သြဂုတ် ၂၄ ရက်တွင် အီကွေဒေါနှင့်နယ်စပ် ပီရူးမြောက်ပိုင်းရှိ နှစ်နိုင်ငံနယ်စပ်စောင့်ကြည့်စင်တာ၌ ဗင်နီဇွဲလားနိုင်ငံသားများက တန်းစီနေကြစဉ် (Photo: AFP)

အီကွေဒေါသည် သြဂုတ် ၂၄ ရက်တွင် လူသားချင်းစာနာကူညီမှုလမ်းကြောင်းအား  ဖွင့်လှစ်ပေးခဲ့ပြီး စီးပွားရေးကျဆင်းနေသည့် ဗင်နီဇွဲလားမှ ထွက်ပြေးလာသည့် ဧရာမ ရွှေ့ ပြောင်းအခြေချများအား နိုင်ငံသို့ ဝင်ခွင့် ကန့်သတ်မှုများကို ရုပ်သိမ်းပေးခဲ့သည်။

လတ်တလောတွင် ပီရူးနယ်စပ်သို့ သွားရောက်ရန် ရွှေ့ပြောင်းအခြေချများ လိုက်ပါလာသည့် ဘတ်စ်ကား ၃၅ စီးသည် စောင့်ဆိုင်းနေကြောင်း အီကွေဒေါပြည်ထဲရေး ဝန်ကြီး မာအူရိုတိုစကန်နီနီကပြောကြားခဲ့သည်။ ပီရူး၊ ချီလီနှင့် ယင်းမှကျော်လွန်သော အခြားနိုင်ငံများတွင် အလုပ်အကိုင် အခွင့်အလမ်းများ ရှာဖွေနိုင်ရန်နှင့် ဆွေမျိုးများနှင့် ဆုံစည်းနိုင်ရန် ဗင်နီဇွဲလားထောင်ပေါင်းများစွာက ဖြတ်သန်းသွားလာနေသော အီကွေဒေါက ၎င်းတို့ တတ်နိုင်သမျှ ကူညီပေးသွားမည်ဖြစ်ကြောင်း ပြည်ထဲရေးဝန်ကြီးက ပြောကြားခဲ့သည်။

ပီရူးသည် ဒေသတွင်း၌ စီးပွားရေး တိုးတက်မှု အမြန်ဆုံး နိုင်ငံတစ်နိုင်ငံဖြစ်ပြီး လာမည့်နှစ်တွင် ၄ ဒသမ ၇ ရာခိုင်နှုန်း တိုးတက်မည်ဟု ခန့်မှန်းထားသည်။ ဗင်နီဇွဲလား နိုင်ငံသားများသည် ၎င်းတို့၏ နိုင်ငံသား သက် သေခံကတ်များကို စွန့်လွှတ်၍ နိုင်ငံကူးလက်မှတ်ထုတ်ယူရန် နောက်ဆုံးအချိန် သတ်မှတ်ထားသည့် ညသန်းခေါင်ကို ကျော်လွန်ပြီးနောက် ပီရူးနယ်စပ်သို့ ဖြတ်သန်းနိုင်ရန် ကြိုးပမ်းခဲ့ကြသည်။ သို့သော် ၎င်းတို့သည် ကိုလံဘီယာမှတစ်ဆင့် အီကွေဒေါသို့ ဝင်ရောက်ရန် နိုင်ငံကူးလက်မှတ် မလိုအပ်တော့ပေ။

ယခု တစ်နှစ်တည်းတွင် လူသန်းဝက်ခန့် ထွက်ပြေးလာခဲ့ကြသည့် အီကွေဒေါသည် ဗင်နီဇွဲလားနိုင်ငံသားများအား နိုင်ငံကူး လက်မှတ်ထုတ်ယူရန်အတွက် သီတင်းပတ်နှင့်ချီ အချိန်ယူရမှုကို ဖယ်ရှားပေးခဲ့ပြီး  ရွှေ့ပြောင်းအခြေချအကျပ်အတည်းအား လျော့စေရန် လုပ်ဆောင်ခဲ့သည်။ ယင်းအတွက်ကြောင့် ပီရူးကလည်းယင်းနှင့်အလားတူသော အရေးယူဆောင်ရွက်မှုများကို ထုတ်ပြန်ခဲ့ရသည်။

ဗင်နီဇွဲလား ရွှေ့ပြောင်းအခြေချ ပြဿနာအား ဒေသတွင်း၌ ပူးပေါင်းဆောင်ရွက်ရန်အတွက် ကုလသမဂ္ဂအထူးအဖွဲ့တစ်ဖွဲ့ကို အတွင်းရေးမှူးချုပ် အန်တိုနီယိုဂူတာရက်စ်က ဖွဲ့စည်းသွားမည်ဟု ၎င်း၏ ပြောခွင့်ရ ပုဂ္ဂိုလ်က သြဂုတ် ၂၄ ရက်တွင် ပြောကြားခဲ့သည်။

ဒေသဆိုင်ရာအစိုးရများက လက်တင်အမေရိကသမိုင်းတွင် အကြီးမားဆုံး အစုလိုက်အပြုံလိုက် နိုင်ငံမှထွက်ခွာမှု အကျပ်အတည်းကို ဖြေရှင်းနိုင်ရန် ရုန်းကန်နေရသည်။ ပြည်ပတွင် နေထိုင်နေသည့် ဗင်နီဇွဲလား ၂ ဒသမ ၃ သန်းအနက် ၁ ဒသမ ၆ သန်းကျော်သည် နိုင်ငံထဲ၌ စီးပွားရေးနှင့် နိုင်ငံရေးအကျပ်အတည်း နက်ရှိုင်းပြီး စားသောက်ကုန်၊ ဆေးဝါးနှင့် အခြားအခြေခံ လိုအပ်ချက်များ ရှားပါးခဲ့သည့် ၂၀၁၅ ခုနှစ် နောက်ပိုင်း ထွက်ပြေးလာကြသူများဖြစ်သည်။ ထို အကျပ်အတည်းကို ဆွေးနွေးရန် အာဂျင်တီးနား၊ ဘရာဇီး၊ ကိုလံဘီယာ၊ ပီရူး၊ ဥရုဂွေး၊ မက္ကဆီကို၊ ဗင်နီဇွဲလား အပါအဝင် နိုင်ငံ ၁၃ နိုင်ငံပါသည့် ထိပ်သီးကို အီကွေဒေါက လာမည့်လတွင် ကျင်းပမည်ဖြစ်သည်။