၂၀၁၇ ခုနှစ် နိုဝင်ဘာ ၁၅ ရက်က ဘင်္ဂလားဒေ့ရှ်နိုင်ငံရှိ ဘင်္ဂါလီဒုက္ခသည်စခန်းအား ရိုက်ကူးထားသောဓာတ်ပုံ (Photo: AFP)

မြန်မာနှင့် ဘင်္ဂလားဒေ့ရှ်နိုင်ငံတို့သည် မြန်မာတပ်မတော်၏ စစ်ဆင်ရေးတစ်ရပ်ကြောင့် ထွက်ပြေးသွားခဲ့ကြသည့် ဘင်္ဂါလီမွတ်စလင် ဒုက္ခသည်များကို နှစ်နှစ်အတွင်း ပြန်လည်လက်ခံမှုပြီးစီးရန် သဘောတူထားသည်ဟု ဘင်္ဂလားဒေ့ရှ်အစိုးရက ဇန်နဝါရီ ၁၆ ရက်တွင် ပြောကြားခဲ့သည်။ သိန်းနှင့်ချီသောဒုက္ခသည်များကို ပြန်လည်လက်ခံရေးအတွက် ပထမဆုံးအကြိမ်အဖြစ် ရှင်းလင်းသော အချိန်မူဘောင်တစ်ရပ်ကို ဖော်ထုတ်ပြလိုက်ခြင်းလည်းဖြစ်သည်။

သဘောတူညီချက်တွင် လုပ်ငန်းစဉ်ကို စတင်လုပ်ဆောင်ချိန်မှစ၍ နှစ်နှစ်အတွင်း အဆုံးသတ်ရန်လိုလားကြောင်း ပါရှိသည်ဟု မြန်မာနိုင်ငံ၏မြို့တော် နေပြည်တော်တွင် ဆွေးနွေးမှုများပြုလုပ်ပြီးနောက် ဘင်္ဂလားဒေ့ရှ်အစိုးရက ထုတ်ပြန်သည့် ကြေညာချက်၌ ဖော်ပြထားသည်။

ရခိုင်ပြည်နယ်မြောက်ပိုင်းတွင် နိုင်ငံမဲ့မွတ်စလင်လူနည်းစုမှ အကြမ်းဖက်သမားများက နယ်ခြားစောင့်စခန်းများကို တိုက်ခိုက်ခဲ့သည့် ၂၀၁၆ ခုနှစ် အောက်တိုဘာလကတည်းက အဓိကအကြမ်းဖက်မှုနှစ်ကြိမ် ဖြစ်ပွားခဲ့သည့် မြန်မာနိုင်ငံမှနေ၍ ထွက်ပြေးလာသော ဘင်္ဂါလီမွတ်စလင်ဒုက္ခသည်များနှင့် ပတ်သက်၍ ယခုသဘောတူညီချက်ကို ပြုလုပ်ထားခြင်းဖြစ်သည်။

အထက်ဖော်ပြပါ နေ့စွဲမတိုင်မီက ဘင်္ဂလားဒေ့ရှ်တွင် နေထိုင်နေပြီး ကုလသမဂ္ဂက ၂၀၀,၀၀၀ ခန့်ရှိမည်ဟု ခန့်မှန်းထားသည့် ဘင်္ဂါလီမွတ်စလင်ဒုက္ခသည်များနှင့် ယခုသဘောတူညီချက်က သက်ဆိုင်ခြင်းမရှိဟုဆိုသည်။

“ဒီနှစ်ရက်ကြာ ဆွေးနွေးမှုအတွင်း မြန်မာနိုင်ငံကို ပြန်လာနိုင်တဲ့ဒုက္ခသည်တွေ ဖြည့်စွက်ဖို့ လျှောက်လွှာပုံစံနဲ့ပတ်သက်ပြီး ကျွန်တော်တို့ သဘောတူခဲ့ကြပါတယ်” ဟု မြန်မာနိုင်ငံဆိုင်ရာ ဘင်္ဂလားဒေ့ရှ်သံအမတ်ကြီး မိုဟာမက်ဆူဖီယာရာမန်က ပြောကြားခဲ့သည်။

“လာမယ့်ရက်တွေအတွင်း လုပ်ငန်းစဉ်ကို ကျွန်တော်တို့စတင်နိုင်ပါလိမ့်မယ်” ဟု ၎င်းကပြောကြားခဲ့သော်လည်း ဒုက္ခသည်များကို ပြန်လည်လက်ခံရေးစတင်ရန် မြန်မာနိုင်ငံက ဖော်ပြသည့် လာမည့်သီတင်းပတ်အတွင်း နေ့ရက်သတ်မှတ်ချက်မှာမူ ဖြစ်နိုင်ဖွယ်မရှိဟုဆိုသည်။

ဇန်နဝါရီ ၂၃ ရက်မှစ၍ ဒုက္ခသည်များ ပြန်လည်လက်ခံရေးကို လမ်းဖွင့်ပေးရန်အတွက် နိုဝင်ဘာလအတွင်းက မြန်မာနှင့် ဘင်္ဂလားဒေ့ရှ် နှစ်နိုင်ငံသည် သဘောတူညီချက်တစ်ရပ်ကို လက်မှတ်ရေးထိုးခဲ့ကြသည်။ သို့သော် နယ်ခြားကို ဖြတ်ကျော်ဆောင်ရွက်ရမည့် လုပ်ငန်းစဉ်နှင့်ပတ်သက်၍ ထောက်ပံ့ပို့ဆောင်ရေးဆိုင်ရာ စိန်ခေါ်မှုများရှိနေသောကြောင့် ဇန်နဝါရီ ၂၃ ရက်ဟူသည့် သတ်မှတ်ချက်မှာ ပျက်ပြားဖွယ်ရှိနေသည်။