အောက်တိုဘာ ၁၂ ရက်က ဘင်္ဂလားဒေ့ရှ်နိုင်ငံ အူခီယာခရိုင်ရှိ ဒုက္ခသည်စခန်းမှ အခြားဒုက္ခသည်စခန်းသို့ ရွှေ့ပြောင်းရန် ပြင်ဆင်နေသော ဘင်္ဂါလီမွတ်စလင်များ (Ref ; AFP)

ဘင်္ဂလားဒေ့ရှ်နိုင်ငံသည် မြန်မာနိုင်ငံမှ ရောက်ရှိလာသည့် ဘင်္ဂါလီမွတ်စလင် ဒုက္ခသည်များအတွက် လုပ်ဆောင်ပေးခြင်းမှနေ၍ အစ္စလာမ်ရန်ပုံငွေအဖွဲ့သုံးခုကို တားမြစ်ပိတ်ပင်လိုက်ကြောင်း ဥပဒေပြုအမတ်တစ်ဦးက အောက်တိုဘာ ၁၂ ရက်တွင် ပြောကြားခဲ့သည်။ ဘင်္ဂလားဒေ့ရှ် နယ်စပ်တစ်လျှောက်ရှိ စခန်းများမှ မွတ်စလင်များကို ရွှေ့ပြောင်းမှုသည် အစွန်းရောက်ဝါဒ သွတ်သွင်းရန် ဖြစ်လာစေနိုင်သည်ဟူသော စိုးရိမ်မှုများအကြား ယခုကဲ့သို့ တားမြစ်ခဲ့ခြင်း ဖြစ်သည်။

အာဏာရ အဝါမီလိဂ်ပါတီမှ ပါလီမန် အမတ်တစ်ဦးဖြစ်သော မာဂျာဘင်းခါလက်က အပြည်ပြည်ဆိုင်ရာ ရန်ပုံငွေအဖွဲ့များဖြစ်သော Muslim  Aid နှင့် Islamic Relife တို့အပြင် ဘင်္ဂလားဒေ့ရှ်အခြေစိုက် အလာမားဖာဇလူလာဖောင်ဒေးရှင်းတို့အား နိုင်ငံတောင်ဖျား ကော့စ်ဘဇားခရိုင်ရှိ ဒုက္ခသည် စခန်းများနှင့်ပတ်သက်၍ အမည်မည်းစာရင်းသွင်းလိုက်ကြောင်း ပြောကြားခဲ့သည်။

ပါလီမန်တွင် နိုင်ငံခြားရေးရာကော်မတီကို ကိုယ်စားပြုသည့် ခါလက်က ယခုကဲ့သို့ ပိတ်ပင်လိုက်သည့် ရန်ပုံငွေအဖွဲ့များနှင့် ပတ်သက်၍ အထူးတလည် စွပ်စွဲပြောဆိုမှုများကို ပြုလုပ်ခဲ့ခြင်း မရှိပေ။

သို့သော် သြဂုတ်လကတည်းက ဒုက္ခသည်စခန်းများ၌ ပြွတ်သိပ်နေထိုင်နေသော လူပေါင်း ၅၀၀,၀၀၀ ကျော်ရှိရာ ကော့စ်ဘဇားတွင် အကူအညီပေးရေးလုပ်ငန်းများ လုပ်ကိုင်လိုသည့် အကူအညီပေးရေးအေဂျင်စီ အားလုံးအား ဘင်္ဂလားဒေ့ရှ် အာဏာပိုင်များက စစ်ဆေးစိစစ်မှုများ ပြုလုပ်ခဲ့သည်။

“လုံခြုံရေးဆိုင်ရာ ကိစ္စအတွက် ကျွန်မတို့အနေနဲ့ ဘယ်သူဟာ ဘာ့ကြောင့် အကူအညီပေး ရသလဲဆိုတာကို ထိန်းချုပ် စောင့်ကြည့်လိုပါတယ်။ သူတို့ကို ဘယ်သူက ရန်ပုံငွေ ထောက်ပံ့ပေးလိုက်တာလဲ။ သူတို့ ဒီငွေတွေနဲ့ ဘာလုပ်မှာလဲ” ဟု ခါလက်က ပြောကြားခဲ့သည်။

“သူတို့ဟာ အားနည်းချက်ရှိနေတဲ့သူ တွေပါ။ ဒီတော့ ဒီရိုဟင်ဂျာတွေနဲ့ပတ်သက်ပြီး အများကြီးလုပ်သွားလို့ရပါတယ်။ ဒါကြောင့် ကျွန်မတို့ သတိထားဖို့ လိုလားတာပါ” ဟု  ခါလက်က ပြောကြားလျက် ဒုက္ခသည်များအား အစွန်းရောက် အကြမ်းဖက်သမားများအဖြစ် သိမ်းသွင်းရန် လွယ်ကူနိုင်ကြောင်းလည်း ဖြည့်စွက်ပြောကြားခဲ့သည်။

ဘင်္ဂလားဒေ့ရှ်သည် မကြာသေးမီ နှစ်များအတွင်းက မြန်မာနိုင်ငံမှ ဘင်္ဂါလီမွတ်စလင်များအား ဒုက္ခသည်စခန်းများ၌ လက်ခံမှုကို အကြီးအကျယ် လျှော့ချဖြတ်တောက်ခဲ့သော်လည်း ဒုက္ခသည်ပေါင်း ၅၂၀,၀၀၀ ကျော် ထပ်မံဝင်ရောက်လာပြီးနောက် လွန်ခဲ့သည့်လက ကန့်သတ်ထားချက်များကို လျှော့ပေါ့ပေးခဲ့သည်။

Ref ; AFP