ပဲခူးတိုင်းဒေသကြီး အတွင်းရှိ ပဲခင်းအချို့အား တွေ့ရစဉ် (ဓာတ်ပုံ-မောင်အေး)

တိုင်းဒေသကြီးနှင့် ပြည်နယ်အချို့တွင် စပါး၊ ပဲမျိုးစုံနှင့် ပြောင်း အပါအဝင် သီးနှံများကို GAP (Good Agricultural Pratice) စိုက်နည်းစနစ်ဖြင့် စိုက်ပျိုးကာ ပြည်ပတင်ပို့နိုင်ရေး ဆောင်ရွက်လျက်ရှိကြောင်း  စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။

ပြည်တွင်း၌ GAP (Good Agricultural Pratice) စနစ်ဖြင့် စိုက်ပျိုးထားသော ကော်ဖီများသည် နိုင်ငံတကာ ဈေးကွက်သို့ ထိုးဖောက်နိုင်နေပြီဖြစ်ပြီး အရည်သွေးမြင့် ထုတ်ကုန်များ ထုတ်လုပ်ရန်အတွက် ကုန်ထုတ်လုပ်နိုင်မှုစွမ်းအား (Productivity) ကိုသာ ဆောင်ရွက်ရန် လိုအပ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပြည်ထောင်စုဝန်ကြီး ဒေါက်တာအောင်သူက ပြောကြားသည်။

လက်ရှိအချိန်တွင် ကယားပြည်နယ်အတွင်း ဘေးအန္တရယ်ကင်းရှင်းပြီး အရည်အသွေး ကောင်းမွန်သည့် နှမ်းများကို GAP နည်းစနစ်ဖြင့် စိုက်ပျိုးထုတ်လုပ်ကာ ပြည်ပဈေးကွက်သို့ ပိုမိုတင်ပို့နိုင်ရေး ဆောင်ရွက်လျက်ရှိကြောင်း သိရသည်။

မြန်မာနိုင်ငံ၏ အများဆုံးစားသုံးသီးနှံနှင့် ပြည်ပပို့ကုန် အများဆုံး သီးနှံ ၁၅ မျိုးအား စိုက်ပျိုးရေးဆိုင်ရာ အလေ့အကျင့် ကောင်းများကျင့်စဉ် (GAP) နှင့်အညီ စိုက်ပျိုးထုတ်လုပ်သွားရန် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ ထုတ်ပြန်ထားသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန အနေဖြင့် စိုက်ပျိုးရေးဆိုင်ရာ အလေ့အကျင့် ကောင်းများဖြင့် အန္တရာယ်ကင်းရှင်းပြီး အရည်အသွေး ပြည့်ဝကောင်းမွန်သော သီးနှံများ စိုက်ပျိုးထုတ်လုပ်ပြီး ဈေးကွက်တင်ပို့ ရောင်းချနိုင်ရေးအတွက် မြန်မာ GAP နည်းပညာလက်စွဲ (GAP Protocol) အား အစားအစာများ ဘေးအန္တရာယ်ကင်းရှင်းရေးကဏ္ဍ၊ ထုတ်ကုန်အရည်အသွေး ပြည့်ဝကောင်းမွန်ရေးကဏ္ဍ၊ ပတ်ဝန်းကျင် ထိခိုက်မှု လျော့နည်းရေးကဏ္ဍနှင့် လုပ်သားများ၏ ကျန်းမာရေးနှင့် လူမှုဘ၀ သာယာဝပြောရေးကဏ္ဍ စသည့် ကဏ္ဍကြီးလေးရပ်ပေါ် မူတည်၍ ပြုစုရေးဆွဲခဲ့ကြောင်း သိရသည်။

မြန်မာနိုင်ငံ၏ အများဆုံး စားသုံးသီးနှံနှင့် ပြည်ပပို့ကုန် အများဆုံးသီးနှံများ ဖြစ်သည့် သရက်၊ ကျွဲကော၊ သခွားမွှေး၊ ဖရဲ၊ ထောပတ်သီး၊ ငရုတ်၊ ခရမ်းချဉ်၊ ကြက်သွန်နီ၊ ဂေါ်ဖီထုပ်၊ အစေ့ထုတ်ပြောင်း၊ ပဲမျိုးစုံ (ပဲတီစိမ်း၊ မတ်ပဲ၊ ပဲလွမ်း)၊ နှမ်း၊ မြေပဲ၊ စပါးနှင့် ကော်ဖီစသည့် သီးနှံ ၁၅ မျိုးတို့၏ GAP ကျင့်စဉ်များအား ထုတ်ပြန်ဆောင်ရွက် ထားရှိပြီးဖြစ်ကြောင်း သိရသည်။

အများပြည်သူ ဘေးအန္တရာယ်ကင်းရှင်းပြီး အာဟာရပြည့်ဝသော သီးနှံများ စားသုံးနိုင်ရန်နှင့် ပြည်တွင်း/ပြည်ပ ဈေးကွက်သို့ တင်ပို့ရောင်းချနိုင်ရန်အတွက် တောင်သူလယ်သမားများ အပါအဝင် စိုက်ပျိုးထုတ်လုပ် ရောင်းချသူများ အနေဖြင့် မြန်မာစိုက်ပျိုးရေးဆိုင်ရာ အလေ့အကျင့်ကောင်းများ ကျင့်စဉ်နှင့်အညီ စိုက်ပျိုးထုတ်လုပ်သွားရန် လိုအပ်လျက်ရှိကြောင်း ထုတ်ပြန်ထားသည်။

မြန်မာနိုင်ငံ တစ်ဝန်းလုံးရှိ ပြည်သူများ ဘေးကင်းလုံခြုံသော စားနပ်ရိက္ခာများ ဖူလုံစွာ ရရှိရေးအတွက် ကျေးလက်နေ တောင်သူလယ်သမားများအား ပြည်ထောင်စုအစိုးရက အသိပညာ၊ နည်းပညာများ အထောက်အပံ့ အကူအညီပေးပြီး GAP (Good Agricultural Pratice) နည်းစနစ်ဖြင့် စိုက်ပျိုးထုတ်လုပ်နိုင်ရေး အဆိုကို အမျိုးသားလွှတ်တော်က မေလအတွင်းက အတည်ပြုခဲ့ကြောင်း သိရသည်။