လီဗာပူးလ်အသင်း၏ အီဂျစ်တိုက်စစ်ကစားသမား ဆာလာသည် အသင်းအတွက် ကစားခဲ့သည့် (၇)ရာသီတွင် (၆) ရာသီ၌ ပြိုင်ပွဲစုံ(၂၅)ဂိုးနှင့်အထက် သွင်းယူနိုင်ခဲ့ကြောင်း သိရသည်။
ဆာလာသည် ၂၀၁၇ နွေရာသီတွင် ရိုးမားအသင်းထံမှ လီဗာပူးလ်သို့ ပြောင်းရွှေ့လာခဲ့သူဖြစ်ပြီး ပထမဆုံးကစားသည့် ၂၀၁၇-၁၈ ရာသီ၌ ပြိုင်ပွဲစုံ(၄၄)ဂိုး သွင်းယူနိုင်ခဲ့သည်။
၂၀၁၈- ၁၉ ရာသီတွင် (၂၇)ဂိုး သွင်းယူနိုင်ခဲ့ပြီး ၂၀၁၉-၂၀ ရာသီတွင်မူ (၂၃)ဂိုးသာ သွင်းယူနိုင်ခဲ့သည်။ အဆိုပါရာသီမှာ လီဗာပူးလ်ကစားသမားဘဝတွင် ဆာလာ (၂၅)ဂိုးအောက်သာ သွင်းယူနိုင်သည့် တစ်ခုတည်းသောရာသီဖြစ်သည်။
ဆာလာသည် ၂၀၂၀-၂၁ ရာသီတွင် (၃၁)ဂိုး၊ ၂၀၂၁-၂၂ ရာသီတွင် (၃၁)ဂိုး၊ ၂၀၂၂-၂၃ ရာသီတွင် ဂိုး(၃၀)သွင်းယူခဲ့ပြီး ယခုရာသီတွင် ပြီးခဲ့သည့် စပါးနှင့်ပွဲ၌ (၂၅)ဂိုး ပြည့်မြောက်ခဲ့ခြင်းဖြစ်သည်။
ဆာလာသည် ပြီးခဲ့သည့် ရက်သတ္တပတ်တွင် ကွင်းဘေးစည်း၌ နည်းပြ ယာဂန်ကလော့ပ်နှင့် အချေအတင်ဖြစ်ခဲ့ခြင်းကြောင့် ဝေဖန်ခံခဲ့ရသော်လည်း ယခုတစ်ပတ်တွင် အသင်းအတွက် ခြေစွမ်းပြကာ မှတ်တမ်းဝင်ဂိုးသွင်းယူနိုင်ခဲ့ခြင်းဖြစ်သည်။
