ကိတ်တောင်းမှ ၂၅ ကီလိုမီတာအကွာရှိ စိန့်ဂျိမ်းမြို့တွင် ဘုံပိုင်ရေကိုယူရန် စောင့်နေကြသူများအား ဇန်နဝါရီ ၁၉ ရက်က ရိုက်ကူးထားသောဓာတ်ပုံ (Photo: AFP)

နိုင်ငံ၏နေရာတစ်စိတ်တစ်ပိုင်းအား ရိုက်ခတ်နေပြီး သောက်သုံးရေမရရှိဘဲ ကိတ်တောင်းတွင် နေအိမ်များမှစွန့်ခွာစေရန် ခြိမ်းခြောက်နေသည့် မိုးခေါင်မှုများကြောင့် နိုင်ငံလုံးဆိုင်ရာ သဘာဝဘေးကျရောက်နေကြောင်း တောင်အာဖရိကအစိုးရက ဖေဖော်ဝါရီ ၁၃ ရက်တွင် ကြေညာခဲ့သည်။ ယင်းမိုးခေါင်မှု၏ ပမာဏနှင့် ပြင်းထန်မှုတို့အား ပြန်လည်သုံးသပ်ခဲ့ပြီးနောက် နိုင်ငံလုံးဆိုင်ရာ သဘာဝဘေးအထိ သတ်မှတ်ရန် တိုးမြှင့်ခဲ့ခြင်းဖြစ်ကြောင်း အစိုးရက ထုတ်ပြန်ခဲ့သည်။

ဆောင်းရာသီကာလ နေရာကျဲကျဲ မိုးရွာသွန်းမှုများက သက်သာရာမရစေခဲ့ဘဲ ဆည်များရှိ ရေမျက်နှာပြင်သည် အန္တရာယ်ကြီးလောက်သည်အထိ ကျဆင်းနေခဲ့ချိန်တွင် ကိတ်တောင်းသည် သုံးနှစ်ကြာမြင့်လာပြီဖြစ်သော မိုးခေါင်မှုအား ခံစားနေရသည်။ ပြီးခဲ့သောသီတင်းပတ်ကုန်တွင် မိုးရွာသွန်းမှုများကြောင့် အခြေအနေများတိုးတက်လာမည်ဟု မျှော်လင့်ချက်မြင့်တက်ခဲ့သော်လည်း ယင်းရွာသွန်းမှုပမာဏသည် မများပြားခဲ့သလို မိုးခေါင်မှုအခြေအနေအား သက်ရောက်စေနိုင်သည်အထိ မဖြစ်ခဲ့ပေ။

အစိုးရပြန်တမ်းတွင် ဖော်ပြခဲ့သောကြေညာချက်အရ အစိုးရသည် အဆိုပါမိုးခေါင်မှုပြဿနာအား ဖြေရှင်းရန်နှင့် သက်သာရာရစေရန်အတွက် ဆောင်ရွက်ပေးရန် တာဝန်ရှိကြောင်း ဖော်ပြခဲ့သည်။

တောင်အာဖရိက၏ ဒုတိယအကြီးဆုံးမြို့ဖြစ်သော ကိတ်တောင်းတွင် ကျန်ရှိနေသောရေများကို ထိန်းသိမ်းထားနိုင်ရန် Day Zero ဟုခေါ်သည့် ရေဘုံပိုင်ခေါင်းများအား ပိတ်ပစ်ရမည့်အလားအလာများကို ရင်ဆိုင်နေရသည်။ ကိတ်တောင်းဒေသခံအများစုသည် ရဲ သို့မဟုတ် စစ်သားတို့ စောင့်ကြပ်နေသော ရေသယ်ရန် နေရာ ၂၀၀ ခန့်၌ တန်းစီစောင့်ဆိုင်းရမည်ဖြစ်ပြီး ယခုသုံးစွဲခွင့်ပြုထားမှု၏ ထက်ဝက်ပမာဏဖြစ်သော နေ့စဉ်ခွဲတမ်း ၂၅ လီတာ (၆ ဒသမ ၆ ဂါလံ) ကိုသာ ရရှိတော့မည်ဖြစ်သည်။

ဖေဖော်ဝါရီအစောပိုင်းတွင် ယင်းဒေသခံများ၏ နေ့စဉ်ရေသုံးစွဲမှုပမာဏကို ၈၇ လီတာမှ လီတာ ၅၀ သို့လျှော့ချခဲ့သည်။

သန့်စင်ခန်းတွင် ရေတစ်ခါဆွဲချလျှင်ပင် ကိုးလီတာသုံးစွဲရမည်ဖြစ်သည်။ နေ့စဉ်ရေသုံးစွဲမှုပမာဏ လျှော့ချမှုများက အဖြေရှာနိုင်ရန် အချိန်ရနိုင်မည်ဖြစ်ပြီး သို့မဟုတ် ဆောင်းရာသီ၌ မိုးရွာသွန်းမှုများက ဆည်များရေပြန်ပြည့်ရန် မျှော်လင့်နိုင်ကြောင်း သိရသည်။ ရေသုံးစွဲမှုအားလုံး၏ ရာခိုင်နှုန်း ၇၀ ဖြစ်သော နေအိမ်သုံးစွဲမှုများတွင် လျှော့ချမှုအား စက်မှုလုပ်ငန်းသုံးစွဲမှုများ၌ လျှော့ချမှုထက် ဦးစားပေးလုပ်ဆောင်နေသည်။

မိုးခေါင်မှုများသည် တောင်အာဖရိက၏တောင်ပိုင်းနှင့် အနောက်ပိုင်းရှိ နေရာအများအပြား၌ ကျယ်ကျယ်ပြန့်ပြန့်ခံစားနေရပြီး ကိတ်တောင်း၌ နှစ်ပေါင်း ၁၀၀ အတွင်း အဆိုးရွားဆုံးမိုးခေါင်မှုကို ရင်ဆိုင်နေရသည်။ Mother City ဟုခေါ်သည့် ကိတ်တောင်းတည်ရှိသော ယင်းဒေသသည် ဇွန်မှသြဂုတ်အထိ ရှည်ကြာသော ကမ္ဘာ့တောင်ဘက်ခြမ်း ဆောင်းရာသီတွင် ရာသီအလိုက် မိုးရွာသွန်းမှုများမှ သောက်သုံးရေများ ရရှိနေသည်။