သြဂုတ် ၂၃ ရက်က ကိယက်ဗ်မြို့သို့ ပထမဆုံးသွားရောက်သည့် ခရီးစဉ်၌ အိန္ဒိယဝန်ကြီးချုပ် နရင်ဒရာမိုဒီက နှစ်နှစ်ကျော်ကြာမြင့်နေပြီဖြစ်သည့် ယူကရိန်း-ရုရှားစစ်ပွဲအား သံတမန်နည်းလမ်းဖြင့်ဖြေရှင်းရန်ထပ်မံ တိုက်တွန်းခဲ့ပြီး ငြိမ်းချမ်းရေးအတွက် အခိုင်အမာ ရပ်တည်ကြောင်း ၎င်းက ပြောကြားခဲ့သည်။

အစဉ်အလာမဟာမိတ် ရုရှားနိုင်ငံသို့ သွားရောက်ခဲ့သည့် ခရီးစဉ်အတွင်း ရုရှားသမ္မတ ဗလာဒီမာပူတင်နှင့် ပွေ့ဖက်နှုတ်ဆက်ခဲ့သည့်အတွက် ယူကရိန်း၏ ပြစ်တင်ရှုတ်ချခြင်းခံရပြီးနောက် သီတင်းပတ်များအကြာတွင် မိုဒီအနေဖြင့် ယူကရိန်းသို့ သွားရောက်ခဲ့ခြင်းဖြစ်သည်။

ယူကရိန်းတပ်ဖွဲ့ဝင်များက ရုရှား၏ ကာ့စ်ဒေသအား အကြီးစားကျူးကျော်တိုက်ခိုက်မှု လုပ်ဆောင်လျက်ရှိပြီး ရုရှားစစ်တပ်ကလည်း ယူကရိန်းအရှေ့ပိုင်းတွင် ထိုးဖောက်ချီတက်လျက်ရှိစဉ် မိုဒီ၏ ယူကရိန်းခရီးစဉ် ပေါ်ပေါက်လာခြင်းဖြစ်သည်။

သြဂုတ် ၂၃ ရက်က ယူကရိန်းသို့ သွားရောက်သည့် အိန္ဒိယဝန်ကြီးချုပ်တစ်ဦး၏ ပထမဆုံးခရီးစဉ်အတွင်း ယူကရိန်းသမ္မတ ဗိုလိုဒီမာဇယ်လန်းစကီးနှင့် တွေ့ဆုံစဉ် မိုဒီက ဇယ်လန်းစကီးအား ပွေ့ဖက်နှုတ်ဆက်ခဲ့ပြီး ရုရှား၏ ကျူးကျော်မှုအတွင်း သေဆုံးခဲ့သော ကလေးငယ်များအား အောက်မေ့သတိရသည့်အနေဖြင့် တစ်မိနစ်ကြာ ငြိမ်သက်ခဲ့သည်။

မိုဒီ၏ အစိုးရသည် ၂၀၂၂ ခုနှစ် ဖေဖော်ဝါရီလတွင် ရုရှားက ယူကရိန်းအား ကျူးကျော်ခဲ့ခြင်းကို ပေါ်ပေါ်ထင်ထင် ပြစ်တင်ရှုတ်ချခဲ့ခြင်းမရှိဘဲ မတူကွဲပြားမှုများကို စေ့စပ်ဆွေးနွေးခြင်းဖြင့်သာ ဖြေရှင်းရန် နှစ်ဖက်စလုံးကို တိုက်တွန်းခဲ့သည်။

ရုရှားသည် စစ်အေးခေတ်နောက်ပိုင်း  အိန္ဒိယနှင့် ဆက်ဆံရေးအခိုင်အမာတည်ဆောက်ခဲ့ပြီး ၂၀၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို စစ်ပွဲဆင်နွှဲပြီးနောက် အိန္ဒိယသည် ရုရှား၏ အရေးပါသော ကုန် သွယ်ဖက်နိုင်ငံ ဖြစ်လာခဲ့သည်။

“မိမိတို့ဟာ အစကတည်းက ကြားနေမဟုတ်ဘဲ တစ်ဖက်တည်းမှာ ရပ်တည်ခဲ့ပါတယ်။ မိမိတို့ဟာ ငြိမ်းချမ်းရေးအတွက် ခိုင်ခိုင်မာမာ ရပ်တည်ပါတယ်”ဟု မိုဒီကဇယ်လန်းစကီးအား ပြောကြားခဲ့သည်။

စစ်မြေပြင်၌ မည်သည့်ပြဿနာကိုမှ ဖြေရှင်း၍ရမည်မဟုတ်ကြောင်း မိုဒီကအစောပိုင်းတွင် ပြောကြားထားသည်။

အိန္ဒိယအနေဖြင့် ယူကရိန်းအတွက် လူသားချင်းစာနာမှု အကူအညီများ ထောက်ပံ့မည်ဖြစ်ကာ လူသားချင်းစာနာမှု ရှုထောင့်အရ မည်သည့်အကူအညီ လိုအပ်သည်ဖြစ်စေ၊ အိန္ဒိယက အဆွေတော်တို့ဘက်တွင် အမြဲရပ်တည်မည်ဖြစ်ကြောင်းလည်း ၎င်းက ကတိပြုခဲ့ကြောင်း သိရသည်။

ယူကရိန်းသမ္မတ ဇယ်လန်းစကီးကလည်း မိုဒီ၏ခရီးစဉ်သည် သမိုင်းဝင်အခိုက် အတန့်ဖြစ်သည်ဟု ဆိုသည်။

အိန္ဒိယက နိုင်ငံတကာဥပဒေများနှင့်အညီ အခိုင်အမာ ကတိပြုထားဆဲဖြစ်ကာ ယူကရိန်း၏ အချုပ်အခြာအာဏာနှင့် နယ်မြေတည်တံ့ခိုင်မြဲမှုကို ထောက်ခံအားပေးမှုသည် မိမိတို့အတွက် အရေးပါကြောင်း သြဂုတ် ၂၃ ရက် ညနေခင်းက ပြောကြားခဲ့သည့် မိန့်ခွန်းတွင် ဇယ်လန်းစကီးက ပြောကြားခဲ့ပြီး မိုဒီထံမှ အာမခံချက်များရရှိခဲ့ခြင်း ရှိမရှိကိုမူ ထည့်သွင်းပြောကြားခဲ့ခြင်း မရှိပေ။

Ref: AFP