ပဲခူးတိုင်းဒေသကြီး ပဲခူးမြို့နယ် မယင်းကျေးရွာအနီး အကျဉ်းဦးစီးဌာနပိုင်လယ်မြေတွင် ပြုလုပ်သည့် ရေကြီးနစ်မြုပ်စပါးများ စုပေါင်းပြီး ပြန်လည်စိုက်ပျိုးပွဲတွင် ပဲခူးတိုင်းဒေသကြီးဝန်ကြီးချုပ်ဦးဝင်းသိန်းနှင့်အဖွဲ့အား တွေ့ရစဉ် (ဓာတ်ပုံ-မောင်အေး)
ပဲခူးတိုင်းဒေသကြီးအတွင်း မြစ်ရေကြီးခြင်းကြောင့် စိုက်ပျိုးပြီး မိုးစပါးစိုက်ဧက ငါးသိန်းနီးပါးအထိ ရေဝင်နစ်မြုပ်ခံခဲ့ရပြီး မြစ်ရေများ ပြန်လည်ကျဆင်းချိန် စိုက်ပျိုးရေးဦးစီးဌာနမှ စာရင်းကောက်ယူခဲ့ရာ သြဂုတ် ၈ ရက်အထိ စာရင်းအရ ထိခိုက်မှုနှင့် ပျက်စီးဆုံးရှုံးမှုဖြစ်ပွားခဲ့သော မိုးစပါးစိုက်ဧက နှစ်သိန်းနီးပါးရှိနေကြောင်း ပဲခူးတိုင်းဒေသကြီး စိုက်ပျိုးရေးဦးစီးဌာနရုံး မှတ်တမ်းများအရ သိရသည်။
ပဲခူးတိုင်းဒေသကြီးအတွင်း ဇူလိုင်လ နောက်ဆုံးအပတ်အတွင်းက စစ်တောင်းမြစ်၊ ရွှေကျင်မြစ်နှင့် ပဲခူးမြစ်ရေကြီးခြင်းများကြောင့် မိုးစပါးစိုက်ဧကစုစုပေါင်း ၄၉၄၆၈၁ ဧကအထိ ရေလွှမ်းမိုးခံခဲ့ရကြောင်း သိရသည်။
မြစ်ရေများ ကျဆင်းသွားခဲ့ပြီးနောက် စိုက်ပျိုးရေးဦးစီးဌာန တာဝန်ရှိသူများက ကွင်းဆင်းကောက်ယူခဲ့ရာ သြဂုတ် ၈ ရက် အထိစာရင်းအရ ရေလွှမ်းဧက ၄၉၄၆၈၁ တွင် ၁၇၆၈၆၂ ဧကမှာ ရေလွှမ်းခံနေရဆဲဖြစ်ပြီး ပြန်ပေါ်ဧက ၃၁၇၈၁၉ ဧကရှိခဲ့ကြောင်း၊ အဆိုပါပြန်ပေါ်ဧကများအနက် ကောင်းမွန်သောမိုးစပါးစိုက်ဧက ၁၁၃၈၂၅ ဧကသာ ရှိခဲ့ပြီး ထိခိုက်ဧက ၁၃၁၁၇၄ ဧကနှင့် ပျက်စီးဆုံးရှုံးသည့်ဧက ၇၂၈၂၀ အထိရှိခဲ့ရာ စုစု ပေါင်းထိခိုက်ပျက်စီးဧက ၂၀၃၉၉၄ ဧကရှိကြောင်း ပဲခူးတိုင်းဒေသကြီးစိုက်ပျိုးရေးဌာန ရုံးမှတ်တမ်းများအရ သိရသည်။
ပဲခူးတိုင်းဒေသကြီးအတွင်း မြစ်ရေကြီးခြင်းကြောင့်ပျက်စီးသွားသော မိုးစပါးစိုက်ခင်းများအား သြဂုတ် ၁၀ ရက် နံနက်ပိုင်းကတွေ့ရစဉ်
ပဲခူးတိုင်းဒေသကြီးအတွင်း စိုက်ပျိုးသော မိုးစပါးများမှာ မျိုးစပါးများ တိုက်ရိုက် ကြဲပက်စိုက်ပျိုးသော ကြဲသားစိုက်ခင်းက ပိုမိုများပြားခဲ့ပြီး မျိုးစပါးပျိုးထောင်စိုက်ပျိုးသူ နည်းပါးကြောင်း၊ ပြီးခဲ့သည့် ဇူလိုင်လအတွင်း မြစ်ရေကြီးခြင်းကြောင့် ရေလွှမ်းမိုးခံရသော မိုးစပါးများအနက် ကြဲသားစိုက်ခင်းများမှာ ပျက်စီးဆုံးရှုံးမှု ပိုများကြောင်း၊ ထိုကဲ့သို့ပျက်စီး ဆုံးရှုံးသွားသောကြောင့် မျိုးစပါးစရိတ်၊ လုပ်အားခများ ဆုံးရှုံးခဲ့ရကြောင်း၊ ပျက်စီးသွားသော မိုးစပါးများနေရာတွင် အစားထိုး ပြန်လည်ဆောင်ရွက်နေကြသော်လည်း မိုးကာလ မကုန်ဆုံးသေးသောကြောင့် နောက်တစ်ကြိမ်မြစ်ရေကြီးကာ ရေဝင်ရောက်မှု ထပ်မံကြုံတွေ့ပါက ထပ်မံပျက်စီးမှုကြုံတွေ့ ရနိုင်ပြီး နောက်တစ်ကြိမ် အစားထိုးစိုက်ပျိုးရန် မလွယ်ကူတော့ကြောင်း မိုးစပါးစိုက် တောင်သူများထံမှ သိရသည်။
ယင်းအခြေအနေနှင့်ပတ်သက်ပြီး တောင်ငူမြို့နယ် ပြသောင်ကျေးရွာမှ မိုးစပါးစိုက်တောင်သူ ဦးတင်စန်းက “ဆုံးရှုံးမှုကတော့ အကုန်ဆုံးရှုံးကုန်တာပေါ့။ ဘာဖြစ်လို့လဲဆိုတော့ ပျက်စီးတဲ့နောက်တော့ဆုံးရှုံးပြီပေါ့။ ကြဲထားစိုက်ထားတာတွေ လုပ်အားခတွေအကုန်ဆုံးရှုံးပြီပေါ့။ အဲဒီတော့ ဒီရေကိုကလည်း နှစ်စဉ်နှစ်တိုင်းတော့ သမရိုးကျတော့ဖြစ်နေကြပဲ။ ဒါပေမဲ့ ဒီနှစ်က ကြဲရစိုက်ရတာက မိုးကအဆက်မပြတ်ရွာနေတဲ့ အခါကျတော့ အပင်က အရင့်မဖြစ်တော့ဘူး။ အပင်အနုဖြစ်တော့ ရေနစ်မခံနိုင်အောင် ဖြစ်ကုန်တာ” ဟု ပြောကြားသည်။
ထိုကဲ့သို့ရေလွှမ်းမိုးခံရပြီး ထိခိုက်သွားသော မိုးစပါးစိုက်ဧကများနေရာတွင် ပျိုးပင်များ အစားထိုးစိုက်ပျိုးခြင်းနှင့် ပျက်စီးခဲ့သည့် မိုးစပါးစိုက်ခင်းများအား အသစ်ပြန်လည်စိုက်ပျိုးခြင်းများတွင် စိုက်ပျိုးရေးဦးစီးဌာနနှင့် သက်ဆိုင်ရာ ဌာနဆိုင်ရာများ ပူးပေါင်း၍ ကူညီဆောင်ရွက်လျက်ရှိကြောင်၊တောင်သူများ၏ လိုအပ်ချက်အပေါ် စာရင်းကောက်ယူပြီး လိုအပ်သော မျိုးစပါးများနှင့် ဓာတ်မြေသြဇာများ ပံ့ပိုးခြင်း၊ ထွန်ယက်ခြင်း လုပ်ငန်းများအတွက် စက်မှုလယ်ယာဦးစီးဌာန၏ အကူအညီများရယူ၍ပျက်စီးဆုံးရှုံးသွားသော မိုးစပါးများအား အစားထိုးပြန်လည် စိုက်ပျိုးနိုင်ရေးကူညီရန် ဆောင်ရွက်ပေးလျက်ရှိကြောင်း သိရသည်။
ပဲခူးခရိုင်စိုက်ပျိုးရေးဦးစီးဌာန ဦးစီးမှူး ဦးလေးမြင့်က “အခုချိန်ကတော့ စာရင်း အတိအကျ မရသေးပါဘူး။ ကျွန်တော်တို့ မနေ့ကအထိတော့ ပျက်စီးဧက ၂၄၀၀၀ ကျော်ကို ပျက်စီးဧကစာရင်းကောက်ပြီးဖြစ်ပါတယ်။ အဲဒီကောက်ပြီးတဲ့ စာရင်းတွေမှာ ကျွန်တော်တို့ရဲ့ မှတ်တမ်းများအရပေါ့နော် အချို့လယ်သမားတွေကျတော့ ကောက်တက်ပွားနဲ့ စိုက်တယ်။ အချို့ကျတော့လည်း ပျိုးထောင်ပြီး ဧကနောက်ကျစိုက်ပျိုးလေ့ရှိတယ်။ တဖြည်းဖြည်းနဲ့စိုက်မယ်။ တချို့ကျတော့လည်း မျိုးစပါး လိုအပ်တယ်လို့ ပြောပါတယ်။ အဲဒီအပေါ်မှာ အမြန်ဆောင်ရွက်နိုင်ရေး စီစဉ်ဆောင်ရွက်လျက်ရှိပါတယ်။ ဒီမျိုးစေ့အပြင်ပေါ့နော်။ သူတို့ရဲ့ ကြိုက်တဲ့မျိုးစေ့တွေ စိုက်ပျိုးဖို့လည်း ကျွန်တော်တို့ လက်သင့်ခံပါတယ်။ ပြီးတော့မှ ပျက်စီးတဲ့ဟာအပေါ်မူတည်ပြီးတော့မှ မျိုးစပါးတွေ ပံ့ပိုးမှာဖြစ်ပါတယ်။ အဲဒီလိုပဲ ကျွန်တော်တို့က မြေသြဇာကိုတွက်ချက်ပြီးတာနဲ့ ချက်ချင်းအချိန်မီဖြန့်ဖြူးဖို့ စီစဉ်ဆောင်ရွက်လျက်ရှိပါတယ်။ စိုက်ပျိုး ရေးဦးစီးဌာနအနေနဲ့ကတော့ တောင်သူတွေ အချိန်မီပြန်လည်စိုက်ပျိုးနိုင်ရေးအတွက် စက်မှုလယ်ဦးစီးဌာနနဲ့ ပူးပေါင်းပြီးတော့မှ ဆောင်ရွက်လျက်ရှိပါတယ်”ဟုပြောကြားသည်။
ပဲခူးတိုင်းဒေသကြီးအတွင်း ပြီးခဲ့သည့် ဇူလိုင် ၂၃ ရက်မှ ၂၉ ရက်အထိ တစ်ပတ်အတွင်း မြစ်ရေမှာ စိုးရိမ်ရေအမှတ်အထက် ကျော်လွန်ကာ စံချိန်တင်ရေကြီးမှုများဖြစ်ပွားခဲ့ရာ ပဲခူးတိုင်းဒေသကြီးအတွင်းရှိ အခြေခံပညာကျောင်းပေါင်း ၃၆၀ ကျော်အား ယာယီပိတ်ထားရခြင်း၊ ရေဘေးသင့်ပြည်သူ အိမ်ထောင်စုပေါင်း ၁၅၀၀၀ ကျော်၊ လူဦးရေ ၇၀၀၀၀ ကျော်အထိ ရေဘေးလွတ်ရာသို့ ရွှေ့ပြောင်းရခြင်းတို့ ကြုံတွေ့ခဲ့ရသည့်အပြင် ချောင်းတာတမံများ၊ ဆည်တာတမံများ ကျိုးကျပျက်စီးခြင်းလည်း ကြုံတွေ့ခဲ့ရကြောင်း သိရသည်။
