက်ရှိတယ်” ဟု အလုပ်သမား ညွှန်ကြားရေး ဦးစီးဌာန ရန်ကုန်တိုင်းဒေသကြီးရုံးက တိုင်းဦးစီးမှူး ဦးကိုကိုလင်းက ပြောကြားသည်။
ရန်ကုန်နှင့် မန္တလေးတိုင်း နှစ်ခုပေါင်းတွင် ကိုရီးယားသို့ သွားရောက်ရန်အတွက် စာမေးပွဲဖြေဆိုခွင့် လျှောက်လွှာတင်သူ သုံးသောင်းဝန်းကျင် ခန့်ရှိကြောင်း သိရသည်။ ၂၀၁၇ ခုနှစ်တွင် လျှောက်လွှာ ၃၃၀၀၀ ကျော် လက်ခံရရှိခဲ့သည့်အတွက် ၂၀၁၇ ခုနှစ်နှင့် ယခုနှစ်နှင့် နှိုင်းယှဉ်ကြည့်ပါက လျှောက်လွှာတင်သူဦးရေ နှစ်ထောင်ဝန်းကျင် လျော့နည်းသွားကြောင်း သိရသည်။
“မနှစ်ကထက်တော့နည်းတယ်။ ရန်ကုန် မန္တလေး နှစ်ခုပေါင်းဆိုရင် လျှောက်လွှာလာတင်သူ သုံးသောင်းဝန်းကျင် လောက်ပဲရှိတယ်။ မန္တလေးမှာတော့ လျှောက်လွှာလာတင်သူ ၉၀၀၀ ကျော်လောက်ရှိတယ်” ဟု အစိုးရ ပြည်ပအလုပ်အကိုင် အေဂျင်စီ လက်ထောက်ညွန်ကြားရေးမှူး ဒေါ်အေးအေးသော်က ပြောကြားသည်။
၂၀၁၈ ခုနှစ်တွင် တောင်ကိုးရီးယားနိုင်ငံသို့ သွားရောက် အလုပ်လုပ်ရန်အတွက် စာမေးပွဲဖြေဆိုသူများကို အောင်ချက်ရာခိုင်နှုန်းအား လူဦးရေ တစ်သောင်းအထိတိုး မြှင့်ထားသော်လည်း တောင်ကိုရီးယားသို့ လူဦးရေ မည်မျှခေါ်ယူမည်ကို အတိအကျ ထုတ်ပြန်ခြင်း မရှိသေးပေ။
“ဒီနှစ်ကို အောင်မြင်မှုရာခိုင်နှုန်း တစ်သောင်းပေးမယ်လို့သာ သိရပေမယ့် လုပ်သားဘယ်လောက် ခေါ်မယ်ဆိုတာ မသိရသေးဘူး။ စာမေးပွဲအောင်တိုင်းလည်း သွားရမှာ မဟုတ်ဘူး” ဟု ဦးကိုကိုလင်းက ပြောကြားသည်။
တောင်ကိုရီးယားနိုင်ငံသို့ မြန်မာလုပ်သားများကို အစိုးရချင်း သဘောတူညီမှုဖြင့် ၂၀၁၁ ခုနှစ်ကတည်းက စေလွှတ်ခဲ့ရာ ၂၀၁၇ ခုနှစ်အထိ လုပ်သားသုံးသောင်းကျော် တရားဝင် စေလွှတ်နိုင်ခဲ့ကြောင်း အလုပ်သမား ညွန်ကြားမှု ဦးစီးဌာနမှ သိရသည်။
