<

တရုတ်-မြန်မာနယ်စပ်ရှိ နယ်စပ်စီးပွားရေး ပူးပေါင်းဆောင်ရွက်မှုဇုန်တွင် မြန်မာလုပ်ငန်းရှင်များ ပါဝင်ရင်းနှီးမြှုပ်နှံရန် ပြည်ထောင်စုဝန်ကြီး တိုက်တွန်း

မြန်မာ-တရုတ်နယ်စပ်ရှိ မူဆယ် ၁၀၅ မိုင်ကုန်သွယ်ရေးစခန်း တစ်နေရာကို တွေ့ရစဉ် (ဓာတ်ပုံ-ထွန်းနေလှိုင်)

တရုတ်-မြန်မာနယ်စပ်တွင် နယ်စပ်စီးပွားရေးဇုန် တစ်ခုကို မကြာမီ အကောင်အထည် ဖော်တော့မည်ဖြစ်ပြီး အဆိုပါ စီးပွားရေးဇုန်တွင် မြန်မာလုပ်ငန်းရှင်များ ပါဝင်ရင်းနှီးမြှုပ်နှံရန် စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

“နိုင်ငံတော်အနေနဲ့ တခြားဇုန်တွေလည်း အကောင်အထည်ဖော်ဖို့ ရှိပါတယ်။ အထူးသဖြင့် တရုတ်-မြန်မာ နယ်ခြားဒေသ နှစ်ဖက်မှာ ကချင်ပြည်နယ်နယ်စပ်နဲ့ ရှမ်းပြည်နယ်နယ်စပ် ကျယ်ပြန့်တဲ့နေရာမှာ ယူနန်ပြည်နယ် နှစ်ဖက်နယ်စပ်မှာ နှစ်ဖက်မျက်နှာချင်းဆိုင် Trading and processing Zone တွေ တည်ထောင်ဖို့ မနှစ်က နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တရုတ်ပြည်သွားတုန်းက လက်မှတ်ထိုးထားတာ ရှိပါတယ်။ အဲဒါကို အကောင်အထည် ဖော်ဖို့အတွက် လုပ်ငန်းဆိုင်ရာ ဗဟိုကော်မတီလည်း ဖွဲ့စည်းထားပြီ ဖြစ်ပါတယ်။ ဒီကော်မတီအနေနဲ့ သက်ဆိုင်ရာ ၀န်ကြီးဌာနတွေ ကချင်ပြည်နယ် အစိုးရနှင့် ရှမ်းပြည်နယ် အစိုးရတွေနဲ့ တိုင်ပင်ပြီး မကြာမီ အကောင်အထည်ဖော်ဖို့ ရှိပါတယ်” ဟု စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောကြားသည်။

“အဲဒီနေရာမှာလည်း လုပ်ငန်းရှင်များက ပါဝင်ရင်းနှီးမြှုပ်နှံနိုင်သလို အကြံဥာဏ်တွေလည်း ပေးမယ်ဆိုရင် လုပ်ငန်းတွေ အောင်မြင်စွာ အကောင်အထည် ဖော်နိုင်မှာ ဖြစ်ပါတယ်။ သီလ၀ါ အထူးစီးပွားရေးဇုန်သာမက  တခြားဇုန်တွေမှာလည်း ရင်းနှီးမြှုပ်နှံနိုင်မယ့် အခွင့်အလမ်းကောင်းတွေ ရှိတယ်ဆိုတာ သတင်းပေး လိုပါတယ်” ဟု ဒေါက်တာသန်းမြင့်က ဆိုသည်။

မြန်မာ-တရုတ်နယ်စပ်တွင် နယ်စပ်စီးပွားရေးဇုန်များ တည်ဆောက်ပြီးပါက ပြည်တွင်းမှ တရုတ်နိုင်ငံသို့ တင်ပို့မည့် လယ်ယာထွက်ကုန်များကို အဆိုပါ စီးပွားရေးဇုန်အတွင်း ပြန်လည်ပြုပြင်ထုပ်ပိုး တင်ပို့သွားနိုင်မည် ဖြစ်ကြောင်း သိရသည်။

လက်ရှိအချိန်တွင် မြစ်ကြီးနား စီးပွားရေးဖွံ့ဖြိုးမှုဇုန်နှင့် ကန်ပိုက်တီးနယ်စပ် ဖွံ့ဖြိုးတိုးတက်ရေးဇုန်တို့ကို တည်ဆောက်သွားမည် ဖြစ်ကြောင်းနှင့် မြစ်ကြီးနားဒေသ စီးပွားရေး ဖွံ့ဖြိုးရေးဇုန်အတွင်း စက်မှုထုတ်ကုန်ကဏ္ဍကို လယ်ယာစိုက်ပျိုး မွေးမြူရေးအပိုင်း အဓိကထား၍ တန်ဖိုးမြှင့် အချောကိုင် လုပ်ငန်းများဖြစ်သော စက်မှုကုန်ထုတ်လုပ်ခြင်း၊ လယ်ယာထွက်ကုန် ထုတ်လုပ်ခြင်း၊ ခေတ်မီဆောက်လုပ်ရေး ပစ္စည်းများ အသေးစားစက်မှုကုန် ထုတ်လုပ်ခြင်း၊ ခရီးသွားကုန်စည် သယ်ယူပို့ဆောင်ခြင်းများ ပါဝင်ခြင်းကြောင့် ဒေသနှစ်ခု၏ ဈေးကွက်အရင်းအမြစ်များကို အကျိုးရှိစွာ ပေါင်းဆက်နိုင်မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ၀န်ကြီးဌာနမှ သိရသည်။

မြန်မ-တရုတ် နှစ်နိုင်ငံသည် တောတောင်ရေမြေချင်း ထိစပ်လျက်ရှိပြီး ကုန်စည်ကူးသန်းရောင်းဝယ်မှု အများဆုံး ပြုလုပ်လျက်ရှိကြောင်း၊ ကန်ပိုက်တီးနယ်စပ်ဒေသ ဖွံ့ဖြိုးတိုးတက်စေရန် ဆောင်ရွက်ခြင်းဖြင့် ကုန်သွယ်မှု ရင်းနှီးမြှုပ်နှံမှု ပူးပေါင်းဆောင်ရွက်မှု တိုးမြင့်လာကာ ဒေသနေပြည်သူများ အလုပ်အကိုင် အခွင့်အလမ်းများရရှိပြီး စီးပွားရေး ဖွံ့ဖြိုးတိုးတက်မည်ဖြစ်ကြောင်း၊ ကချင်ပြည်နယ်သည် သယံဇာတကြါယ်ဝပြီး မြေလွတ် မြေရိုင်းများ ပေါများမှုရှိခြင်းကြောင့် တစ်ဖက်နိုင်ငံမှ ငွေကြေးအရင်းအနှီးနှင့် နည်းပညာများကို ရင်းနှီးမြှုပ်နှံရန် ဖိတ်ခေါ်ပါကြောင်းလည်း ပြည်ထောင်စုဝန်ကြီးက ဆက်လက် ပြောကြားသည်။

 

October 2, 2018














Copy Protected by Chetan's WP-Copyprotect.