ရဟတ်ယာဉ်ဝယ်ယူခြင်းနှင့်ပတ်သက်၍ ဦးဝင်းမြင့်နှင့် ဒေါ်အောင်ဆန်းစုကြည်တို့အား အဂတိလိုက်စားမှုတိုက်ဖျက်ရေး ဥပဒေဖြင့် တရားစွဲထားသည့် ရာဇဝတ်ကြီးအမှုအမှတ် ၄၉ အတွက် တရားလိုဖြစ်သူအား အဂတိလိုက်စားမှုတိုက်ဖျက်ရေးကော်မရှင်မှ ဦးအောင်ခန့်နှင့် ရာဇဝတ်ကြီးအမှုအမှတ် ၅၀ အတွက် တရားလိုဖြစ်သူ ဦးသိန်းမင်းဟိန်းတို့အား စွပ်စွဲခံရသူများ၏ ရှေ့နေများက ပြန်လှန်စစ်မေးခဲ့ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
နေပြည်တော်ကောင်စီဝန်းအတွင်းရှိ အထူးတရားရုံးတွင် ဇွန် ၁၃ ရက်က သမ္မတဟောင်း ဦးဝင်းမြင့်နှင့် အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်တို့ကို ရုံးထုတ်စစ်ဆေးခဲ့ကြောင်း သိရသည်။
ဇွန် ၁၃ ရက် ရုံးချိန်းတွင် ရဟတ်ယာဉ် ငှားရမ်းခြင်း၊ ဝယ်ယူခြင်း၊ စောင့်ရှောက်ရေးကိစ္စရပ်များနှင့်ပတ်သက်၍ ဦးဝင်းမြင့်နှင့် ဒေါ်အောင်ဆန်းစုကြည်တို့အား အဂတိဖြင့် တရားစွဲဆိုထားသည့် ရာဇဝတ်ကြီးအမှု အမှတ် ၄၆၊ ၄၇၊ ၄၈၊ ၄၉၊ နှင့် ၅၀ တို့အနက်မှ ရဟတ်ယာဉ်ဝယ်ယူခြင်း ကိစ္စရပ်များအတွက် အဂတိဖြင့် တရားစွဲဆိုထားသည့် ရာဇဝတ်ကြီးအမှုအမှတ် ၄၉ နှင့် ၅၀ အတွက် တရားလိုဖြစ်သူများကို စွပ်စွဲခံရသူများ၏ ရှေ့နေများက ပြန်လှန်စစ်မေးခဲ့ကြောင်း သိရသည်။
ထို့ပြင် ရဟတ်ယာဉ်ဝယ်ယူခြင်း ကိစ္စရပ်များနှင့်ပတ်သက်သည့် ရာဇဝတ်ကြီးအမှု အမှတ် ၄၉ တွင် အစိုးရနှင့် ကုမ္ပဏီအကြား ဆောင်ရွက်ခဲ့သည့် စာချုပ်စာတမ်းများအား ဇွန် ၁၃ ရက်ရုံးချိန်းတွင် တရားလိုဖြစ်သူဘက်မှ တင်ပြခဲ့ကြောင်း၊ ယင်းကိစ္စနှင့်ပတ်သက်၍ ပြန်လှန်စစ်မေးမှုများ ပြုလုပ်ရန် အချိန်လိုအပ်ခြင်းကြောင့် လာမည့်ရုံးချိန်းမှသာ ဆက်လက်စစ်ဆေးရန် ချိန်းဆိုခဲ့ကြောင်း သိရသည်။
အထက်ပါအမှုနှင့်ပတ်သက်၍ ၎င်းတို့နှစ်ဦးကို ဇွန် ၂၀ ရက်တွင် ထပ်မံရုံးထုတ်စစ်ဆေးရန် ချိန်းဆိုထားကြောင်းနှင့် အမှုသည်များ၏ ကျန်းမာရေးကောင်းမွန်ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။
ထို့ပြင် ရဟတ်ယာဉ်ငှားရမ်းခြင်းကိစ္စရပ်များနှင့်ပတ်သက်၍ ဦးဝင်းမြင့်နှင့်ဒေါ်အောင်ဆန်းစုကြည်တို့အား အဂတိဖြင့် တရားစွဲထားသည့် ရာဇဝတ်ကြီးအမှုအမှတ် ၄၆ နှင့် ၄၇ တို့အား ဇွန် ၁၄ ရက် တွင် ရုံးထုတ်စစ်ဆေးရန် ချိန်းဆိုထားပြီး ဒုတိယဝန်ကြီး ဦးစိုးအောင် လာရောက်ထွက်ဆိုမည်ဖြစ်ကြောင်း အမှုနှင့်ပတ်သက်၍ ထွက်ပေါ်လာသည့် သတင်းများအရ သိရသည်။