![Photo: CJ](https://news-eleven.com/sites/news-eleven.com/files/styles/news_detail_image/public/news-images/pppp_1.jpg?itok=vdv6QaQM)
ပြင်ဦးလွင်မြို့ရှောင်လမ်းတွင် ဓားဒဏ်ရာအများအပြားဖြင့် သေဆုံးနေသည့် အိမ်ခြံမြေပွဲစား အမျိုးသမီးတစ်ဦး၏ အလောင်းတွေ့ရှိခဲ့ကြောင်း ပြင်ဦးလွင်ဒေသခံများထံမှ သိရသည်။
မန္တလေးတိုင်းဒေသကြီး ပြင်ဦးလွင်မြို့ မြို့ရှောင်လမ်းပေါ်တွင်ဇွန် ၁၀ ရက် နံနက် ၈ နာရီခွဲကျော်က အဆိုပါအမျိုးသမီး၏ အလောင်းကို တွေ့ရှိခဲ့ခြင်းဖြစ်သည်ဟု ပြင်ဦးလွင်မြို့ရှိ လူမှုကူညီရေးအသင်းများနှင့် နီးစပ်သူတစ်ဦးက ပြောကြားသည်။
“အဲဒီနေ့က ကျွန်တော်တို့အသင်းက မသွားရဘူး။ ဒါကြောင့် ဖြစ်စဉ်ကိုတော့ သေချာမသိရဘူး။ ဒီနေ့မနက်(ဇွန် ၁၃ ရက်)တော့ အိမ်ခြံမြေဝယ်ရောင်းပွဲစားတွေနဲ့ လက်ဖက်ရည်ဆိုင်မှာဆုံဖြစ်တော့ ဘယ်လိုဖြစ်တာလဲဆိုပြီး တီးခေါက်ကြည့်ဖြစ်သေးတယ်။ သူတို့ ပြောတာကမေမြို့မြေလောကက အရှုပ်ကြီးတဲ့”ဟု လူမှုကူညီရေးလုပ်ကိုင်သူမြို့ခံတစ်ဦးက ပြောကြားသည်။
သေဆုံးသူ အမျိုးသမီးအား ၎င်း၏ကားပေါ်တွင် ဓားဒဏ်ရာ ၁၃ ချက်ဖြင့် သေဆုံးနေသည်ကို တွေ့ရှိခဲ့ရပြီး ၎င်းမှာဒေသခံအိမ်ခြံ မြေလောကမှမဟုတ်ကြောင်း ပြင်ဦးလွင်မြို့ခံအချို့ထံမှ သိရသည်။
“ ခုမေမြို့မြေလောကမှာက မုံရွာတို့ မန္တလေးတို့ဘက်က ပွဲစားတွေ အခြေချလာကြတာ အများကြီး။ ခုဖြစ်သွားတဲ့ အမျိုးသမီးကမြို့ခံမဟုတ်ဘူး။ ခုကိစ္စကလည်း သိန်းသောင်းကြီးပိုင်းအရောင်းအဝယ်တစ်ခုကို ကျော်ခွသွားလို့ဆိုတာမျိုး ကြားရတယ်။ ဘာကြောင့်ဆိုတာတော့ သေချာဂဃနဏ မသိရဘူးပေါ့။ ဖမ်းမိတာလည်း မကြားရသေးဘူး ” ဟု မေမြို့မြို့ခံတစ်ဦးက ပြောကြားသည်။
သေဆုံးသူအမျိုးသမီးတွင် သားနှင့်သမီးနှစ်ဦး ကျန်ရစ်ခဲ့ပြီး ၎င်း၏ ခန္ဓာကိုယ်တွင်ဝတ်ဆင်ထားသည့် လက်ဝတ်ရတနာများနှင့် ငွေကြေးများကို ကျူးလွန်သူများက ယူဆောင်သွားခြင်းမရှိကြောင်း မီဒီယာအချို့တွင် ဖော်ပြ ထားသည်။ ဖြစ်စဉ်နှင့် ပတ်သက်ပြီး သက်ဆိုင်ရာက စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။