အွန်လိုင်းတွင် ပျံ့နှံ့နေသည့် ချမ်းမြေ့မောင်ချို ဆေးကုသမှုခံယူနေရပုံကို တွေ့ရစဉ်
Myanmar Idol သီချင်းဆိုပြိုင်ပွဲ၏ Top 2 Finalist တစ်ဦးဖြစ်သူ ပြိုင်ပွဲဝင် ချမ်းမြေ့မောင်ချိုသည် ကျန်းမာရေး အခြေအနေ ထိခိုက်ခံစားရမှုရှိသဖြင့် ဆေးကုသမှု ခံယူရလျက်ရှိကြောင်း ချမ်းမြေ့မောင်ချို၏ မိခင်ဖြစ်သူ တေးသံရှင် အိအိက သြဂုတ် ၈ ရက် ညပိုင်းတွင် အတည်ပြု ပြောကြားသည်။
ပြိုင်ပွဲဝင် ချမ်းမြေ့မောင်ချိုသည် ကျန်းမာရေးအရ အားနည်းထိခိုက်နေသဖြင့် ဆေးကုသမှုခံယူပြီးနောက် သြဂုတ် ၁၁ ရက်တွင် ကျင်းပမည့် နောက်ဆုံးအဆင့်ပြိုင်ပွဲအတွက် သီချင်းတိုက်လေ့ကျင့်မှု သွားရောက်ပြုလုပ်ရာတွင် တေးသီချင်း သီဆိုနိုင်ခြင်းမရှိဘဲ ကျန်းမာရေး အခြေအနေ ဆိုးရွားခဲ့သဖြင့် ဆေးကုမှု ထပ်မံခံယူနေရခြင်းဖြစ်ကြောင်း သိရသည်။
“သူက ကျန်းမာရေးမကောင်းလို့ ဒရစ်နှစ်လုံးချိတ်ပြီး Final အတွက် သီချင်းတိုက်ဖို့ သွားတာပါ။ သီချင်းမဆိုနိုင်ဘဲ ကျန်းမာရေး ပိုဆိုးလာတော့ ကိုဥက္ကာတို့က ဆေးခန်းတစ်ခု လိုက်ပြတယ်လို့ သိရပါတယ်။ သူက Camp သွင်းတဲ့အထဲမှာပဲ ရှိနေတာဆိုတော့ အန်တီလည်း သူ့အခြေအနေသိရဖို့ ဖုန်းစောင့်နေပါတယ်” ဟု ချမ်းမြေ့မောင်ချို၏မိခင် တေးသံရှင် အိအိက ဆိုသည်။
ပြိုင်ပွဲဝင် ချမ်းမြေ့မောင်ချိုသည် Myanmar Idol သီချင်းဆိုပြိုင်ပွဲတွင် အသက်အငယ်ဆုံး ပြိုင်ပွဲဝင်တစ်ဦးအဖြစ် ဆန်ခါတင်ပြိုင်ပွဲဝင် ၁၁ ဦးစာရင်းတွင် ပါဝင်ခွင့်ရခဲ့သူဖြစ်သည်။ ချမ်းမြေ့မောင်ချိုသည် အပတ်စဉ်မတူ ကွဲပြားသည့် Theme များဖြင့် ယှဉ်ပြိုင်ရာတွင် ပရိသတ်ပေးသည့် Voting ဖြင့် အဆင့်ဆင့် တက်လှမ်းခွင့်ရရှိကာ Top 2 Finalist တစ်ဦး အဆင့်အထိ တက်ရောက်လာခဲ့သူဖြစ်သည်။ ချမ်းမြေ့မောင်ချိုသည် ကိုယ်ပိုင်ဟန်ဖြင့် တေးသီချင်းများအား သီဆိုတတ်သူတစ်ဦးအဖြစ် ပရိသတ်အားပေးမှု အခိုင်အမာ ရရှိထားကာ အကဲဖြတ်ဒိုင်များအနက် တေးသံရှင်မျိုးကျော့မြိုင်၊ တင်ဇာမော်နှင့် ရန်အောင်တို့၏ ချီးကျူးသည့် မှတ်ချက်စကားများ မကြာခဏ ရရှိထားသူလည်းဖြစ်သည်။ Top 3 Finalist ပွဲစဉ်တွင် ချမ်းမြေ့မောင်ချို သီဆိုသည့် တေးသီချင်း စာသားအနည်းငယ် ကျန်ရှိခဲ့မှုကြောင့် ပရိသတ်အချို့၏ ဝေဖန်မှုကိုလည်း ခံနေရသူဖြစ်သည်။
ချမ်းမြေ့မောင်ချိုသည် သြဂုတ် ၁၁ ရက်တွင် ပြုလုပ်မည့် Grand Final ပြိုင်ပွဲတွင် ဖြိုးမြတ်အောင်နှင့် ယှဉ်ပြိုင်ရမည်ဖြစ်ကာ ယခုပြိုင်ပွဲအတွက် လေ့ကျင့်မှုများ ပြုလုပ်နေစဉ်တွင် ကျန်းမာရေးဆိုးရွားမှုကြောင့် ဆေးကုသမှု ခံယူနေရခြင်းဖြစ်သည်။
