ရီးယဲလ်အသင်းက ဘရာဇီးလ်တိုက်စစ်ကစားသမား ဗင်နီစီယပ်စ်ကတော့ ဘာစီလိုနာကို အနိုင်ရခဲ့တဲ့ El Clasico ပွဲအပြီးမှာ JB5=CR7 လို့ ညီမျှခြင်းထုတ်လိုက်ပါတယ်။ ဒါက ရီးယဲလ်အသင်းဖော် အင်္ဂလန်ကွင်းလယ်ကစားသမား ဂျုဒ်ဘယ်လင်ဟမ်ကို ချီးကျူးလိုက်တာပါ။ အဲဒီ El Clasico ပွဲမှာ ဘယ်လင်ဟမ်က ရီးယဲလ်အသင်းအတွက် ချေပဂိုးနဲ့ အနိုင်ဂိုးတွေ သွင်းယူပေးခဲ့ပြီး ချီးကျူးထိုက်တဲ့ စွမ်းဆောင်ရည်ကို ပြသခဲ့တာတော့အမှန်ပါပဲ။ သူက စီရော်နယ်လ်ဒိုလောက်အသင်းအတွက် အကျိုးပြုနိုင်သူ ဖြစ်လာမလားဆိုတာတော့ မသေချာသေးပါဘူး။ ဒါပေမဲ့ ရောက်ရောက်ချင်းရာသီမှာ ရီးယဲလ်အသင်းအတွက် စွမ်းဆောင်ပေးနေတာ၊ စွမ်းဆောင်ပြနေတာတွေကတော့ စီရော်နယ်လ်ဒိုနဲ့ တစ်ကြိမ်ပြီးတစ်ကြိမ် နှိုင်းယှဉ်ချီးကျူးခံနေရပါတယ်။