ကလေး - တမူးလမ်းကြောင်း ပြန်လည်ထိန်းချုပ် ဖွင့်လှစ်နိုင်ရေးဆောင်ရွက်နေသည့် တပ်မတော်စစ်ကြောင်းများက PDF များယာယီစိုးမိုးထားသော ရာဇဂြိုဟ်ကျေးရွာနှင့် ရာဇဂြိုဟ်ရေလှောင်တမံအား ပြန်လည်ထိန်းချုပ်ရရှိခဲ့ကြောင်း သိရသည်။
အဆိုပါ ကလေး-တမူးလမ်းကြောင်းတစ်လျှောက်အား ပြန်လည်ထိန်းချုပ်ဖွင့်လှစ်ပေး နိုင်ရေးအတွက် တပ်မတော်စစ်ကြောင်းများက ဇွန် ၇ ရကမှစတင်၍ ကလေးဘက်မှ လည်းကောင်း၊ တမူးဘက်မှလည်းကောင်း စစ်ကြောင်းများအသီးသီးခွဲကာ နယ်မြေရှင်းလင်းခြင်းလုပ်ငန်းများကို အဆင့်ဆင့်ဆောင်ရွက်ခဲ့ရာ ဇွန် ၁၃ ရက် ညနေပိုင်းတွင် ကလေးဘက်မှ နယ်မြေရှင်းလင်းလာသော စစ်ကြောင်းသည် ရာဇဂြိုဟ်ကျေးရွာအား ပြန်လည်သိမ်းပိုက် ထိန်းချုပ်နိုင်ခဲ့ပြီး ဇွန် ၁၄ ရက်တွင်လည်း ရာဇဂြိုဟ် ရေလှောင်တမံအား ပြန်လည်သိမ်းပိုက်ထိန်းချုပ်နိုင်ခဲ့ကြောင်းသိရသည်။
ရာဇဂြိုလ်ရေလှောင်တမံသည် စစ်ကိုင်းတိုင်းဒေသကြီး၊ ကလေးမြို့နယ် မြောက်ပိုင်းရှိ ရာဇဂြိုလ်ကျေးရွာအနီးတွင်တည်ရှိကာ ကဘော်ချိုင့်ဝှမ်းဒေသအတွင်း စိုက်ပျိုးရေ ပေးဝေရေး၊ လျှပ်စစ်ဓါတ်အားထုတ်လုပ်ရေးတို့အတွက် ရည်ရွယ်ဆောက်လုပ်ထားသည့် တာတမံ ဖြစ်ပြီး ၂၀၀၃-၂၀၀၄ ခုနှစ်မှ စတင်တည်ဆောက်ခဲ့ရာ ၂၀၁၅-၂၀၁၆ ခုနှစ်တွင် အောင်မြင်စွာပြီးစီးခဲ့သဖြင့် ၂၀၁၆ ခုနှစ်၊ ဖေဖော်ဝါရီ ၂၇ ရက်တွင် စတင်လည်ပတ်ခဲ့ကာရာဇဂြိုလ် ရေလှောင်တမံ၏ လျှပ်စစ်ဓါတ်အားထုတ်လုပ်မှုအနေဖြင့် စက်တပ်စွမ်းအား ၄ မဂ္ဂါဝပ်ရှိပြီး ရေလှောင်နိုင်စွမ်းမှာ ၅၂၀၀၀ ဧကပေရှိသဖြင့် စိုက်ပျိုးမြေဧရိယာ ၈၀၀၀ ဧကကို ရေပေးဝေ နိုင်သဖြင့် ဒေသခံပြည်သူလူထု၏ လူမှုစီးပွားဘဝကို ဖွံ့ဖြိုးတိုးတက်အောင် တစ်ဘက်တစ်လမ်း မှ အထောက်အကူပြုလျက်ရှိကြောင်း သိရသည်။
ထို့ပြင် သောင်းကျန်းသူများအနေဖြင့် ရာဇဂြိုလ်ရေလှောင်တမံအား ထိန်းချုပ် ထားစဉ်အတွင်း အဆိုပါရေလှောင်တမံကြီး၌ ဘန်ကာများ၊ ပစ်ကျင်းများပြုလုပ်၍ စစ်စခန်း အဖြစ် အသုံးပြုလျက်ရှိသည့်အပြင် ပြည်သူများ၏ လျှပ်စစ်မီးရရှိရေး၊ သောက်သုံးရေရရှိရေး၊ စိုက်ပျိုးရေးရေရရှိရေးများအတွက် ထောက်ထားငဲ့ညှာမှုမရှိဘဲ ၎င်းတို့ကိုယ်ကျိုးစီးပွား အတွက်သာ လိုအပ်သလို အသုံးချပြီး ရေထိန်းတံခါးများအား ဖွင့်ခြင်း/ပိတ်ခြင်းများ ဆောင်ရွက်ခဲ့သဖြင့် ပတ်ဝန်းကျင်ကျေးရွာနေပြည်သူများ လျှပ်စစ်မီးမရရှိခြင်း၊ သောက်သုံးရေ ဖူလုံစွာ မရရှိခြင်းနှင့် စိုက်ပျိုးရေ ဖူလုံစွာမရရှိခြင်းများ ဖြစ်ပေါ်ခဲ့ရကြောင်းသျရသည်။
တပ်မတော်စစ်ကြောင်းများအနေဖြင့် ယခုကဲ့သို့ PDF များ ယာယီစိုးမိုး ထိန်းချုပ်ထားခဲ့သည့် ရာဇဂြိုလ်ရေလှောင်တမံအား ပြန်လည်ထိန်းချုပ်နိုင်ခဲ့ခြင်းကြောင့် ရေထိန်းတံခါးများအား ပုံမှန်ချိန်အတိုင်း စနစ်တကျ ဖွင့်/ပိတ်ခြင်း၊ ရေထိရေလှောင်ခြင်း၊ ရာသီအလိုက် စနစ်တကျရေပေးဝေခြင်း၊ ရေလွှတ်ခြင်းများဆောင်ရွက်ပြီး ဒေသခံပြည်သူများအတွက် လျှပ်စစ်မီးများ၊ သောက်သုံးရေများ၊ စိုက်ပျိုးရေများ ဖူလုံစွာရရှိအောင် ဆောင်ရွက်နိုင်တော့မည်ဖြစ်ကြောင်း သိရသည်။
PDF ပူးပေါင်းအဖွဲ့များသည် ကလေး-တမူး လမ်းကြောင်းတစ်လျှောက်အား ယာယီစိုးမိုးထားစဉ်အတွင်း ၎င်းလမ်း ကြောင်းတစ်လျှောက်၌ သွားလာနေကြသည့် ကုန်တင်ယာဉ်များနှင့် ခရီးသွားယာဉ်များအား ငွေကြေးများကောက်ခံခြင်း၊ လက်နက်ဖြင့် ခြိမ်းခြောက်အကျပ်ကိုင်ခြင်း၊ ဖမ်းဆီးသတ်ဖြတ်ခြင်း၊ မော်တော်ယာဉ်များအား မီးရှို့ဖျက်ဆီးခြင်း၊ ကုန်ပစ္စည်းများအား လုယက်ယူဆောင်ခြင်းစသည့် လုပ်ရပ်များကို လုပ်ဆောင်လျက်ရှိရာ ကုန်စည်စီးဆင်းမှုများ နှောင့်နှေးခဲ့ရပြီး ဒေသခံပြည်သူများအနေဖြင့် လူသုံးကုန်နှင့် စားသောက်ကုန်များကို ဈေးနှုန်းကြီးမြင့်စွာ ဝယ်ယူစားသုံးနေရပြီး လူမှုစီးပွားဘဝများ အနိမ့်ဆုံးသို့ကျဆင်းခဲ့ရသည်ဟု တပ်မတော်၏ သတင်းထုတ်ပြန်မှုတွင် ဖော်ပြထားသည်။
ထို့ပြင် PDF များသည် လမ်းကြောင်းတစ်လျှောက်ရှိကျေးရွာများအတွင်းဝင်ရောက်၍အတင်းအဓမ္မ လူသစ်စုဆောင်းခြင်း၊ ငွေကြေးကောက်ခံခြင်း၊ ပြည်သူလူထု၏နေအိမ်များ၊ ဘာသာရေးဆိုင်ရာအဆောက်အအုံများ၊ စာသင်ကျောင်းများ၌ သဲအိတ်များအသုံးပြု၍ ဘန်ကာများဆောက်လုပ်ခြင်း၊ ဆက်သွယ်ရေးမြောင်းများ၊ ပစ်ကျင်းများ တူး၍ စစ်စခန်းအဖြစ်အသုံးပြုပြီး ယာယီခံစစ်ဆင်ကာ တပ်မတော်စစ်ကြောင်းများအား ပစ်ခတ် တိုက်ခိုက်ခဲ့ကြောင်းသိရသည်။
အလားတူ PDF များသည် ကျေးရွာများအတွင်း တိုက်ပွဲများဖော်ဆောင်ရန်အတွက် ရာဇဂြိုဟ်ကျေးရွာရှိ ပြည်သူလူထု၏နေအိမ်များ၌ သဲအိတ် များ၊ တာယာကွင်းများ အသုံးပြု၍ ဘန်ကာများဆောက်လုပ်ကာ ပစ်ကျင်းများတူး၍ စစ်စခန်း အဖြစ် အသုံးပြုပြီး ယာယီခံစစ်ဆင်ထားသည်ကိုလည်း တွေ့ရှိရပြီး ယခုအခါ တပ်မတော်စစ်ကြောင်းများက ဒေသတွင်း ပြည်သူများ စိတ်အေးချမ်းသာစွာဖြင့် နေထိုင်လုပ်ကိုင်စားသောက်နိုင်ရန်အတွက် ကလေး-တမူးလမ်းကြောင်းကို အမြန်ဆုံးပြန်လည် ထိန်းချုပ်ဖွင့်လှစ်နိုင်ရေး သောင်းကျန်သူများအား တိုက်ခိုက်ချေမှုန်းနိုင်ရေး နယ်မြေ လုံခြုံရေးလုပ်ငန်းများကို အရှိန်အဟုန်မြှင့် ဆက်လက်ဆောင်ရွက်သွားမည်ဖြစ်ကြောင်း သိရသည်။
