ဘာစီလိုနာဆိုတာ လာလီဂါရဲ့ အင်အားကြီးအသင်းတစ်သင်းဖြစ်သလို၊ ချန်ပီယံလိဂ်ပြိုင်ပွဲမှာလည်း ဆုဖလား ၅ ကြိမ် ရရှိထားတဲ့အသင်းပါ။ ဘောလုံးလောကမှာ မသိသူမရှိတဲ့ နာမည်ကျော်အသင်းလည်း ဖြစ်ပါတယ်။ ခေတ်အဆက်ဆက် ကမ္ဘာကျော်ကစားသမားများစွာကို ပိုင်ဆိုင်ခဲ့ပြီး ကမ္ဘာ့အကောင်းဆုံးဘောလုံးသမား မက်ဆီ ဦးဆောင်တဲ့ ခေတ်မှာတော့ ကမ္ဘာ့အကောင်းဆုံးအသင်းအဖြစ်ပါ သတ်မှတ်ခံခဲ့ရပါတယ်။ ဒါပေမဲ့ အဲဒီလို ဘာစီလိုနာအသင်း အထွတ်အထိပ်ရောက်နေတဲ့ အချိန်ကာလမှာတောင် ဒုက္ခပေးနိုင်တဲ့ အသင်းတစ်သင်းရှိပါတယ်။ ဂျာမန်ဘီလူးလို့ တင်စားကြတဲ့ ဘိုင်ယန်မြူးနစ်အသင်းပါ။ ဘိုင်ယန်မြူးနစ်က ဘာစီလိုနာအတွက်တော့ ဘီလူးအသင်းမဟုတ်ပါဘူး။ တစ္ဆေအသင်းပါ။ ချောက်ချားအောင် အမြဲခြောက်လှန့်နိုင်တဲ့ တစ္ဆေအသင်းပါ။ ဘာကြောင့်လဲဆိုတော့ ထိပ်တိုက်ဆုံတွေ့တဲ့ ပွဲတိုင်းနီးပါး ဘာစီလိုနာအသင်းကို ထိုးနှက်အနိုင်ယူလေ့ရှိတဲ့အသင်း ဖြစ်နေလို့ပါပဲ။ သူတို့က ချန်ပီယံလိဂ်ပြိုင်ပွဲမှာ စုစုပေါင်း ၁၃ ပွဲ ဆုံတွေ့ခဲ့ဖူးပြီး ဘာစီလိုနာအသင်းက ၂ ပွဲသာအနိုင်ရကာ ၁၀ ပွဲအထိ ရှုံးနိမ့်ခဲ့ပါတယ်။ ဒါဟာ ဘာစီလိုနာအသင်း ရင်ဆိုင်ခဲ့ဖူးသမျှ ပြည်ပပြိုင်ဘက်တွေထဲမှာ အကြိမ်အများဆုံးအရှုံးပေးထားရတဲ့ မှတ်တမ်းပါ။