ဇူလိုင် ၁၃ ရက် လုပ်ကြံရန် ကြိုးပမ်းမှုအတွင်း နားဒဏ်ရာရခဲ့ပြီးနောက် အများပြည်သူရှေ့မှောက်သို့ ပထမဆုံးထွက်လာရာတွင် ညာဘက်နားကို ပတ်တီးစီးထားသော ဒေါ်နယ်ထရန့်သည် ဇူလိုင် ၁၅ ရက်တွင် ရီပတ်ဘလီကင် အမျိုးသား ညီလာခံကျင်းပသည့် Fiserv Forum ဘက်စကတ်ဘောကွင်းထဲကို ဝင်ရောက်လာသည့်အခါ သူရဲကောင်းအဖြစ် ကြိုဆိုခံခဲ့ရသည်။

ရီပတ်ဘလီကင်ပါတီကတင်သည့် သမ္မတလောင်းအဖြစ် တရားဝင်ရွေးချယ်ခံရပြီး လက်ယာစွန်း အထက်လွှတ်တော်အမတ် ဂျေဒီဗန့်ကို ဒုတိယသမ္မတလောင်းအဖြစ် ကြေညာခဲ့ပြီးနောက် နာရီပိုင်းအတွင်းတွင် ထရန့်သည် လက်ထောက်များခြံရံလျက် မဝါကီ၏ Fiserv Forum ဘက်စကတ်ဘောကွင်းသို့ လှမ်းဝင်လာခဲ့ပြီး  အောင်ပွဲခံတွေ့ဆုံပွဲဟု မျှော်လင့်ရသည့် ညီလာခံအဖွင့်ပွဲနေ့၌ ပရိသတ်များကို လက်ဝှေ့ယမ်းခဲ့သည်။

ဇူလိုင် ၁၈ ရက်တွင် တရားဝင်လက်ခံမိန့်ခွန်းကို မြွက်ကြားမည့် ထရန့်သည် ကျေးလက်အဆိုတော် ဂရင်းဝုဒ်၏ မျိုးချစ်နာမည်ကြီးသီးချင်းဖြစ်သော God Bless the USA သီချင်းသံဖြင့် ထိုင်ခုံတွင် ဝင်ထိုင်လိုက်သည် ဆိုသော်လည်း တစ်စုံတစ်ရာပြောကြားမရှိပေ။ သို့ရာတွင် လူအပြည့်လာရောက်သော ကွင်းထဲတွင် ရွှန်းရွှန်းစားစား သြဘာပေးခံရခြင်းကြောင့် ထရန့်သည် စိတ်လှုပ်ရှားနေပုံပေါ်သည်။

“တော်တော်လေး အံ့အားသင့်စရာကောင်းပါတယ်။ သူဟာ တကယ်အလေးထား လို့ဒီကိုရောက်လာတယ်ဆိုတာ တကယ်အံ့အားသင့်စရာပါ” ဟု အီလီနွိုက်ကိုယ်စားလှယ် ဆူဆန်ဆွီနေးက အေအက်ဖ်ပီကို ပြောကြားခဲ့သည်။

ထရန့်က အသက် ၃၉ နှစ်အရွယ် ဗန့်ကို ၎င်း၏ဒုတိယသမ္မတအဖြစ် ကြေညာလိုက်သောအခါ ရီပတ်ဘလီကင်ထောက်ခံသော လူအုပ်ကြီးက သြဘာပေးခဲ့သည်။ ဗန့်သည် တစ်ခါက ထရန့်ကို ပြင်းပြင်းထန်ထန်ဝေဖန်ခဲ့သူဖြစ်သည်ဆိုသော်လည်း ယခုအခါ ၎င်းသည် ထရန်၏အမာခံတစ်ဦးဖြစ်လာသည်။

အသက် ၇၈ နှစ်အရွယ် ထရန့်သည် အိမ်ဖြူတော်သို့ တကျော့ပြန်လာရန် ယုံကြည်မှုတိုးလာသည့်တိုင် သမ္မတဂျိုးဘိုင်ဒင်မှာ ကျန်းမာရေးအခြေအနေကြောင့် လူထုသဘောထားစစ်တမ်းများတွင် လူကြိုက်နည်းနေပြီး ဒီမိုကရက်တို့၏စိုးရိမ်မှုများလည်း ရှိနေသည်။

ထရန့်လက်ထက်တွင် ရှေ့တန်းရောက်လာသည့် လူထုအကြိုက်ဝါဒသစ်အမျိုးအစားအတွက် ရှေ့ဆောင်လမ်းပြဖြစ်လာသည့် ဗန့်သည် ခေတ်သစ်သမိုင်းတွင် အတွေ့အကြုံ အနည်းဆုံး ဒုတိယသမ္မတတစ်ဦးအဖြစ် အရွေးခံရခြင်းပင်ဖြစ်သည်။

သို့ရာတွင် ၎င်းသည် သမ္မတဟောင်း၏ အထီးကျန်မူဝါဒ၊ အမေရိကဦးစားပေးသည့်     ရွှေ့ပြောင်းဆန့်ကျင်လှုပ်ရှားမှုတို့ကို လက်ခံသူဖြစ်သည့်အပြင် အချို့သောကိစ္စများတွင် ထရန့်ထက်ပင် လက်ယာဘက်ပိုရောက်သူဖြစ်သည်။

ဗန့်သည် ၎င်း၏(အမေရိကန်အရှေ့ပိုင်း) အပါလာချီယန်မိသားစုအကြောင်း ရေးထားသည့် ၂၀၁၆ ကိုယ်တွေ့မှတ်တမ်း Hillbilly Elegy စာအုပ်နှင့် နောက်ကျကျန်နေသော အမေရိက၌ ကျေးလက်နှင့် အလုပ်သမားလူတန်းစားတို့၏ မကျေနပ်မှုအသံများကို ဖော်ပြထားသော Rust Belt စာအုပ်တို့ဖြင့် ထင်ရှားခဲ့သောစာရေးဆရာတစ်ဦးဖြစ်သည်။