ရွေး​ကောက်ပွဲအပိုင်း(၂)တွင် ပါဝင်သည့် မြို့နယ် ၁၀၀ အနက် ၅၂ မြို့နယ်တွင် ပြည်သူ့လွှတ်​တော်​ကိုယ်စားလှယ်​နေရာများ၌ ပြည်ခိုင်ဖြိုးပါတီက ၄၄ ​နေရာ၊ တစညပါတီက နှစ်​​နေရာနှင့် တိုင်းရင်းသားပါတီသုံးပါတီက ​​​ခြောက်နေရာအနိုင်ရရှိ​ကြောင်းUEC က ဇန်နဝါရီ ၁၅ ရက်တွင် ထုတ်ပြန်သည်။

UEC ၏ ထုတ်ပြန်ချက်အရ ၅၂ မြို့နယ်တွင် ပြည်ခိုင်ဖြိုးပါတီက ၄၄ ​နေရာ၊ ကချင်ပြည်နယ်ပြည်သူ့ပါတီက တစ်​နေရာ၊ ကရင်အမျိုးသားဒီမိုကရက်တစ်ပါတီက တစ်​နေရာ၊ တိုင်းရင်းသားစည်လုံး ညီ​ညွတ်​ရေးပါတီက နှစ်​​နေရာ၊ မွန်ညီညွတ်​ရေးပါတီက ​လေး​နေရာ အနိုင်ရရှိခဲ့ခြင်းဖြစ်သည်။

တိုင်းရင်းသားစည်းလုံးညီညွတ်​ရေးပါတီသည် မြို့သစ်နှင့် ​စေတုတ္ထရာ ပြည်သူ့လွှတ်​တော်မဲဆန္ဒနယ်တွင်လည်း​ကောင်း၊ ကချင်ပြည်နယ်ပြည်သူ့ပါတီသည် မချမ်း​ဘောမြို့နယ် ပြည်သူ့လွှတ်​တော်မဲဆန္ဒနယ်တွင်လည်း​ကောင်း၊ ကရင်အမျိုးသားဒီမိုကရက်တစ်ပါတီသည် လှိုင်းဘွဲ့ပြည်သူ့လွှတ်​တော်မဲဆန္ဒနယ်တွင်လည်း​ကောင်း၊ မွန်ညီညွတ်​ရေးပါတီသည် မုဒုံ၊ သံဖြူဇရပ်၊ ​ရေးနှင့် ​ပေါင် ပြည်သူ့လွှတ်​တော်မဲဆန္ဒနယ်တွင်လည်း​ကောင်း အသီးသီယအနိုင်ရရှိခဲ့ခြင်းဖြစ်သည်။

​ထို့ပြင် ရွေး​ကောက်ပွဲအပိုင်း(၂)တွင်ပါဝင်သည့် မြို့နယ် ၁၀၀ အနက် မင်းကင်း၊ ဝန်းသို၊​မော်လိုက်၊ ​ရေဦး၊​ရေဖြူနှင့် ဂန့်​ဂေါမြို့နယ် စုစု​ပေါင်း ​​ခြောက်မြို့နယ်တွင် ပြည်ခိုင်ဖြိုးပါတီက ကိုယ်စားလှယ်​လောင်းများသာ အမည်စာရင်းတင်သွင်းယှဉ်ပြိုင်ထားပြီး ယှဉ်ပြိုင်ဘက်မရှိသဖြင့် ယင်း​ခြောက်မြို့နယ်ရှိ ပြည်သူ့လွှတ်​တော်မဲဆန္ဒနယ်များတွင် ပြည်ခိုင်ဖြိုးပါတီ လွှတ်​တော်ကိုယ်စားလှယ်​လောင်းများက ကိုယ်စားလှယ်များအဖြစ် ​ရွေး​ချယ်တင်​မြှောက်ခံရသူများဖြစ်​ကြောင်း UEC က ယခင်ကတည်းက ထုတ်ပြန်ထားသဖြင့် လက်ရှိထုတ်ပြန်ထားမှုများအရ ပြည်ခိုင်ဖြိုးပါတီသည် ​ရွေး​ကောက်ပွဲအပိုင်း(၂)တွင် ပြည်သူ့လွှတ်​တော် ​နေရာ ၅၀ ရရှိထားသည်။

၂၀၂၅ ခုနှစ် ဒီဇင်ဘာ ၂၈  ရက်ကကျင်းပခဲ့သည့် ရွေးကောက်ပွဲအပိုင်း(၁) ပြည်သူ့လွှတ်တော်မဲဆန္ဒနယ် ၁၀၂ ခုတွင် ပြည်ခိုင်ဖြိုးပါတီက ၈၉ နေရာအနိုင်ရရှိပြီး  တိုင်းရင်းသားစည်းလုံးညီညွတ်ရေးပါတီက နှစ်​နေရာ၊ ပအိုဝ်းအမျိုးသားအဖွဲ့ချုပ်(PNO)ပါတီ​သုံးနေရာ၊ နာဂအမျိုးသားပါတီက ​လေးနေရာ၊ ရှမ်းနီ(တိုင်းလျန်)သွေးစည်း ညီညွတ်ရေးပါတီက တစ်​နေရာ၊ ရခိုင်တိုင်းရင်းသားများပါတီက တစ်​နေရာ၊ မွန်ညီညွတ်ရေးပါတီက တစ်​နေရာ၊ ရှမ်းနှင့် တိုင်းရင်းသားများဒီမိုကရက်တစ်ပါတီ(ကျားဖြူပါတီ)က လင်းခေးမြို့နယ်တွင်တစ်​နေရာ အနိုင်ရရှိထားသည်။

ထို့အတူ UEC ၏ ဇန်နဝါရီ ၈ ရက်​အထိထုတ်ပြန်ထားသည့် စာရင်းများအရ ​ရွေး​ကောက်ပွဲအပိုင်း(၁)တွင် အမျိုးသားလွှတ်​တော်မဲဆန္ဒနယ်များတွင် ပြည်ခိုင်ဖြိုးပါတီက ၂၁ နေရာ၊"ဝ" အမျိုးသားပါတီတစ်​နေရာ၊ ဇိုမီးအမျိုးသားပါတီက သုံး​နေရာ၊  ရခိုင့်ဦး​ဆောင်ပါတီက သုံး​​နေရာ၊ ရခိုင်တိုင်းရင်းသားများပါတီက တစ်​နေရာ၊ နာဂအမျိုးသားပါတီကတစ်​နေရာ၊ မွန်ညီညွတ်​ရေးပါတီတစ်​နေရာ အနိုင်ရရှိထားသည်။