ရန်ကုန်မြို့ လှိုင်သာယာစက်မှုဇုန်ကို ၂၀၁၇ ခုနှစ်အတွင်းက တွေ့ရစဉ်
လုပ်ငန်းရှင်များ၏ ကန့်ကွက်မှုများနှင့် ကြုံတွေ့နေရသည့် Withholding Tax ( ပင်ရင်းမှနုတ်ယူပေး သွင်းရသည့်ဝင်ငွေခွန်) ကို တစ်နှစ်ပြည့်ချိန်တွင် ပြည်တွင်းအခွန်များဦးစီးဌာနက ပြန်လည်သုံးသပ်သွားမည်ဖြစ်ကြောင်း သိရသည်။
“၂၀၁၇ ခုနှစ် မေလတုန်းက ထုတ်ပြန်ခဲ့တာ။ ဒီ Withholding Tax နဲ့ပတ်သက်ပြီးတော့ ကန့်ကွက်မှုတွေလည်း ရှိတယ်။ ဌာနအနေနဲ့လည်း ကန့်ကွက်တာတွေကို စုစည်းပြီးတော့ တစ်နှစ်ပြည့်တဲ့အချိန်မှာ ပြန်လည်သုံးသပ်ဖို့ရှိတယ်” ဟု ပြည်တွင်းအခွန်များ ဦးစီးဌာနမှ တာဝန်ရှိသူတစ်ဦးက ဆိုသည်။
Withholding Tax ဆိုသည်မှာ လစာခေါင်းစဉ်မှအပ သတ်မှတ်ထားသော ပေးချေငွေအမျိုးအစားများနှင့် စပ်လျဉ်း၍ ငွေထုတ်ပေးရန် တာဝန်ရှိသူက ငွေထုတ်ပေးချိန်တွင် သတ်မှတ်ထားသော ရာခိုင်နှုန်းများအတိုင်း ကျသင့်သောဝင် ငွေခွန်ကိုနုတ်ယူပေးသွင်းရန် ထုတ်ပြန်ထားခြင်း ဖြစ်သည်။
အဆိုပါသတ်မှတ်ချက်များမှာ ချေးငွေ သို့မဟုတ် ကြွေးမြီတစ်ရပ်ရပ် သို့မဟုတ် ယင်းသဘော သဘာ၀ သက်ရောက်သည့် ကိစ္စရပ် သို့မဟုတ် ငွေစုဆောင်းခြင်းအတွက် အတိုးပေးငွေအမျိုးအစားတွင် ပြည်ပနေနိုင်ငံခြားသားအတွက် ၁၅ ရာခိုင်နှုန်း၊ လိုင်စင်၊ ကုန်အမှတ်တံဆိပ်၊ မူပိုင်အခွင့်အရေးစသည် တို့ကို အသုံးချခွင့်ပြုသည့်အတွက် ပေးချေငွေများအမျိုးအစားတွင် ပြည်တွင်းနေနိုင်ငံသားနှင့် ပြည်တွင်းနေနိုင်ငံခြားသားများအတွက် ၁၀ ရာခိုင်နှုန်း၊ ပြည်ပနေနိုင်ငံခြားသားအတွက် ၁၅ ရာခိုင်နှုန်း၊ နိုင်ငံ တော်အဖွဲ့အစည်းများ၊ နိုင်ငံပိုင်လုပ်ငန်းများ၊ စည်ပင်သာယာရေးအဖွဲ့များ၊ သမဝါယမအသင်းများ၊ နိုင်ငံခြားကုမ္ပဏီများ၊ နိုင်ငံခြားသားပိုင် လုပ်ငန်းများနှင့် အဖွဲ့အစည်းများ၊ ပြည်တွင်းကုမ္ပဏီများ၊ တည်ဆဲဥပဒေတစ်ရပ်ရပ်အရ ဖွဲ့စည်းမှတ်ပုံတင်ထားသော အစုစပ် လုပ်ငန်းများတို့ကတင်ဒါစနစ်၊ ကန်ထရိုက်စနစ်၊ ဈေးနှုန်းခေါ်ယူသည့် စနစ်သို့မဟုတ် အခြားစနစ်တစ်ခုခုဖြင့် နိုင်ငံတော်အတွင်း ပစ္စည်းဝယ်ယူခြင်း၊ လုပ်ငန်းဆောင်ရွက်စေခြင်း၊ ဝန်ဆောင်မှုရယူခြင်း၊ ငှားယူခြင်းတို့အတွက် ပေးငွေများအမျိုးအစားတွင် ပြည်တွင်းနေ နိုင်ငံသားနှင့် ပြည်တွင်းနေ နိုင်ငံခြားသားများအတွက် နှစ်ရာခိုင်နှုန်း၊ ပြည်ပနေ နိုင်ငံခြားသားအတွက် ၂ ဒသမ ၅ ရာခိုင်နှုန်းအဖြစ် သတ်မှတ်ထားသည်။
အဆိုပါပေးချေငွေမှ အခွန်နုတ်ယူပေးသွင်းရာတွင် ငွေထုတ်ပေးရန် တာဝန်ရှိသူသည် အခွန်ထမ်း ကိုယ်တိုင်ကျသင့်အခွန်ကို ကိုယ်တိုင်စည်းကြပ်ပေးဆောင်စေခြင်း အခွန်စနစ်သစ်တွင် ပါဝင်ကြသည့် အခွန်ထမ်းကြီးများ၊ အလယ်အလတ် အခွန်ထမ်းများဖြစ်ပါက ပေးချေငွေကျပ် ၁၅ သန်းအထိ အခွန်နုတ်ယူပေးသွင်းခြင်း မပြုရဘဲပေး ချေငွေသည် ကျပ် ၁၅ သိန်းထက် ကျော်လွန်ပါက သက်ဆိုင်ရာအခွန်နှုန်းဖြင့် နုတ်ယူပေးသွင်းရမည်။ အထက်ပါလုပ်ငန်းများအပဖြစ်ပါက ပေးချေငွေကျပ် ငါးသိန်းအထိ အခွန်နုတ်ယူပေးသွင်းခြင်းမပြုရဘဲ စုစုပေါင်း ပေးချေငွေသည် ကျပ်ငါးသိန်းထက် ကျော်လွန်ပါက သက်ဆိုင်ရာ အခွန်နှုန်းဖြင့် နုတ်ယူပေးသွင်းရမည် ဖြစ်သည်။
Withholding Tax နှင့် ပတ်သက်၍ အငြင်းပွားမှုများအဖြစ် လုပ်ငန်းရှင်များအကြားတွင် အပြီးသတ် စည်းကြပ်မှုအရ ပေးသွင်းသည့် ဝင်ငွေခွန်အဖြစ် အမှတ်မှားလျက်အပြီး သတ်စည်းကြပ်မှုခံယူခြင်းမရှိခြင်း၊ အမြတ်အစွန်းရရှိမှု ရှိ မရှိ သေချာမှုမရှိချိန်တွင် ကြိုတင်အခွန်ပေးဆောင်ထားရခြင်းကြောင့် လုပ်ငန်းလည်ပတ်ရာတွင် ငွေသားစီးဆင်းမှု အဆင်မပြေဖြစ်ခြင်းများ ကြုံတွေ့နေရကြောင်း သိရသည်။
“တစ်လမှာ သုံးကြိမ်ကုန်သွယ်မှု လုပ်မယ်ဆိုရင် တစ်နှစ်ကို ၃၆ ကြိမ် ကုန်သွယ်မှုရှိမယ်ပေါ့။ အဲဒီမှာ တစ်ကြိမ်ကုန်သွယ်မှုလုပ်တိုင်း အခွန်နှစ်ရာခိုင်နှုန်းကို ကြိုတင်ပြီး ကောက်ထားတဲ့အတွက် ၃၆ ကြိမ်ကုန်သွယ်မှု လုပ်မယ်ဆိုရင် အရင်းထဲက ၇၂ ရာခိုင်နှုန်းပါသွားမယ်။ ကြိုတင်ခွန် ဆောင်နေရတဲ့အတွက် အရင်းထဲက ပဲ့ပဲ့ပါသွားတယ်။ အမြတ်မသေချာဘဲ အရင်းထဲကပါနေတော့ လုပ်ငန်းတွေလည်ပတ်မှုပါ ထိခိုက်တယ်” ဟု လုပ်ငန်းရှင်တစ်ဦးက ဆိုသည်။
