အိပ်ချ်အိုင်ဗွီ အေအိုင်ဒီအက်စ်ရောဂါ အသိပညာပေးအစီအစဉ်တွင် ပြသထားသည့် အထောက်အကူပြုပစ္စည်းများအား တွေ့ရစဉ်

မြန်မာနိုင်ငံအတွင်း အိပ်ချ်အိုင်ဗွီ/ အေအိုင်ဒီအက်စ် ကာကွယ်ကုသရေးလုပ်ငန်းများ ပိုမိုလွှမ်းခြုံမှုပေးနိုင်ရန် ရည်ရွယ်၍ USAID က ‘USAID HIV/AIDS Flagship (UHF)’ စီမံချက်ကို နှစ်နှစ်ကြာ လုပ်ဆောင်မည်ဖြစ်ကြောင်း သိရသည်။

UHF စီမံချက်သည် မြန်မာနိုင်ငံတွင် အေအိုင်ဒီအက်စ်ကင်းဝေးစေရန် ဆောင်ရွက်နေသော နိုင်ငံ၏ ကြိုးပမ်းလုပ်ဆောင်ချက်များကို ထောက်ပံ့ပေးသည့် အစီအစဉ်ဖြစ်ပြီး စီမံကိန်းကာလမှာ နှစ်နှစ်ကြာမည်ဖြစ်ကြောင်း၊ အဆိုပါစီမံကိန်းသည် လက်ရှိ ကျန်းမာရေးနှင့်အားကစားဝန်ကြီးဌာန၊ ကမ္ဘာ့ရန်ပုံငွေအဖွဲ့နှင့် အခြားသောမိတ်ဖက်အဖွဲ့အစည်းများမှ အတူတကွ လက်တွဲဆောင်ရွက်နေသည့် အိပ်ချ်အိုင်ဗွီပိုး စစ်ဆေးပေးခြင်း၊ အေအာဗွီဆေးဝါးများဖြင့် ကုသပေးခြင်း စသည့်လုပ်ငန်းများ ပိုမိုလွှမ်းခြုံလာနိုင်စေရန်နှင့် အရည်အသွေး ပိုမိုမြင့်မားလာစေရန် ကူညီဆောင်ရွက်သွားမည်ဖြစ်ကြောင်းနှင့် USAID -U.S President's Emergency Plan for AIDS Relief (PEPFAR) ၏ ရန်ပုံငွေအထောက်အပံ့ဖြင့် အိပ်ချ်အိုင်ဗွီ အေအိုင်ဒီအက်စ် ကာကွယ်ကုသရေးလုပ်ငန်းများ ပိုမိုလွှမ်းခြုံမှုပေးနိုင်စေရန် ရည်ရွယ်သည့် UHF စီမံချက်အား UNAIDS မှတစ်ဆင့် ကြီးကြပ်ဆောင်ရွက်သွားမည်ဖြစ်ပြီး CPI အပြည်ပြည်ဆိုင်ရာ လူထုမိတ်ဖက်အဖွဲ့အစည်းမှ အခြားသော မိတ်ဖက်အဖွဲ့အစည်းများနှင့်အတူ အကောင်အထည်ဖော်မည်ဖြစ်သည်။

ယင်းစီမံချက်သည် အိပ်ချ်အိုင်ဗွီ/ အေအိုင်ဒီအက်စ်နှင့်ပတ်သက်၍ မြန်မာနိုင်ငံ၏ အမျိုးသားမဟာဗျူဟာစီမံကိန်း (၂၀၁၆-၂၀၂၀) ၏ ရည်မှန်းချက်များနှင့်အညီ ဆောင်ရွက်လျက်ရှိကြောင်းနှင့် စီမံချက်လုပ်ငန်းများ ဆောင်ရွက်ရာတွင် အမျိုးသားခုခံကျ ကာလသားရောဂါ တိုက်ဖျက်ရေးစီမံချက်၏ လမ်းညွှန်ချက်ဖြင့် CPI နှင့်အတူ အခြားမိတ်ဖက်အဖွဲ့အစည်းများနှင့် အတူတကွ ပူးပေါင်းဆောင်ရွက်သွားမည်ဖြစ်ကြောင်း သိရသည်။

၂၀၁၇ ခုနှစ် ဇူလိုင်အတွင်းက UNAIDS ၏ထုတ်ပြန်ချက်အရ မြန်မာနိုင်ငံတွင် ပြီးခဲ့သည့် ခြောက်နှစ်အတွင်း အိပ်ချ်အိုင်ဗွီကြောင့် သေဆုံးနှုန်း ၅၂ ရာခိုင်နှုန်း (ထက်ဝက်ကျော်) ကျဆင်းသွားကြောင်း၊ သေဆုံးမှုနှုန်းများကျဆင်းရခြင်း အဓိကအကြောင်းရင်းမှာ ပြီးခဲ့သည့်နှစ်များအတွင်းက အိပ်ချ်အိုင်ဗွီကုသမှုများ သိသိသာသာတိုးမြှင့်ခဲ့ပြီး အဆိုပါကုသမှုများကို အစိုးရဌာနများနှင့်အတူ လူမှုအဖွဲ့အစည်းများ၊ ပုဂ္ဂလိကအဖွဲ့အစည်းများ၏ ပူးပေါင်းကာ ကူညီဆောင်ရွက်ပေးခဲ့ခြင်းဖြစ်ကြောင်းနှင့် အစိုးရက ကျန်းမာရေးအသုံးစရိတ်များ နှစ်အလိုက် တိုးမြင့်လာမှုများကြောင့် ကုသရေးအပိုင်းတိုးမြှင့်ခြင်း၊ ဆေးဝါးထောက်ပံ့မှုအပိုင်း တိုးမြှင့်ခြင်းများ ပါဝင်ကြောင်း သိရသည်။

ခန့်မှန်းတွက်ချက်မှုများအရ ၂၀၁၆ ခုနှစ်အတွင်း မြန်မာနိုင်ငံတွင် အိပ်ချ်အိုင်ဗွီပိုး ကူးစက်ခံရသူအသစ်ပေါင်း ၁၁၁၄၉ ရှိပြီး နေ့စဉ်လူဦးရေ ၃၀ ခန့်ရောဂါကူးစက်ခံနေရကြောင်း၊ ၎င်းတို့အနက် ဦးတည်အုပ်စုများဖြစ်သည့် မူးယစ်ဆေးအကြောထဲ ထိုးသွင်းသူများတွင် ၂၉ ရာခိုင်နှုန်း၊ အမျိုးသမီးလိင်လုပ်သားများတွင် ခုနစ်ရာခိုင်နှုန်း၊ အမျိုးသားချင်း လိင်တူဆက်ဆံသူများတွင် ၁၃ ရာခိုင်နှုန်းနှင့် လိင်လုပ်သားများ၏ အမျိုးသားလိင်ဆက်ဆံဖော်များတွင် ၂၃ ရာခိုင်နှုန်းထိရှိနေပြီး ရောဂါပိုး ကူးစက်ခံရသူအသစ် စုစုပေါင်း၏ ရာခိုင်နှုန်း ၇၀ ကျော်အထိရှိနေကြောင်း ကျန်းမာရေးနှင့် အားကစားဝန်ကြီးဌာနက ၂၀၁၆ ခုနှစ်အတွင်းက ထုတ်ပြန်ကြေညာခဲ့သည်။

၂၀၃၀ ပြည့်နှစ်တွင် အိပ်ချ်အိုင်ဗွီရောဂါဖြစ်ပွားမှုကို ပြည်သူ့ကျန်းမာရေးကို ခြိမ်းခြောက်နေသော ကပ်ရောဂါအဖြစ်မှ အဆုံးသတ်ရန် ရည်ရွယ်ထားကြောင်း အဆိုပါဝန်ကြီးဌာနမှ သိရသည်။