အမေရိကန်ပြည်ထောင်စုတွင် ၃၅ နှစ်အတွင်း အဆိုးရွားဆုံး ဝက်သက်ရောဂါ ကူးစက်ဖြစ်ပွားမှုနှင့် ရင်ဆိုင်နေရကြောင်း ဇူလိုင် ၂၄ ရက်က ထုတ်ပြန်ခဲ့သည့် တရားဝင်စာရင်းဇယားများအရ သိရသည်။

ကာကွယ်ဆေးထိုးနှံရန် တွန့်ဆုတ်မှုများ မြင့်တက်လာခြင်းနှင့်အတူ ရောဂါကူးစက်ဖြစ်ပွားမှုများ သိသိသာသာ တိုးပွားလာနေချိန်တွင် ထိုကဲ့သို့ တရားဝင်စာရင်းဇယား ထွက်ပေါ်လာခြင်းဖြစ်သည်။

၂၀၂၆ ခုနှစ် စတင်ချိန်မှစ၍ ကူးစက်လွယ်သော အဆိုပါ ရောဂါကူးစက်ခံရသူ အတည်ပြုလူနာ ၂,၃၁၈ ဦးရှိကြောင်း ရောဂါထိန်းချုပ်ရေးနှင့် ကာကွယ်ရေးဗဟိုဌာန (CDC) ၏ ထုတ်ပြန်ချက်အရ သိရသည်။

ထိုအရေအတွက်သည် ကလေးငယ်နှစ်ဦး အပါအဝင် သုံးဦးသေဆုံးခဲ့ပြီး ရောဂါဖြစ်ပွားသူ ၂,၂၈၉ ဦးဖြင့် စံချိန်တင်ခဲ့သော ၂၀၂၅ ခုနှစ်၏ စာရင်းထက်ပင် ကျော်လွန်သွားခဲ့ပြီဖြစ်သည်။

"ကျွန်တော်တို့ဟာ ကလေးသူငယ်တွေကို အချိုးအစားမမျှဘဲ ပိုမိုထိခိုက်စေတဲ့ ရှောင်လွှဲလို့ရတဲ့ အကျပ်အတည်းတစ်ခုကို မြင်တွေ့နေရတာဖြစ်ပါတယ်" ဟု အမေရိကန် ကလေးကျန်းမာရေးဆိုင်ရာ အကယ်ဒမီ (American Academy of Pediatrics) ၏ ဥက္ကဋ္ဌ အန်ဒရူး ရေဆင်းက ပြောကြားခဲ့သည်။

"ဒါကို ကျွန်တော်တို့ရဲ့ ပုံမှန်ဖြစ်ရမယ့် အခြေအနေအသစ်အဖြစ် လက်မခံသင့်ပါဘူး"ဟု ဆက်လက်ပြောကြားခဲ့သည်။

ဝက်သက်ရောဂါသည် ဖျားနာခြင်း၊ အသက်ရှူလမ်းကြောင်းဆိုင်ရာ ရောဂါလက္ခဏာများနှင့် အရေပြားပေါ်တွင် အနီကွက်များ ထွက်ခြင်းတို့ကိုဖြစ်ပေါ်စေသည်။

အချို့သောအခြေအနေများတွင် အဆုတ်ရောင်ရောဂါနှင့် ဦးနှောက်ရောင်ခြင်း အပါအဝင် ပိုမိုပြင်းထန်သော နောက်ဆက်တွဲ ပြဿနာများကို ဖြစ်ပေါ်စေနိုင်ပြီး ယင်းမှတစ်ဆင့် ရေရှည်ဆိုးကျိုးများနှင့် သေဆုံးမှုအထိ ဖြစ်ပွားနိုင်သည်။

၂၀၀၀ ပြည့်နှစ်တွင် ကာကွယ်ဆေးထိုးနှံမှုများကြောင့် အမေရိကန်၌ ဝက်သက်ရောဂါ ကင်းစင်သွားပြီဟု ကြေညာခဲ့သည်။

သို့သော် လတ်တလောနှစ်များအတွင်း ကာကွယ်ဆေးထိုးနှံမှု နှုန်းထားများ လျော့ကျလာခြင်းနှင့် ကျန်းမာရေးဆိုင်ရာ အာဏာပိုင်များအပေါ် ယုံကြည်မှုကင်းမဲ့လာခြင်းတို့ကြောင့် ရောဂါပြန်လည်ဦးမော့လာခဲ့သည်။

အမေရိကန်သမ္မတ ဒေါ်နယ်ထရန့်၏ ကျန်းမာရေးဝန်ကြီး ရောဘတ် အက်ဖ် ကနေဒီ ဂျူနီယာသည် ကာကွယ်ဆေး ဆန့်ကျင်ရေး သဘောထားများကို ဖြန့်ဝေခြင်းနှင့် သေချာစွာ လေ့လာစမ်းသပ်ပြီး ထိရောက်မှုရှိကြောင်း သက်သေပြပြီးသား ကာကွယ်ဆေးများအပေါ် စိုးရိမ်ထိတ်လန့်မှုများဖြစ်ပေါ်စေခြင်းတို့ဖြင့် ယခုအကျပ်အတည်းတွင် အဓိကပါဝင်ပတ်သက်နေသည်ဟု စွပ်စွဲခံထားရသည်။

အမေရိကန်ပြည်ထောင်စုတွင် ယခုကဲ့သို့ ဝက်သက်ရောဂါ ကူးစက်မှုအရေအတွက် အများဆုံးကြုံတွေ့ခဲ့ရသည့် နောက်ဆုံးအကြိမ်မှာ ၁၉၉၁ ခုနှစ်ကဖြစ်ပြီး လူနာပေါင်း ၉,၆၄၃ ဦးအထိ စာရင်းရှိခဲ့သည်။

ကာကွယ်ဆေးနှစ်ကြိမ် ထိုးနှံသည့်စနစ်ကို ပုံမှန်အတိုင်း စတင်ကျင့်သုံးခဲ့ပြီးနောက် အမှုအခင်းများ သိသိသာသာ လျော့ကျသွားခဲ့သည်။

၁၉၆၀ ပြည့်လွန်နှစ်များ အစောပိုင်းတွင် ဝက်သက်ကာကွယ်ဆေး မပေါ်ပေါက်မီက အမေရိကန်ပြည်ထောင်စု၌ နှစ်စဉ် ကလေးငယ် ရာပေါင်းများစွာ ဝက်သက်ရောဂါကြောင့် သေဆုံးခဲ့ရသည်။

ယခုအခါတွင်လည်း တစ်ကမ္ဘာလုံးအတိုင်းအတာဖြင့် လူပေါင်း သောင်းပေါင်းများစွာ၏ အသက်ကို ဆက်လက် ခြိမ်းခြောက်လျက်ရှိသည်။

Ref: AFP

Photo: AFP