PSG အသင်း၏ နည်းပြဖြစ်သူ သောမတ်စ်တူဟယ်လ်က အသင်း၏ ပြင်သစ်လူငယ်ကြယ်ပွင့် ဘာပေ၏ဒဏ်ရာမှာ အလျင်အမြန်သက်သာလာသော်လည်း မိမိအနေဖြင့် စွန့်စားမည်မဟုတ်ကြောင်း ပြောကြားခဲ့သည်။ 

အသက် (၂၁)နှစ်အရွယ်ရှိ ဘာပေသည် ဇူလိုင်လ (၂၄)ရက်က ကစားခဲ့သည့် ပြင်သစ်ဖလား ဗိုလ်လုပွဲ PSG (၁-၀) စိန့်အက်တီယန်ပွဲတွင် ခြေချင်းဝတ်ဒဏ်ရာရရှိခဲ့ပြီး ပွဲချိန် (၃၃)မိနစ်၌ ဆရာဘီယားနှင့် လူစားလဲခဲ့ရသည်။ 

ဘာပေအနေဖြင့် အဆိုပါဒဏ်ရာကြောင့် အနည်းဆုံး (၃)ပတ်ခန့် အနားယူရမည်ဟု ခန့်မှန်းခဲ့ကြသော်လည်း ၎င်းသည် လက်ရှိတွင်အသင်းနှင့်အတူ လေ့ကျင့်ခန်းဆင်းနေပြီဖြစ်ကြောင်း သိရသည်။ 

PSG အသင်းသည် ချန်ပီယံလိဂ်ကွာတားဖိုင်နယ်ပွဲစဉ်အဖြစ် သြဂုတ်လ (၁၂)ရက်တွင် အတ္တလန်တာအသင်းနှင့် ကစားရမည်ဖြစ်ပြီး အသင်းနည်းပြ တူဟယ်လ်က ဘာပေကို အလျင်အလိုအသုံးပြုသွားမည်မဟုတ်ကြောင်း ပြောကြားခဲ့ခြင်းဖြစ်သည်။ 

တူဟယ်လ်က "သူ သက်သာလာတာက ခန့်မှန်းထားတာထက် ပိုမြန်ပါတယ်။  အသင်းဆရာဝန်တွေနဲ့  စကားပြောပြီး၊ အတ္တလန်တာနဲ့ပွဲမှာ အရန်ခုံပေါ်မှာ ရှိသင့်၊ မသင့်ကို ဆုံးဖြတ်သွားပါမယ်။ ဒါပေမဲ့ ကျွန်တော် အများကြီး မမျှော်လင့်ထားပါဘူး။ စွန့်စားပြီးလည်း အသုံးမပြုချင်ပါဘူး"ဟု ပြောကြားခဲ့သည်။ 

ဘာပေသည် ယခုရာသီတွင် PSG အသင်းအတွက် ပြိုင်ပွဲစုံ (၃၄)ပွဲတွင် ဂိုး (၃၀) အထိ သွင်းယူထားပြီး ချန်ပီယံလိဂ် (၇)ပွဲတွင် (၅)ဂိုး သွင်းယူပေးထားသည်။