ကျောက်မီးသွေးသုံး ဓာတ်အားပေးစက်ရုံ တည်ဆောက်ရန် လျာထားသည့် ဧရိယာအတွင်းရှိ ဘားအံမြို့နယ် သုံးအိမ်စုကျေးရွာတွင် စီမံကိန်းကြောင့် ဒေသခံများ စိုးရိမ်ပူပန်နေရခြင်းအတွက် ၂၀၁၇ ခုနှစ် နိုဝင်ဘာ ၇ ရက်က ဆုတောင်းပွဲပြုလုပ်စဉ် (ဓာတ်ပုံ-ဘိုဘိုမြင့်)

မြစ်ဆုံ စုံစမ်းရေးကော်မရှင် အစီရင်ခံစာ၊ သံလွင်ရေကာတာ စီမံကိန်းနှင့် ကရင်ကျောက်မီးသွေး ဓာတ်အားပေး စီမံကိန်းဆိုင်ရာ သတင်းအချက်အလက်များကို ပြည်သူများ သိရှိနိုင်ရန် ပွင့်လင်းမြင်သာစွာ ဆောင်ရွက်သင့်ကြောင်း MATA (မြန်မာနိုင်ငံ ပွင့်လင်းမြင်သာမှုနှင့် တာဝန်ယူမှု၊ တာဝန်ခံမှုဆိုင်ရာ အရပ်ဘက်မဟာမိတ်အဖွဲ့) မှ ထုတ်ပြန်ခဲ့သည်။

ထုတ်ပြန်ချက်တွင် လက်ရှိ အနိုင်ရပါတီ၏ ၂၀၁၅ ရွေးကောက်ပွဲ ကြေညာစာတမ်းတွင် စွမ်းအင်ကဏ္ဍအတွက် မြန်မာနိုင်ငံ၌ စွမ်းအင်ထုတ်လုပ်နိုင်သော အရင်းအမြစ်များတွင် တွင်းထွက်စွမ်းအင်၊ ရေအားစွမ်းအင်၊ နေရောင်ခြည်စွမ်းအင်၊ လေအားစွမ်းအင်၊ မြေအောက် အပူစွမ်းအင်၊ ဇီဝဓာတ်ငွေ့စွမ်းအင်၊ ဇီဝရေနံစွမ်းအင် တို့ဖြစ်ကြောင်း၊ တွင်းထွက်စွမ်းအင်သည် အကန့်အသတ်ရှိပြီး သဘာဝပတ်ဝန်းကျင် ပျက်စီးဆုံးရှုံးမှု အနည်းနှင့်အများ ဖြစ်ပေါ်စေကြောင်း၊ တွင်းထွက်စွမ်းအင်သည် လူသားများအတွက် သုံးစွဲရ အလွယ်ကူဆုံး ဖြစ်သော်လည်း အကန့်အသတ်ရှိသဖြင့် နောင်မျိုးဆက်များအတွက် ထည့်သွင်းစဉ်းစားရန် လိုအပ်ကြောင်း၊ ရေအားစွမ်းအင်ထုတ်ယူမှုတွင် ဆည်ကြီးများ တည်ဆောက်ရသည့်အတွက် သဘာဝပတ်ဝန်းကျင်ထိခိုက်မှု အများဆုံးဖြစ်သောကြောင့် ရှိရင်းစွဲ ရေအားစွမ်းအင်နှင့် ဆည်တည်ဆောက်ပြီး ဒေသများတွင် ဆည်များကို ပြုပြင်ထိန်းသိမ်းပြီး ရေအားလျှပ်စစ် ထုတ်ယူအသုံးပြုမည်ဖြစ်ကြောင်း ဖော်ပြထားသည်။

ထို့ပြင် ကမ္ဘာ့ဘဏ်၊ အာရှဖွံ့ဖြိုးရေးဘဏ် နှင့် ဂျပန်နိုင်ငံတကာ ပူးပေါင်းဆောင်ရွက်ရေး အေဂျင်စီများမှ National Energy Master Plan နှင့် National Electrification Plan များ ရေးဆွဲ အတည်ပြုသည့် လုပ်ငန်းစဉ်အဆင့်ဆင့်တွင် ဌာနေတိုင်းရင်းသားများ၊ ကျေးလက်ပြည်သူများ ပါဝင်လာခြင်း လုံးဝမရှိဘဲ ဗဟိုချုပ်ကိုင်သော လျှပ်စစ်စွမ်းအင်ဆိုင်ရာ မူဝါဒဥပဒေများ လုပ်ထုံးလုပ်နည်းများကို ပြဋ္ဌာန်းခြင်းဖြစ်သည့်အတွက် ဒီမိုကရေစီ၊ ဖက်ဒရယ်နှင့် လူ့အခွင့်အရေးများ ဆန့်ကျင်နေသည်ဟု သုံးသပ်ကြောင်း၊ အဆိုပါ စီမံကိန်းများအတွက် ကုန်ကျစရိတ်နှင့် လုပ်ငန်းစဉ် ခန့်မှန်းတွက်ချက် အဆိုပြုချက်များသည် မြန်မာနိုင်ငံအတွက် များပြားကြီးမားသော ပမာဏများဖြစ်နေပြီး အဓိက အကျိုးခံစားခွင့်ရရှိမည့် ဒေသများ၊ လူတန်းစားများတွင် တိုင်းရင်းသားဒေသများ၊ ဆင်းရဲနွမ်းပါးသူများ မပါဝင်သောကြောင့် မူလကွာဟချက် ကြီးမားပြီးဖြစ်သော တန်းတူအခွင့်အရေး ပြဿနာများ၊ နိုင်ငံရေး လူမှုစီးပွားရေးပြဿနာများကို ပိုမိုဆိုးရွားစေမည့် စီမံကိန်းများ ဖြစ်သောကြောင့် ငြိမ်းချမ်းရေးကို ဆန့်ကျင်သည့် လုပ်ရပ်အဖြစ် ရှုမြင်သည်ဟု ထုတ်ပြန်ချက်တွင် ဖော်ပြထားသည်။

ထို့ပြင် ပမာဏကြီးမားပြီး ကုန်ကြမ်းရင်းမြစ်အတွက် ပြည်ပကို အဓိက အားကိုးရမည့် ကျောက်မီးသွေးသုံး လျှပ်စစ်ဓာတ်အားပေး စက်ရုံများ၊ ပမာဏကြီးမားသော ရေအားလျှပ်စစ်ထုတ်လုပ်ရေး စီမံကိန်းများကို ဦးစားပေးသည့် စီမံကိန်းများကို ဆောင်ရွက်ခြင်းသည် အများပြည်သူ စွမ်းအင်ရရှိရေးအတွက် ရေရှည်တည်တံ့ ကောင်းမွန်စေမည့် လက်တွေ့ကျသော ပြန်ပြည့်မြဲ စွမ်းအင်အလားအလာများ၊ ကောင်းမွန် သင့်လျော်သည့် အစီအမံများအပေါ် စဉ်စားအဖြေရှာခြင်း မဟုတ်ဘဲ နိုင်ငံတကာနှင့် ပြည်တွင်း စီးပွားရေးလုပ်ငန်းရှင်ကြီးများ၏ ပုဂ္ဂလိက အကျိုးစီးပွားအတွက် တင်ပို့ရောင်းချရန် ရည်ရွယ်စီမံထားကြောင်း သုတေသန အချက်အလက်များအရ ထင်ရှားစွာ တွေ့ရှိရသည့်အတွက် များစွာစိုးရိမ်ပူပန်ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် ဒေသခံ တိုင်းရင်းသားပြည်သူများနှင့် သဘာဝပတ်ဝန်းကျင်ထိခိုက်မှု ကြီးမားစေမည့် မြစ်ဆုံရေကာတာ၊ သံလွင်ရေကာတာ စသည့် ရေအားလျှပ်စစ် စီမံကိန်းများ နှင့် ကျောက်မီးသွေးသုံး လျှပ်စစ်ဓာတ်အားပေးစက်ရုံ စီမံကိန်းများကို လုံး၀ ဆက်လက် ဆောင်ရွက်ခြင်း မပြုရန်၊ အဆိုပါ စီမံကိန်းများနှင့် ပတ်သက်သော သတင်းအချက်အလက် များကို အများပြည်သူ သိရှိနိုင်ရန်အတွက် ပွင့်လင်းမြင်သာစွာ ဆောင်ရွက်ပေးရန်၊ ဥပမာ မြစ်ဆုံ စုံစမ်းရေးကော်မရှင် အစီရင်ခံစာ၊ သံလွင်ရေအားလျှပ်စစ် စီမံကိန်းနှင့် ကရင်ကျောက်မီးသွေး ဓာတ်အားပေးစီမံကိန်းဆိုင်ရာ သတင်းအချက်အလက်များ၊ လိုအပ်သော စွမ်းအင်များ မြန်ဆန်ထိရောက်စွာ လက်လှမ်းမီ ရရှိနိုင်မည့် ပြန်ပြည့်မြဲ စွမ်းအင်ကို ဦးစားပေးသော နိုင်ငံတကာနှင့် ပြည်တွင်းရင်းနှီးမြှုပ်နှံမှုများ၊ မူဝါဒများ၊ ဥပဒေများ အမြန်ဆုံး ဖော်ဆောင်ပေးရန် ထုတ်ပြန်ချက်တွင် ဖော်ပြထားသည်။

ဆက်လက်ပြီး လက်ရှိ ဗဟိုချုပ်ကိုင်မှု ကြီးမားပြီး ထိရောက်မှု အားနည်းသော စွမ်းအင်ဆိုင်ရာ မူဝါဒဥပဒေများကို တိုင်းရင်းသားများ နေထိုင်ရာ တိုင်းဒေသကြီးများနှင့် ပြည်နယ်အသီးသီးတွင် အုပ်ချုပ်စီမံမှု အာဏာအပ်နှင်းပြီး ဒေသအလိုက် အားသာချက်ရှိသော သဘာ၀ အရင်းအမြစ်များ၊ ရှိရင်းစွဲ အခြေခံအဆောက်အအုံများ၊ လူ့စွမ်းအားအရင်းအမြစ်များကို ထိရောက်စွာ အသုံးချပြီး လူတိုင်း လက်လှမ်းမီ တရားမျှတသော စွမ်းအင်စနစ်သို့ ပြုပြင်ပြောင်းလဲ ဖော်ဆောင်ရန်၊ ရွေးကောက်ပွဲ ကြေညာစာတမ်းပါ တစ်နိုင်တစ်ပိုင် လျှပ်စစ်ဓာတ်အား ထုတ်ယူရန် လွယ်ကူသော နေရောင်ခြည်စွမ်းအင်၊ ဇီဝဓာတ်ငွေ့စွမ်းအင်၊ စပါးခွံလောင်ကျွမ်းမှုမှ ထွက်ရှိသော ဓာတ်ငွေ့သုံး လျှပ်စစ်ထုတ်လုပ်ခြင်း၊ အသေးစား ရေအားလျှပ်စစ် ထုတ်လုပ်ခြင်း အစရှိသဖြင့် ပုဂ္ဂလိက စွမ်းအင်ထုတ်လုပ်နိုင်သော လုပ်ငန်းငယ်များကို စနစ်တကျ ဖွံ့ဖြိုးတိုးတက်အောင် အားပေးဆောင်ရွက်နိုင်သည့် မူဝါဒဥပဒေ၊ နည်းဥပဒေများ အမြန်ဆုံးရေးဆွဲ အကောင်အထည်ဖော်ဆောင်ရွက်ရန်နှင့် ပွင့်လင်းမြင်သာမှု၊ တာဝန်ယူတာဝန်ခံမှု၊ တရားမျှတမှုနှင့် အရပ်ဘက်အဖွဲ့အစည်းများ၏ ပါဝင်မှုအား ကောင်းကျယ်ပြန့်စေမည့် မူဝါဒ၊ ဥပဒေ လုပ်ထုံးလုပ်နည်းများ အကောင်အထည်ဖော် ဆောင်ရွက်ပေးရန် ထုတ်ပြန်ချက်တွင် ဖော်ပြထားသည်။