ဝက်စ်ဟမ်းအသင်း၏ အင်္ဂလန်ကွင်းလယ်ခံစစ်ကစားသမား ဒက်ကလန်ရိုက်သည် အသင်းက ၎င်း၏ပြောင်းရွှေ့ကြေးတန်ဖိုးကို ပေါင်သန်း(၉၀)ဟု သတ်မှတ်လိုက်ပြီးနောက် ယခုရာသီတွင် ဝက်စ်ဟမ်းအသင်း၌ ဆက်နေရန် ဆုံးဖြတ်လိုက်ကြောင်း သိရသည်။
ဒက်ကလန်ရိုက်(၂၂ နှစ်)သည် အင်္ဂလန်လက်ရွေးစင်အဖြစ် ရွေးချယ်ခံရပြီးနောက်ပိုင်း ပရီးမီးယားလိဂ်ထိပ်သီးအသင်းများ၏ ပစ်မှတ်ကစားသမားတစ်ဦးဖြစ်လာခဲ့ပြီး ချယ်လ်ဆီး၊ မန်ယူနှင့် မန်စီးတီးအသင်းတို့၏ စောင့်ကြည့်ခံကစားသမားလည်း ဖြစ်လာခဲ့သည်။
ဒက်ကလန်ရိုက်ကလည်း ချန်ပီယံလိဂ်ယှဉ်ပြိုင်ခွင့်ရသည့် ထိပ်သီးအသင်းတစ်သင်းထံ ပြောင်းရွှေ့ကစားရန် ဆန္ဒရှိခဲ့သည်။
သို့သော် ဝက်စ်ဟမ်းအသင်းက ၎င်းကို ရောင်းထုတ်လိုခြင်းမရှိသည့်အတွက် ပြောင်းရွှေ့ကြေးတန်ဖိုးကို ပေါင်သန်း(၉၀)ဟု သတ်မှတ်ခဲ့ရာ အပြောင်းအရွှေ့ ဖြစ်မြောက်နိုင်ဖွယ်မရှိတော့သည့်အတွက် ဒက်ကလန်ရိုက်က လာမည့်ရာသီတွင် အသင်း၌ ဆက်နေရန် ဆုံးဖြတ်လိုက်ခြင်းဖြစ်ကြောင်း သိရသည်။
ဝက်စ်ဟမ်းအသင်းသည် ဒက်ကလန်ရိုက်ကို ၂၀၂၄ ခုနှစ်အထိ စာချုပ်ချုပ်ဆိုထားသည့်အပြင် နောက်တစ်နှစ်သက်တမ်းတိုးနိုင်သည့် သဘောတူညီမှုလည်း ရယူထားခြင်းကြောင့် အလွယ်တကူလက်လွှတ်လို ခြင်းမရှိသည့်အတွက် ယခုကဲ့သို့ မြင့်မားသည့်တန်ဖိုး သတ်မှတ်ခဲ့ခြင်းဖြစ်သည်။
သို့သော် ယခုနွေရာသီအတွင်း ၎င်းတို့၏ သက်တမ်းတိုးစာချုပ်သစ်ချုပ်ဆိုရန် ကမ်းလှမ်းမှုနှစ်ကြိမ်ကို ဒက်ကလန်ရိုက်က ငြင်းပယ်ထားပြီး အသင်းပြောင်းရွှေ့ရန်သာ လိုလားနေကြောင်း သိရသည်။
ထို့ကြောင့် လာမည့်ရာသီ၌ ဝက်စ်ဟမ်းအသင်းတွင်ဆက်နေရန် လက်ခံလိုက်သော်လည်း နောက်နှစ်နွေရာသီတွင် သေချာပေါက်အသင်းပြောင်းရွှေ့ရန် ရည်ရွယ်ခြင်းဖြစ်ကြောင်း သိရသည်။
ဒက်ကလန်ရိုက်က ''ကစားသမားတိုင်း ထိပ်တန်းအသင်းမှာ၊ ချန်ပီယံလိဂ်ယှဉ်ပြိုင်ခွင့်ရတဲ့အသင်းမှာ ကစားချင်ကြမှာပါပဲ။ ဒီလိုမျိုး ဆန္ဒမရှိဘူးဆိုရင် ဘောလုံးကစားရတာ ဘာအဓိပ္ပာယ်မှ ရှိမှာမဟုတ်ပါဘူး''ဟု ပြောကြားခဲ့ဖူးသည်။
ဒက်ကလန်ရိုက်ကို ခေါ်ယူရန် စိတ်ဝင်စားနေသည့်အသင်းးများက ပေါင်သန်း(၆၀)ဝန်းကျင်သာ ပေးချေလိုသည်ဟု သိရသည်။
