ဂျူဗင်တပ်စ်အသင်းသည် ယခုရာသီကုန်တွင် မန်ယူအသင်းနှင့် စာချုပ်သက်တမ်းကုန်ဆုံးမည့် နယ်သာလန်လူငယ်တောင်ပံကစားသမား တာဟစ်ချောင်အား ခေါ်ယူရန် စောင့်ကြည့်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။ 

အသက် (၁၉)နှစ်အရွယ်ရှိ တာဟစ်ချောင်သည် ယခုရာသီကုန်တွင် စာချုပ်သက်တမ်းကုန်ဆုံးမည်ဖြစ်ပြီး မန်ယူအသင်းက စာချုပ်သက်တမ်းတိုးရန် ကြိုးစားနေသော်လည်း လက်ရှိအချိန်အထိ သဘောတူညီမှုမရသေးကြောင်း သိရသည်။ 

တာဟစ်ချောင်အား ခေါ်ယူရန် ဂျူဗင်တပ်စ်အသင်းအပါအဝင် ဥရောပထိပ်တန်းအသင်းများစွာက စိတ်ဝင်စားနေကြပြီး မန်ယူအသင်းအနေဖြင့် ပေါ့ဘာကို ဆုံးရှုံးခဲ့ရသည့်အဖြစ်မျိုးနှင့် ရင်ဆိုင်ရဖွယ်ရှိနေကြောင်း Daily Mail က သုံးသပ်ခဲ့သည်။ 

ပြင်သစ်ကွင်းလယ်လူ ပေါ့ဘာသည် ၂၀၁၂ ခုနှစ်တွင် မန်ယူအသင်းမှ ဂျူဗင်တပ်စ်အသင်းသို့ ပြောင်းရွှေ့့ကြေးအလွတ်ဖြင့် ပြောင်းရွှေ့သွားခဲ့ပြီး နောက် (၄)နှစ်အကြာတွင် မန်ယူအသင်းက ၎င်းကို ပေါင် (၈၉)သန်းဖြင့် ပြန်လည်ဝယ်ယူခဲ့ရသည်။ 

တာဟစ်ချောင်သည် ၂၀၁၆ ခုနှစ်တွင် နယ်သာလန်ကလပ် ဖီယင်နုအသင်းမှ မန်ယူအသင်းသို့ ပြောင်းရွှေ့ခဲ့သူဖြစ်ပြီး ၂၀၁၈ ခုနှစ်တွင် အသင်းအတွက် စတင်ကစားခွင့်ရခဲ့ကာ ပြိုင်ပွဲစုံ (၈)ပွဲ ပါဝင်ကစားပေးထားကြောင်း သိရသည်။