ဂါရတ်ဘေးလ်နဲ့စတင်ခဲ့တဲ့ ၂၀၁၃ နွေရာသီကနေ ပြီးခဲ့တဲ့၂၀၂၃ နွေရာသီအထိ အပြောင်းအရွှေ့ဈေးကွက် (၂၁) ခု (နွေနှင့် ဆောင်း)အတွင်း ဥရောပထိပ်တန်းလိဂ် (၅)ခုက မတူညီတဲ့ကလပ် အသင်း (၁၀)သင်းရဲ့ ယူရိုသန်း (၁၀၀)နဲ့အထက် ကစားသမားအပြောင်းအရွှေ့ (၁၇)ခုအထိမြင်တွေ့ခဲ့ရပါတယ်။ ဒီအထဲမှာ ၂၀၁၇ ခုနှစ်တုန်းက ဘာစီလိုနာကနေ PSG အသင်းထံပြောင်းရွှေ့ခဲ့တဲ့ ဘရာဇီးလ်စတားနေမာရဲ့ ယူရို (၂၂၂)သန်းတန် ကမ္ဘာ့စံချိန်တင်အပြောင်းအရွှေ့ပါဝင်ခဲ့သလို၊ ပြီးခဲ့တဲ့ ၂၀၂၃ ခုနှစ်အတွင်းမှာပဲ ယူရိုသန်း (၁၀၀)နဲ့အထက် ကစားသမားအပြောင်းအရွှေ့ (၅)ခုရှိခဲ့တဲ့အထိ ဈေးကွက်လှုပ်ခတ်မှုအရှိန်အဟုန် ပြင်းထန်လွန်းခဲ့တာပါ။