ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီနှင့် ဘယ်လာရုစ်နိုင်ငံ ဘယ်လာယာရပ်စ်ပါတီအကြား ပါတီချင်းပူးပေါင်းဆောင်ရွက်ရေးဆိုင်ရာ လုပ်ငန်းစဉ်များ လက်မှတ်ရေးထိုးပွဲကို ယနေ့(ဇန်နဝါရီ ၂၂ ရက်)တွင် ရန်ကုန်မြို့ရှိ Sky Star ဟိုတယ်တွင် ပြုလုပ်ခဲ့သည်။
အဆိုပါ လက်မှတ်ရေးထိုးပွဲတွင် ပြည်ခိုင်ဖြိုးပါတီဥက္ကဌ ဦးခင်ရီနှင့် ပါတီဒုတိယဥက္ကဌများဖြစ်သည့် ဦးလှထွန်း၊ ဦးမြတ်ဟိန်း၊ ပါတီဗဟိုအလုပ်အမှုဆောင်များဖြစ်သည့် ဦးမောင်မြင့်၊ ဦးခင်မောင်စိုး၊ ဦးအောင်စိုးတို့ တက်ရောက်ပြီး ဘယ်လာယာရပ်စ်ပါတီဥက္ကဌ H.E.Ms Olga Chemodanova ဦးဆောင်သော ရွေးကောက်ပွဲအပိုင်း(၃)လေ့လာရေး ကိုယ်စားလှယ်အဖွဲ့ဝင်များ တက်ရောက်ခဲ့သည်။
တွေ့ဆုံပွဲတွင် နှစ်ဖက်ပါတီတာဝန်ရှိသူများသည် ဦးစွာသီးခြားတွေ့ဆုံဆွေးနွေးခဲ့ပြီးနောက် ပါတီနှစ်ရပ်အကြား ပူးပေါင်းဆောင်ရွက်ရေးဆိုင်ရာ လုပ်ငန်းစဉ်များကို ပြည်ခိုင်ဖြိုးပါတီဥက္ကဌ ဦးခင်ရီနှင့် ဘယ်လာယာရပ်စ်ပါတီဥက္ကဌ H.E.Ms Olga Chemodanova တို့က လက်မှတ်ရေးထိုးလဲလှယ်ခဲ့ကြသည်။
ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီနှင့် ဘယ်လာယာရပ်စ်ပါတီတို့သည် နှစ်ပါတီ ပူးပေါင်းဆောင်ရွက်ရေးဆိုင်ရာ သဘောတူညီချက်ကို ပြည်ခိုင်ဖြိုးပါတီ ဥက္ကဌဦးခင်ရီသွားရောက်ခဲ့သည် ဘယ်လာရုစ်နိုင်ငံ ခရီးစဉ်အတွင်း ၂၀၂၅ ခုနှစ် မေ ၁၆ ရက်က မင့်စ်မြို့၌ လက်မှတ်ရေးထိုးခဲ့ခြင်းဖြစ်သည်။
ပြည်ခိုင်ဖြိုးပါတီဥက္ကဌ ဦးခင်ရီက"အကြမ်းဖျင်းအားဖြင့် ကျွန်တော်တို့က နိုင်ငံတော်အစိုးရမဟုတ်ဘူးလေ။ နိုင်ငံရေးပါတီဆိုတော့ နိုင်ငံရေးပါတီနှစ်ရပ်အကြားပူးပေါင်းဆောင်ရွက်ရေးပေါ့။ ဥပမာအားဖြင့် လူငယ်ကဏ္ဍ ပူးပေါင်းဆောင်ရွက်ရေး၊ အမျိုးသမီးကဏ္ဍ ပူးပေါင်းဆောင်ရွက်ရေး၊ မီဒီယာ ကဏ္ဍ ပူးပေါင်းဆောင်ရွက်ရေး အဆင့်ဆင့်သောပါတီဝင်များပေါ့။ မြို့နယ်၊ ခရိုင်၊ တိုင်း အဆင့်ဆင့်သော ပါတီဝင်များ အပြန်အလှန် အမြင်ချင်းဖလှယ်ရေးစတဲ့ အချက်တွေ၊ အဲဒီတော့နှစ်နိုင်ငံပြည်တွင်းရေးကိုဝင်ရောက်မစွက်ဖက်ဘဲနဲ့ နှစ်နိုင်ငံရဲ့တည်ဆဲဥပဒေတွေကို လိုက်နာခြင်းအားဖြင့်ဆိုတဲ့အချက်ကို မူတည်ပြီးမှ (၂၀၂၅ ခုနှစ် မေလအတွင်းက)လက်မှတ်ထိုးခဲ့တယ်" ဟု ပြောကြားသည်။
ယင်းသို့ လက်မှတ်ရေးထိုးခဲ့သည့်သဘောတူညီချက်အပေါ် အကောင်အထည်ဖော်မည့် Roadmap ပါ လုပ်ငန်းစဉ်များအား ယခုဆက်လက်၍ လက်မှတ်ရေးထိုးခဲ့ခြင်းဖြစ်သည်။
"လက်မှတ်ထိုးထားတဲ့ MoU ကလုပ်ငန်းတွေအကောင်အထည်ဖော်နိုင်ရေးဆွေးနွေးတာပေါ့။ လူငယ်ကဏ္ဍပူးပေါင်းဆောင်ရွက်ဖို့အတွက်၊ သူတို့က နွေဦးရာသီပေါ့ဗျာ။ ဒီချိန်မှာအေးတာပေါ့။ နွေဦးရာသီကစပြီးတော့ လူငယ်တွေအချင်းချင်းနှီးနှောဖလှယ်ပွဲတွေလုပ်ဖို့၊ အွန်လိုင်းအချင်းချင်းလုပ်ဖို့၊ လူအချင်းချင်းတွေ့ဖို့ ပြန်လှန်လည်ပတ်ဖို့ကိစ္စတွေ ဆွေးနွေးတယ်။ ကျွန်တော်တို့ MoU မှာပါတဲ့အချက်အလက်တွေကို ပြန်ပြီးတော့ အသေးစိတ်ဆွေးနွေးတာပေါ့၊ သို့သော်လည်း အချိန်ကာလသတ်မှတ်ချက်တော့ ချလို့မရဘူး။ အခြေအနေအချိန်ခါပေါ်မူတည်ပြီးပြောင်းသွားမယ့် သဘောပေါ့"ဟု ပြည်ခိုင်ဖြိုးပါတီဥက္ကဌ ဦးခင်ရီက ပြောကြားသည်။
ဘယ်လာယာရပ်စ်ပါတီသည် ဘယ်လာရုစ်နိုင်ငံတွင် လက်ရှိအာဏာရပါတီဖြစ်ပြီး ဇန်နဝါရီ ၂၅ ရက်တွင် မြန်မာနိုင်ငံ၌ ကျင်းပမည့် ရွေးကောက်ပွဲအပိုင်း(၃)တွင် လေ့လာရန်ရောက်ရှိလာခြင်းလည်း ဖြစ်သည်။
