အာဆင်နယ်အသင်းနည်းပြဘဝ ကိုးလအကြာမှာပင် FA ဖလားနှင့် ကွန်မြူနတီဒိုင်း ချန်ပီယံအောင်မြင်မှုနှစ်ခု ရယူပေးနိုင်ခဲ့သည့် အာတီတာသည် နည်းပြချုပ် (Head Coach)ရာထူးမှ ပထမအသင်းမန်နေဂျာအဖြစ် တိုးမြှင့်ခန့်အပ်ခံရကြောင်း သိရသည်။
အသက် (၃၈) နှစ်သာရှိသေးသည့် အာဆင်နယ်အသင်းခေါင်းဆောင်ဟောင်း အာတီတာသည် ၂၀၁၉ ခုနှစ် ဒီဇင်ဘာ ၂၀ ရက်တွင် အာဆင်နယ်အသင်းနည်းပြချုပ်အဖြစ် (၃)နှစ်ခွဲစာချုပ်ဖြင့် ခန့်အပ်ခံခဲ့ရသည်။
အာဆင်နယ်အသင်းသည် စီနီယာအသင်းနည်းပြအတွေ့အကြုံမရှိသော်လည်း မန်စီးတီးအသင်းနည်းပြ ဂွါဒီယိုလာ၏လက်ထောက်အဖြစ် (၃)နှစ်ကြာ ဆောင်ရွက်ခဲ့သည့် အာတီတာကို နည်းပြသစ်အဖြစ် ယုံကြည်စွာခန့်အပ်ခဲ့ခြင်းဖြစ်ပြီး ၎င်းကလည်း အသင်းအား အကောင်းဆုံးဦးဆောင်မှုပေးနိုင်ခဲ့သည်။
၎င်းကိုင်တွယ်ပြီးနောက် (၉)လအကြာမှာပင် FA ဖလားနှင့် ကွန် မြူနတီဒိုင်းချန်ပီယံဆုရယူနိုင်ခဲ့သလို အသင်းခေါင်းဆောင် အူဘာမီယန်းကိုလည်း (၃) နှစ်သက်တမ်းတိုးစာချုပ် ချုပ်ဆိုရန် စည်းရုံးနိုင်ခဲ့သောကြောင့် နည်းပြချုပ်ရာထူးမှ မန်နေဂျာအဖြစ် တိုးမြှင့်ခန့်အပ်ခံရခြင်းဖြစ်သည်။
"သူ (အာတီတာ)က ဒီကလပ်ရဲ့ (၁၃၄)နှစ်ကြာမြင့်ပြီဖြစ်တဲ့ သမိုင်း တစ်လျှောက် အခက်ခဲဆုံးဖြစ်နိုင်တဲ့ (၉)လအတွင်းမှာ ရောက်လာတဲ့သူပါ။ ကျွန်တော်က အခက်ခဲဆုံးကာလဖြစ်နိုင်တယ်လို့ ပြောတာပါ။ ဒါပေမဲ့ အသင်းမှာ နှစ်ပေါင်း (၇၀) ကြာရှိနေတဲ့ မစ္စတာဖရိုင်ယာ (ရာသက်ပန်ဥက္ကဋ္ဌ) နဲ့အတူ စစ်ဆေးကြည့်တဲ့အခါ ဒီကာလက အသင်းအတွက် အခက်ခဲဆုံးပဲလို့ သူကပြောပါတယ်။ ကျွန်တော်ပြောတာကို လက်မခံရင်တောင် သူပြောတာကို လက်ခံသင့်ပါတယ်။ ဒီကာလမှာ မီခေးလ်(အာတီတာ)က ပရိသတ်တွေ၊ ဝန်ထမ်း တွေနဲ့ ကစားသမားတွေရဲ့စိတ်ဓာတ်ကို မြှင့်တင်ပေးပြီးတော့ FA ဖလား ဆီမီးဖိုင်နယ်နဲ့ ဗိုလ်လုပွဲဆီ ပို့ဆောင်ပေးခဲ့သလို ချန်ပီယံဆုနဲ့ ကွန်မြူနတီဒိုင်းဆုကိုပါ ရယူနိုင်ခဲ့ပါတယ်။ ဒီလူရဲ့စွမ်းဆောင်ရည်ကို ကျွန်တော်တို့ တကယ်အသိအမှတ်ပြုပါတယ်။ သူ့ရဲ့စွမ်းဆောင်ရည်က နည်းပြချုပ်တစ်ဦးထက် မန်နေဂျာတစ်ဦးအဖြစ် ပိုပြီးသင့်လျော်ပါတယ်" ဟု အာဆင်နယ် အသင်း အမှုဆောင်ချုပ်သစ် ဗန်ကက်တေရှမ်က ပြောကြားသည်။
သို့ဖြစ်ရာ အာဆင်နယ်အသင်းတွင် အာတီတာ၏လုပ်ပိုင်ခွင့်များ ပိုမိုရရှိလာမည်ဖြစ်ပြီး အမှုဆောင်ချုပ်သစ် ဗန်ကက်တေရှမ်၊ နည်းစနစ် ဒါရိုက်တာ အီဒူး၊ အကယ်ဒမီမန်နေဂျာ မာတီဆက်ကာတို့နှင့် အနီးကပ် လက်တွဲ၍ ဆက်လက်လုပ်ဆောင်ရမည်ဖြစ်သည်။
COVIS-19 ကာလတွင် ကစားသမားများ၏လစာကို (၁၂.၅)ရာခိုင်နှုန်းလျှော့ချခြင်း၊ ဘောလုံးအရာရှိချုပ် ဆန်ယယ်ဟီအပါအဝင် ဝန်ထမ်း (၅၅)ဦး လျှော့ချခြင်းပြုလုပ်ရာတွင် အာတီတာ၏အခန်းကဏ္ဍမှာ အရေးပါကြောင်း သိရသည်။
