၂၀၁၆ ခုနှစ် စက်တင်ဘာ ၃ ရက်က အာသံပြည်နယ်မြောက်-အရှေ့ပိုင်းရှိ ဗြဟ္မပုတြမြစ်ထဲတွင် ကင်းလှည့်နေသော အိန္ဒိယလုံခြုံရေး တပ်ဖွဲ့ဝင်များ (Photo: AFP)

မြန်မာနိုင်ငံမှ ထွက်ပြေးလာသည့် ဘင်္ဂါလီ မွတ်စလင်များ ဝင်ရောက်ရန် ကြိုးပမ်းမှုများကို တားဆီးရေးအတွက် အထူးသတိရှိကြရန် အိန္ဒိယ အစိုးရက နှိုးဆော်လျက် ဘင်္ဂလားဒေ့ရှ်၊ မြန်မာတို့နှင့် နယ်စပ်များတစ်လျှောက် အိန္ဒိယက လုံခြုံရေးတပ်များကို တပ်ဖြန့်ထားကြောင်း ပြည်ထဲရေးဝန်ကြီးဌာနမှ အရာရှိ တစ်ဦးက ပြောကြားခဲ့သည်။

ဆက်သွယ်ရေး တစ်ရပ်၌ ပြည်ထဲရေး ဝန်ကြီးဌာနက နယ်စပ်လုံခြုံရေးတပ်ဖွဲ့ (BSF) ကို ၄,၀၉၆ ကီလိုမီတာ အရှည်ရှိ အိန္ဒိယ-ဘင်္ဂလားဒေ့ရှ် နယ်စပ်နှင့် အရှည် ၁,၆၄၃ ကီလိုမီတာရှိ အိန္ဒိယ-မြန်မာနယ်စပ်ဖြစ်သော Assam Rifles ဒေသတို့၌ နိုးကြားမှုကို အဆင့်မြှင့်တင်လျက် တပ်ဖြန့်ထားရန် တောင်းဆိုခဲ့သည်။

ယင်းနယ်ခြားစောင့် တပ်ဖွဲ့နှစ်ခုကို တရားမဝင် ရွှေ့ပြောင်းအခြေချသူများ အိန္ဒိယ နိုင်ငံသို့ ဝင်ရောက်မလာနိုင်အောင် အထူးသတိရှိကြရန် နှိုးဆော်ထားကြောင်း အိန္ဒိယ ပြည်ထဲရေး ဝန်ကြီးဌာနမှ အရာရှိက ပြောကြားခဲ့သည်။

ရိုဟင်ဂျာဟု ခေါ်ဆိုနေကြသော မြန်မာနိုင်ငံမှ ဘင်္ဂါလီ မွတ်စလင်များသည် တရားမဝင် ရွှေ့ပြောင်းလာသူများသာဖြစ်ပြီး ယင်းတို့ထဲမှ အချို့သည် ပါကစ္စတန်၏ ISI အဖွဲ့ ပုံစံမျိုးနှင့် ISIS တို့ကဲ့သို့သော အကြမ်းဖက် အဖွဲ့များကဲ့သို့ ပြစ်မှုကျူးလွန်ရန် အစီအစဉ် ချထားသူများ ဖြစ်ကြောင်းနှင့် ၎င်းတို့နိုင်ငံတွင်း၌ တည်ရှိခြင်းသည် နိုင်ငံတော် လုံခြုံရေး ခြိမ်းခြောက်မှု အကြီးအကျယ် ဖြစ်စေနိုင်ကြောင်း အိန္ဒိယ အစိုးရက အထက်တရားရုံးကို ပြောကြားခဲ့ပြီးနောက် ယခုကဲ့သို့ တပ်ဖြန့်ထားမှုကို ဆောင်ရွက်ခြင်းဖြစ်သည်။

UNHCR ၌ မှတ်ပုံတင်ထားသော မြန်မာနိုင်ငံမှ ဘင်္ဂါလီ မွတ်စလင် ၁၄,၀၀၀ ကျော်သည် အိန္ဒိယ၌ နေထိုင်လျက်ရှိကြောင်း သြဂုတ် ၉ ရက်တွင် အိန္ဒိယ အစိုးရက ပါလီမန်သို့ ပြောကြားခဲ့သည်။ သို့သော် အိန္ဒိယနိုင်ငံ အတွင်း၌ မြန်မာနိုင်ငံမှ ဘင်္ဂါလီ မွတ်စလင် စုစုပေါင်း ၄၀,၀၀၀ ခန့်ရှိကြောင်း အကူအညီပေးရေး အေဂျင်စီများက တွက်ချက် ခန့်မှန်းခဲ့သည်။

မြန်မာနိုင်ငံ အနောက်ပိုင်းရှိ လူနည်းစု ဖြစ်သော ဘင်္ဂါလီ (မူရင်း၌ ရိုဟင်ဂျာဟု ဖော်ပြ) မွတ်စလင်တို့သည် လူပေါင်းရာနှင့်ချီလျက် သေဆုံးခဲ့သော စစ်ဆင်ရေးတစ်ရပ် ပြုလုပ်ခဲ့ပြီးနောက် နေအိမ်များကို စွန့်ခွာထွက်ပြေးခဲ့ကြရသည်။

ကုလသမဂ္ဂ လူ့အခွင့်အရေးအဖွဲ့ အကြီးအကဲ ဇေအိရာအက်အယ်ဟူစိန်က ယင်းကို လူမျိုးလိုက် သုတ်သင်မှု ပြဋ္ဌာန်းစာအုပ် နမူနာဟု ခေါ်ဆိုခဲ့ပြီး ကုလသမဂ္ဂက သိန်းနှင့်ချီသော မြန်မာနိုင်ငံမှ ဘင်္ဂါလီများ (မူရင်း၌ ရိုဟင်ဂျာဟု ခေါ်ဆို) များသည် ကမ္ဘာပေါ်တွင် နှိပ်ကွပ်မှု အခံရဆုံး လူနည်းစုဟု ဖော်ပြခဲ့သည်။

Ref: AFP