မိုဘိုင်းတယ်လီဖုန်း သုံးစွဲခအပေါ် ကုန်သွယ်လုပ်ငန်းခွန် ငါးရာခိုင်နှုန်း ကောက်ခံရာတွင် ဘဏ္ဍာနှစ် သုံးနှစ်အတွင်း MPT မှ ကျပ် ၁၁၈ ဘီလျံကျော်ဖြင့် အများဆုံးရရှိခဲ့ပြီး အူရီဒူးထံမှ အနည်းဆုံး ရရှိထားကြောင်း ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီမှ သိရသည်။
ပြည်ထောင်စုလွှတ်တော် ပြည်သူ့ငွေစာရင်း ပူးပေါင်းကော်မတီ၏ ၂၀၁၈ ခုနှစ် ဧပြီမှ စက်တင်ဘာအထိ ခြောက်လ၊ ပြည်ထောင်စုဝန်ကြီးဌာန/အဖွဲ့အစည်းများ၏ အခွန်ရငွေစာရင်းများနှင့် စပ်လျဉ်း၍ လေ့လာတွေ့ရှိချက်နှင့် သဘောထားမှတ်ချက် အစီရင်ခံစာတွင် ဖော်ပြထားမှုအရ MPT၊ တယ်လီနောနှင့် အူရီဒူးသုံးခုတွင် MPT က အများဆုံးဖြစ်ပြီး အူရီဒူးက ကုန်သွယ်လုပ်ငန်းခွန် ငါးရာခိုင်နှုန်း အနည်းဆုံး ပေးဆောင်ခဲ့ကြောင်း သိရသည်။
မြန်မာ့ဆက်သွယ်ရေး လုပ်ငန်းအနေဖြင့် ၂၀၁၆-၂၀၁၇ ဘဏ္ဍာနှစ်တွင် ကျပ် ၄၀၉၁၈ သန်း၊ ၂၀၁၇-၂၀၁၈ ဘဏ္ဍာနှစ်တွင် ကျပ် ၅၃၆၀၄ ဒသမ ၆၈၆ သန်းနှင့် ၂၀၁၈ ခြောက်လ ဘဏ္ဍာနှစ်တွင် ကျပ် ၂၃၈၂၄ ဒသမ ၈၉၉ သန်းဖြင့် ကျပ် ၁၁၈ ဘီလျံကျော် ပေးဆောင်ခဲ့သည်။
တယ်လီနောမြန်မာ ကုမ္ပဏီအနေဖြင့် ၂၀၁၆-၂၀၁၇ ဘဏ္ဍာနှစ်တွင် ကျပ် ၂၉၆၈၃ ဒသမ ၅၆၉ သန်း၊ ၂၀၁၇-၂၀၁၈ ဘဏ္ဍာနှစ်တွင် ကျပ်၂၈၂၀၁ ဒသမ ၆၉၀ သန်းနှင့် ၂၀၁၈ ခြောက်လဘဏ္ဍာနှစ်တွင် ကျပ် ၁၄၀၃၁ ဒသမ ၂၃၂ သန်းဖြင့် ကျပ် ၇၁ ဘီလျံ ကျော် ပေးဆောင်ခဲ့သည်။
အူရီဒူးမြန်မာ အနေဖြင့် ၂၀၁၆-၂၀၁၇ ဘဏ္ဍာနှစ်တွင် ကျပ် ၅၅၅၁ ဒသ ၁၉၉ သန်း၊ ၂၀၁၇-၂၀၁၈ ဘဏ္ဍာနှစ်တွင် ကျပ် ၁၅၆၇၉ ဒသမ ၅၀၈ သန်းနှင့် ၂၀၁၈ ခြောက်လဘဏ္ဍာ နှစ်တွင် ကျပ် ၆၀၃၂ ဒသမ ၆၆၈ သန်း ဖြင့် ကျပ် ၂၇ ဘီလျံကျော်သာ ပေးဆောင်နိုင်ခဲ့ကြောင်း သိရသည်။
အခြားတစ်ဖက်တွင် မြန်မာ့စီးပွားရေး ကော်ပိုရေးရှင်း အနေဖြင့်လည်း မိုဘိုင်းတယ်လီဖုန်း သုံးစွဲခအပေါ် ကုန်သွယ်လုပ်ငန်းခွန် ငါးရာခိုင်နှုန်းအဖြစ် ၂၀၁၆-၂၀၁၇ ဘဏ္ဍာနှစ်တွင် ကျပ် ၉၄၇ ဒသ ၄၆၃ သန်း၊ ၂၀၁၇-၂၀၁၈ ဘဏ္ဍာနှစ်တွင် ကျပ် ၁၁၁၇ ဒသမ ၇၈၁ သန်းနှင့် ၂၀၁၈ ခြောက်လဘဏ္ဍာ နှစ်တွင် ကျပ် ၃၄၅ ဒသမ ၄၄၉ သန်းဖြင့် ကျပ်သန်း ၂၄၁၀ ကျော် ပေးဆောင်ထားပြီး အဆိုပါ ကုမ္ပဏီလေးခုမှ ဘဏ္ဍာနှစ်သုံးနှစ်အတွင်း ကျပ်ဘီလျံ ၂၂၀ ခန့်ရရှိထားသည်။
