ဆေးဝါးစက်ရုံ (အင်းစိန်) မှ မြွေဆိပ်ဖြေဆေးရရှိရန် ပြုလုပ်ပုံကို ဝန်ထမ်းများက ပြသနေစဉ်
ဆေးဝါးစက်ရုံ (အင်းစိန်) မှ ထုတ်လုပ်သော မြွေဆိပ်ဖြေဆေးများကို ကမ္ဘောဒီးယားနိုင်ငံသို့ ပထမအသုတ်အဖြစ် တင်ပို့ရောင်းချထားကြောင်း ပြန်ကြားရေးဝန်ကြီးဌာန၏ ထုတ်ပြန်ချက်အရ သိရသည်။
စက်မှုဝန်ကြီးဌာန ပြည်ထောင်စုဝန်ကြီး ဦးခင်မောင်ချိုသည် မြန်မာ့ဆေးဝါးလုပ်ငန်း ဦးဆောင်ညွှန်ကြားရေးမှူး ဦးကိုကိုအောင်နှင့် တာဝန်ရှိသူများနှင့်အတူ ဇန်နဝါရီ မွန်းလွဲပိုင်းက ရန်ကုန်မြို့ အင်းစိန်မြို့နယ် ကြို့ကုန်းရှိ ဆေးဝါးစက်ရုံ (အင်းစိန်) သို့ သွားရောက်ပြီး ဆေးပြား၊ ဆေးတောင့်ထုတ်လုပ်နေမှု ပဋိဇီဝဆေးများ ထုတ်လုပ်နေမှုကို ကြည့်ရှုစစ်ဆေးခဲ့ကြောင်း သိရသည်။
ပြည်ထောင်စုဝန်ကြီးက မြန်မာ့ဆေးဝါးလုပ်ငန်းက ထုတ်လုပ်သည့် BPI ဆေးဝါးများအား ပြည်သူလူထုမှ ယုံကြည်စွာ အားပေးလျက်ရှိသည့်အတွက် အရည်အသွေး ဆက်လက်ထိန်းသိမ်း၍ GMP Guide Line နှင့်အညီ ထုတ်လုပ်ကြရန်၊ ဈေးကွက်လိုအပ်ချက်ရှိသော ဆေးဝါးများကို တိုးမြှင့်ထုတ်လုပ်သွားရန် ဈေးကွက်အတွင်း BPI ဆေးဝါးများ ပြတ်လပ်မှုမရှိစေရေး စီမံဆောင်ရွက်သွားရန် နိုင်ငံတကာအဆင့်မီ ခေတ်မီစက်များအား စနစ်တကျ ကိုင်တွယ်နိုင်ရေးနှင့် စက်စွမ်းအား ပြည့်လည်ပတ်နိုင်ရေး စီမံဆောင်ရွက်သွားရန် တာဝန်ရှိသူများကို မှာကြားခဲ့သည်။
ဆေးဝါးစက်ရုံ အင်းစိန်အနေဖြင့် BPI ဆေးဝါးများကို GMP Guide Line နှင့်ညီစေရန်အတွက် ခေတ်မီဆေးဝါးထုတ်လုပ်မှု အဆောက်အအုံများ တည်ထောင်ပြီး လျာထားချက်ထက် ဆေးဝါးစက်ရုံ အင်းစိန်မှ တိုးမြှင့် ထုတ်လုပ်လျက်ရှိသည်။ BPI အမှတ်တံဆိပ်ဖြင့် ဆေးဝါးများကို ၂၀၁၇-၂၀၁၈ ဘဏ္ဍာနှစ်တွင် တန်ဖိုးကျပ် ၅၀ ဘီလျံ ထုတ်လုပ်နိုင်ရေး ဆောင်ရွက်လျက်ရှိပြီး ကျန်းမာရေးနှင့် အားကစားဝန်ကြီးဌာန၊ ကာကွယ်ရေးဝန်ကြီးဌာန၊ အလုပ်သမား လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနနှင့် အရောင်းကိုယ်စားလှယ်များထံသို့ ရောင်းချဖြန့်ဖြူးပေးလျက်ရှိပြီး အများပြည်သူများ လွယ်ကူစွာ ဝယ်ယူနိုင်ရန် City Mart၊ Orange၊ Capitalpaom Supermarket များ၊ စုစုပေါင်း ၂၃ ဆိုင်တွင် ရောင်းချပေးလျက်ရှိသည့်အပြင် ရန်ကုန်၊ မန္တလေး၊ နေပြည်တော်စသော မြို့ကြီးများနှင့် တိုင်းဒေသကြီးနှင့် ပြည်နယ်များရှိ မြို့ကြီးများတွင်လည်း ဆေးဝါးအရောင်းဆိုင်များ ဖွင့်လှစ်ရောင်းချပေးလျက်ရှိကြောင်း သိရသည်။
၎င်းအပြင် BPI ဆေးဝါးများအား အတုအပ မပြုလုပ်နိုင်ရန် ထုပ်ပိုးမှုဆိုင်ရာများကို အဆင့်မြှင့်တင် ဆောင်ရွက်လျက်ရှိပြီး နိုင်ငံတကာ အဆင့်မီ ထုပ်ပိုးမှုပုံစံဖြစ်ရေး ပြည်တွင်းပြည်ပလုပ်ငန်းရှင်များအား (EOI) ဖိတ်ခေါ်၍ ပြုပြင်ဆောင်ရွက်လျက်ရှိကြောင်း၊ ဆေးဝါးစက်ရုံ (အင်းစိန်) မှထုတ်လုပ်သော မြွေဆိပ်ဖြေဆေးများကို ဒေသတွင်း နိုင်ငံများသို့ တင်ပို့ရောင်းချရန် စီစဉ် ဆောင်ရွက်လျက်ရှိပြီး လက်ရှိတွင် ကမ္ဘောဒီးယားနိုင်ငံသို့ ပထမအသုတ်အဖြစ် တင်ပို့ရောင်းချထားပြီး ဖြစ်သည်။
