မြေပုံမှတ်တမ်းများကို ယခင်က စာအုပ်နှင့်မြေပုံစနစ်ဖြင့်သာ ဆောင်ရွက်ခဲ့ပြီး လက်ရှိတွင် ကွန်ပျူတာမှတ်တမ်းတင် မြေပုံစနစ်ဖြင့် ပြောင်းလဲနိုင်ရေး ဆောင်ရွက်နေကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးလှကျော်၏ ပြောကြားချက်အရ သိရသည်။
နေပြည်တော်တွင် သြဂုတ် ၉ ရက်ကကျင်းပသည့် ပြည်သူ့လွှတ်တော် အစည်းအဝေး၌ ရန်ကင်းမဲဆန္ဒနယ်မှ လွှတ်တော်ကိုယ်စားလှယ် ဒေါ်ဇင်မာအောင်၏ “နိုင်ငံတော်စီမံကိန်းများ ရေးဆွဲခြင်း၊ မြို့ပြနှင့် အိမ်ရာဖွံ့ဖြိုးတိုးတက်မှု၊ မြေယာစီမံခန့်ခွဲအုပ်ချုပ်မှုများ ဆောင်ရွက်ရာတွင် မြေယာမှတ်ပုံတင်ခြင်းနှင့် မြေပုံစနစ်ကို မည်သည့်စနစ်ဖြင့် မည်ကဲ့သို့ စီစဉ်ဆောင်ရွက်နေကြောင်း သိလိုခြင်း” မေးခွန်းကို ဒုတိယဝန်ကြီး ဦးလှကျော်ကဖြေရာတွင် အထက်ပါကဲ့သို့ထည့်သွင်း ပြောကြားခဲ့ခြင်းဖြစ်သည်။
“မြို့ပြနှင့် အိမ်ရာဖွံ့ဖြိုးရေးဦးစီးဌာနဟာ မြေယာမှတ်ပုံတင်ခြင်းစနစ်ကို မြို့မြေစာရင်းမှတ်ပုံတင်စာအုပ် (Town Land Roll) နဲ့ ဦးပိုင်မှတ်ပုံတင်စာရင်း (၁-က) (Register 1A) တို့ကိုအသုံးပြု၍ မှတ်တမ်းထိန်းသိမ်းပါတယ်။ မြေပုံမှတ်တမ်းစနစ်ကို ဗြိတိသျှအတိုင်းအတာစနစ်ကို အသုံးပြုပြီး မှတ်တမ်းထိန်းသိမ်းခြင်း ဖြစ်ပါတယ်။ အဆိုပါမှတ်တမ်းတွေကို စာအုပ်နဲ့မြေပုံစနစ်ဖြင့်သာ ယခင်ကဆောင်ရွက်ခဲ့ပြီးတော့ ယခုအခါမှာတော့ (Computerize) ကွန်ပျူတာမှတ်တမ်း တင်မြေပုံစနစ်ဖြင့် ပြောင်းလဲနိုင်ရေးကို ဆောင်ရွက်နေပြီဖြစ်ကြောင်း ရှင်းလင်းဖြေကြားအပ်ပါတယ်” ဟု ဒုတိယဝန်ကြီး ဦးလှကျော်က ပြောကြားသည်။
မြေပုံနှင့်စာရင်းများကို အခြေခံ၍ လယ်ယာကဏ္ဍဆိုင်ရာ ကိန်းဂဏန်းအချက်အလက်များ၊ မြေအသုံးချမှုစာရင်းများပြုစုခြင်း လုပ်ငန်းများကို ဆောင်ရွက်လျက်ရှိကြောင်း၊ သာမန်မြေတိုင်းတာခြင်းနည်းလမ်းဖြင့် တိုင်းတာပုံထုတ် အသုံးပြုလျက်ရှိသောကွင်း၊ အကွက်မြေပုံများကို ခေတ်မီမြေတိုင်းနည်းပညာဖြင့် Digital မြေပုံပြောင်းလဲရေးဆွဲ ထုတ်လုပ်လျက်ရှိပြီး ခွင့်ပြုရန်ပုံငွေအပေါ်မူတည်၍ စီမံချက်များ ချမှတ်အကောင်အထည်ဖော် ဆောင်ရွက်လျက်ရှိကြောင်း၊ ၂၀၁၀-၂၀၁၁ ခုနှစ်မှ ၂၀၁၆-၂၀၁၇ ခုနှစ်ထိ ကွင်းပေါင်း ၂၁၀၉၈ ကွင်း၊ ဧရိယာ ၁၁၅၁၆၇၉၆ ဧကအား တိုင်းတာရေးဆွဲဆောင်ရွက်ခဲ့ပြီးဖြစ်ကြောင်း ဒုတိယဝန်ကြီးကဆိုသည်။
မြေပုံရေးဆွဲနိုင်ရေးအတွက် မြေတိုင်းတာရာတွင် သာမန်မြေတိုင်းတာခြင်း နည်းလမ်း၊ ခေတ်မီမြေတိုင်းကိရိယာများနှင့် မြေတိုင်းတာခြင်းနည်းလမ်း၊ ဂြိုဟ်တုဓာတ်ပုံများ အသုံးပြု၍ မြေပုံရေးဆွဲခြင်းနည်းလမ်းများကို အသုံးပြုဆောင်ရွက်နေကြောင်းလည်း ဒုတိယဝန်ကြီးဦးလှကျော်က ဆိုသည်။
Writer - ငြိမ်းဇော်လင်း၊ မျိုးမင်းထက်
