ရန်ကုန်တက္ကသိုလ်တွင် သြဂုတ် ၈ ရက်က ရှစ်လေးလုံး အရေးတော်ပုံ နှစ် ၃၀ ပြည့် အခမ်းအနား ကျင်းပနေစဉ်

၂၀၀၈ ဖွဲ့စည်းပုံအခြေခံဥပဒေအရ ရွေးကောက်ခံအစိုးရတစ်ရပ် ပေါ်ပေါက်လာကာ ငြိမ်းချမ်းရေးဆွေးနွေးမှု လုပ်ငန်းစဉ်များနှင့် ဒေသအချို့တွင် လမ်းပန်းဆက်သွယ်ရေး အပါအဝင် ဖြစ်ထွန်းတိုးတက်မှုအချို့ ရှိသော်လည်း တိုင်းပြည်ဆင်းရဲတွင်းနက်နေခြင်း၊ တရားဥပဒေစိုးမိုးမှု အားနည်းခြင်း၊ သတင်းလွတ်လပ်ခွင့် ကင်းမဲ့ခြင်းနှင့် အကျင့်ပျက်ခြစားမှုများသည် ထင်ရှားမြင်သာသော အခက်အခဲများဖြစ်ကြောင်း ရန်ကုန် ရှစ်လေးလုံး နိုင်ငံရေးဆွေးနွေးပွဲက ပြည်သူသို့ အကြံပြုသည်။

ရှစ်လေးလုံး အရေးတော်ပုံ နှစ် ၃၀ ကာလ ပြန်လည်သုံးသပ်ခြင်း ဆွေးနွေးပွဲကို ရန်ကုန်တက္ကသိုလ် ဝိဇ္ဇာခန်းမ၌ သြဂုတ် ၆ ရက်နှင့် ၇ ရက်တို့တွင် ပြုလုပ်ခဲ့ပြီး အဆိုပါ နိုင်ငံရေးဆွေးနွေးပွဲမှ ရရှိလာသော အချက်များကို အခမ်းအနားဖြစ်မြောက်ရေး ကော်မတီက ပြည်သူလူထုသို့ အကြံပြုထုတ်ပြန် ကြေညာရာတွင် ထိုသို့ ထည့်သွင်းအကြံပြု ထုတ်ပြန်ခဲ့ခြင်းဖြစ်သည်။

နှစ်ရက်တာ နိုင်ငံရေးဆွေးနွေးပွဲတွင် ဒီမိုကရေစီအရေး နှစ် ၃၀ ခရီး၊ တိုင်းရင်းသားများ တန်းတူရေးနှင့် ဖက်ဒရယ်ပြည်ထောင်စု၊ မြန်မာ့နိုင်ငံရေးနှင့် စစ်အာဏာရှင်စနစ်ဟူသော ခေါင်းစဉ်သုံးခုကို သြဂုတ် ၆ ရက်တွင် ရဟန်းရှင်လူ ပြည်သူနှင့် နိုင်ငံရေးတက်ကြွလှုပ်ရှားသူ စုစုပေါင်း ၅၂၁ ဦးတို့ကလည်းကောင်း၊ သြဂုတ် ၇ ရက်တွင် ၂၁၇ ဦးတို့ကလည်းကောင်း စုပေါင်းဆွေးနွေးခဲ့ကြခြင်းဖြစ်ကြောင်း သိရသည်။

ထိုသို့ ဆွေးနွေးချက်များအရ နှစ် ၃၀ ကာလအတွင်း တောင်းဆိုချက်များအဖြစ် စစ်အာဏာရှင်စနစ် ဖယ်ရှားရေး၊ ဒီမိုကရေစီ ရရှိရေး၊ ၁၉၉၀ ရွေးကောက်ပွဲရလဒ် အကောင်အထည်ဖော်ရေး၊ အရပ်သားအစိုးရ ပေါ်ပေါက်ရေးမှ စတင်ခဲ့ပြီး နောက်ပိုင်းတွင် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးနှင့် ဖျက်သိမ်းရေး အပါအဝင် ငြိမ်းချမ်းရေး၊ အမျိုးသား ပြန်လည်သင့်မြတ်ရေးနှင့် အမျိုးသားတန်းတူရေးတို့ကို တောင်းဆိုခဲ့ကြောင်း သိရသည်။

ထို့ပြင် ဌာနဆိုင်ရာများ၏ လုပ်ထုံးလုပ်နည်းများ ပြောင်းလဲမှုမရှိသေးခြင်း၊ အစိုးရအနေဖြင့် ဝန်ကြီးဌာနအားလုံးကို စီမံဆောင်ရွက်ခွင့်မရခြင်း၊ ဒီမိုကရေစီအရ လွတ်လပ်စွာ ရေးသားထုတ်ဖော် ပြောဆိုခွင့်များအတွက် အာမခံချက်များ မရေရာခြင်း၊ အစိုးရနှစ်ရပ်ရှိနေ သကဲ့သို့ ဖြစ်နေခြင်းနှင့် ငြိမ်းချမ်းရေး လုပ်ငန်းစဉ်များ ဖော်ဆောင်ရာတွင် တိုးတက်မှုများ နှေးကွေးနေခြင်းတို့သည် အခက်အခဲနှင့် စိန်ခေါ်မှုများအဖြစ် ရှိနေကြောင်း ယခုဆွေးနွေးပွဲ၏ အကြံပြု ထုတ်ပြန်ချက်အရ သိရသည်။

စိန်ခေါ်မှုများနှင့် အခက်အခဲများကို ရင်ဆိုင်ကျော်လွှားနိုင်ရန်အတွက် နိုင်ငံရေးပါတီများ အနေဖြင့် အရည်အသွေးကို မြှင့်တင်တည်ဆောက်သင့်ပြီး အစိုးရအနေဖြင့်လည်း ဖွံ့ဖြိုးတိုးတက်မှုကို ရေတိုရေရှည် စီမံကိန်းများချမှတ်၍ အောင်မြင်အောင် အကောင်အထည်ဖော် ဆောင်ရွက်သင့်ကာ နိုင်ငံရေးပါတီများသည် ပြည်သူ့အကျိုးကို ရှေးရှု၍ ပြည်သူ့ဘက်တွင် အမြဲရပ်တည်သင့်သည်ဟု အဆိုပါ အကြံပြု ထုတ်ပြန်ချက်တွင် ဖော်ပြထားသည်။

ထို့ပြင် ငြိမ်းချမ်းရေးဖြစ်စဉ်များ အဆင်ပြေချောမွေ့စေရန် NCA လုပ်ငန်းစဉ်များကို လိုအပ်ပါက ပြန်လည်သုံးသပ်ခြင်း၊ အစိုးရလုပ်ပိုင်ခွင့်များကို အပြည့်အ၀ အသုံးချနိုင်ရန် အားထုတ်ခြင်း၊ အုပ်ချုပ်ရေးအာဏာကို ပြည်သူလူထု အကျိုးအတွက် ထိရောက်စွာ အသုံးချနိုင်ရန် အစိုးရအနေဖြင့် ကြိုးပမ်းခြင်းနှင့် ဘတ်ဂျက်ကိစ္စများတွင် ပွင့်လင်းမြင်သာစွာ ဆောင်ရွက်ရန် ရန်ကုန်ရှစ်လေးလုံး နိုင်ငံရေးဆွေးနွေးပွဲက အကြံပြု ထုတ်ပြန်ခဲ့သည်။

တိုင်းရင်းသားများ တန်းတူရေးနှင့် ဖက်ဒရယ်ပြည်ထောင်စုဟူသော ခေါင်းစဉ်တွင် တိုင်းရင်းသားတန်းတူရေးအပေါ် အဓိပ္ပာယ် ဖွင့်ဆိုကြရာ၌ ပင်လုံကတိကဝတ်များနှင့် သဘောတူညီချက်များကို အကောင်အထည် ဖော်နိုင်လျှင် တန်းတူရေးရရှိနိုင်သည်ဟု ဆွေးနွေးတင်ပြချက်များ တွေ့ရှိရပြီး ဖက်ဒရယ်ပြည်ထောင်စု တည်ဆောက်ရေးအတွက် ၂၀၀၈ ဖွဲ့စည်းပုံအခြေခံဥပဒေသည် ကြီးမားသော အတားအဆီးတစ်ခုဖြစ်သည်ဟု ယခုဆွေးနွေးပွဲတွင် ဆွေးနွေးခဲ့ကြသည်။

ထို့ကြောင့် အနာဂတ်ဖက်ဒရယ်ပြည်ထောင်စု တည်ဆောက်မည့် နည်းလမ်းများအား ဆွေးနွေးကြရာတွင် အားလုံးလက်ခံ သဘောတူနိုင်သည့် အဓိပ္ပာယ်ဖွင့်ဆိုချက် လိုအပ်ကြောင်း၊ ဖွံ့ဖြိုးမှုတွင်လည်း ဒေသအားလုံး တစ်ပြေးညီ တူညီနိုင်ရန်ကိုလည်း လိုအပ်မည်ဖြစ်ကာ အစိုးရအနေဖြင့် ကြားမနေဘဲ ၎င်းကိုယ်တိုင် တပ်မတော်နှင့်ဆွေးနွေးပြီး နည်းလမ်းရှာသင့်ကြောင်း ရန်ကုန်ရှစ်လေးလုံး နိုင်ငံရေးဆွေးနွေးပွဲက အကြံပြု ထုတ်ပြန်ခဲ့သည်။