၂၀၁၈ ခုနှစ် ဖေဖော်ဝါရီလကုန်အထိ မြန်မာနိုင်ငံသားရင်းနှီးမြှုပ်နှံမှု ကျပ် ၁၆၀၄၉ ဘီလျံကျော်ခွင့်ပြုထားပြီး အိမ်ခြံမြေဖွံ့ဖြိုးရေး၊ ပို့ဆောင်ဆက်သွယ်ရေး၊ ကုန်ထုတ်လုပ်မှု၊ ဟိုတယ်နှင့် ခရီးသွားလုပ်ငန်းနှင့် ဆောက်လုပ်ရေးလုပ်ငန်းကဏ္ဍတို့တွင် အများဆုံးမြှုပ်နှံထားကြောင်း မြန်မာနိုင်ငံရင်းနှီးမြှုပ်နှံမှုကော်မရှင်မှ ထုတ်ပြန်ထားသောစာရင်းများအရ သိရသည်။
မြန်မာနိုင်ငံသားရင်းနှီးမြှုပ်နှံသူများ၏ လုပ်ငန်း ၁၃၄၄ ခုကို လုပ်ငန်းကဏ္ဍ ၁၁ ခုတွင် ရင်းနှီးမြှုပ်နှံခွင့်ပြုထားခြင်းဖြစ်ပြီး စုစုပေါင်းပမာဏကျပ် ၁၆၅၁၉၂၄၈ ဒသမ ၆၃၆ သန်း (ကျပ် ၁၆၅၁၉ ဘီလျံကျော်) ရှိခြင်းဖြစ်သည်။
ကဏ္ဍအလိုက် မြန်မာနိုင်ငံသားများ ရင်းနှီးမြှုပ်နှံမှုများမှာ အိမ်ခြံမြေဖွံ့ဖြိုရေးကဏ္ဍတွင် ကျပ် ၃၉၈၀ ဒသမ ၅၁၁ ဘီလျံ (လုပ်ငန်း ၇၀ ခု)၊ ပို့ဆောင်ဆက်သွယ်ရေးကဏ္ဍတွင် ကျပ် ၂၈၁၀ ဒသမ ၇၃၁ ဘီလျံ (လုပ်ငန်း ၄၈ ခု)၊ ကုန်ထုတ်လုပ်မှုကဏ္ဍတွင် ကျပ် ၂၇၈၇ ဒသမ ၉၈၀ ဘီလျံ (လုပ်ငန်း ၇၈၀ ခု)၊ ဟိုတယ်နှင့်ခရီးသွားလာရေးကဏ္ဍတွင် ကျပ် ၁၇၁၈ ဒသမ ၅၁၂ ဘီလျံ (လုပ်ငန်း ၁၂၁ ခု)၊ ဆောက်လုပ်ရေးကဏ္ဍတွင် ကျပ် ၁၀၇၅ ဒသမ ၁၈၃ ဘီလျံ (လုပ်ငန်း ၆၈ ခု) တို့ဖြစ်သည်။
ထို့ပြင် စက်မှုဖွံ့ဖြိုးရေးကဏ္ဍတွင် ကျပ် ၇၉၇ ဒသမ ၈၅၁ ဘီလျံ (လုပ်ငန်း ၁၀ ခု)၊ စွမ်းအင်ကဏ္ဍတွင် ကျပ် ၆၂၈ ဒသမ ၉၄၈ ဘီလျံ (လုပ်ငန်း ၁၄ ခု)၊ သတ္တုတူးဖော်ရေးကဏ္ဍတွင် ကျပ် ၁၄၇ ဒသမ ၅၂၅ ဘီလျံ (လုပ်ငန်း ၆၅ ခု)၊ မွေမြူရေးနှင့်ရေလုပ်ငန်းကဏ္ဍတွင် ကျပ် ၈၃ ဒသမ ၃၂၀ ဘီလျံ (လုပ်ငန်း ၇၈ ခု)၊ စိုက်ပျိုးရေးကဏ္ဍတွင် ကျပ် ၅၁ ဒသမ ၁၉၃ ဘီလျံ (လုပ်ငန်း ၁၀ ခု) နှင့် အခြားကဏ္ဍတွင် ကျပ် ၂၄၃၇ ဒသမ ၄၉၁ ဘီလျံ (လုပ်ငန်း ၈၀ ခု) ရင်းနှီးမြှုပ်နှံခွင့်ပြုထားကြောင်း သိရသည်။
၂၀၁၅-၂၀၁၆ ဘဏ္ဍာနှစ်ကုန် (၂၀၁၆ မတ်လကုန်) အထိ မြန်မာနိုင်ငံသား ရင်းနှီးမြှုပ်နှံမှုပမာဏကျပ် ၁၁၆၂၄ ဘီလျံကျော်ရှိပြီး လက်ရှိအစိုးရတက်ရောက်ပြီး ၂၃ လကာလအတွင်း ကျပ် ၄၈၉၅ ဘီလျံဝန်းကျင် ရင်းနှီးမြှုပ်နှံခဲ့ခြင်းဖြစ်သည်။ ပြည်တွင်းလုပ်ငန်းရှင်များ၏ ရင်းနှီးမြှုပ်နှံမှုသည် အိမ်ခြံမြေဖွံ့ဖြိုးရေးကဏ္ဍတွင် အဓိကများပြားလာခဲ့ရာ ပြီးခဲ့သည့် ၂၀၁၇ ခုနှစ် ဇန်နဝါရီလမှစတင်ကာ ယခင်ပြည်တွင်းရင်းနှီးမြှုပ်နှံမှု အများဆုံးကဏ္ဍဖြစ်သော ကုန်ထုတ်လုပ်မှုကဏ္ဍကို ကျော်ဖြတ်ပြီး ထိပ်ဆုံးသို့ ရောက်ရှိလာခဲ့ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်မှ ထုတ်ပြန်ထားသောစာရင်းများအရ သိရသည်။
