ဂျူဗင်တပ်စ်နည်းပြ ပီယာလိုက အသင်းဝါရင့်တိုက်စစ်မှူး ဟီဂွါအင်အနေဖြင့် ယခုနွေရာသီအပြောင်းအရွှေ့ကာလတွင် အသင်းမှထွက်ခွာမည်ဖြစ်ကြောင်း အတည်ပြုပြောကြားခဲ့သည်။
ဂျူဗင်တပ်စ်နည်းပြသစ် ပီယာလိုသည် သြဂုတ်လ (၂၅)ရက်က ပြုလုပ်ခဲ့သည့် သတင်းစာရှင်းလင်းပွဲတွင် ယင်းကဲ့သို့ ပြောကြားခဲ့ခြင်းဖြစ်သည်။
ပီယာလိုက "ဟီဂွါအင်နဲ့ ကျွန်တော် စကားပြောပြီးပါပြီ။ သူ့ကို လူပုဂ္ဂိုလ်တစ်ဦးအနေနဲ့ ကျွန်တော် လေးစားမှုအပြည့်ရှိပါတယ်။ ဟီဂွါအင်ဟာ အသင်းအတွက် ကြီးကျယ်ခမ်းနားတဲ့ ကစားသမားတစ်ယောက်ဖြစ်ပါတယ်။ ဒါပေမဲ့ ကျွန်တော်တို့ လမ်းခွဲဖို့ ဆုံးဖြတ်ခဲ့ကြပါတယ်။ ဒီဆုံးဖြတ်ချက်ကို ကျွန်တော်တို့ လေးလေးနက်နက် ချမှတ်ခဲ့တာပါ"ဟု ပြောကြားခဲ့သည်။
အသက် (၃၂)နှစ်အရွယ်ရှိ အာဂျင်တီးနားတိုက်စစ်မှူး ဟီဂွါအင်သည် ၂၀၁၆ ခုနှစ်တွင် နာပိုလီအသင်းမှ ဂျူဗင်တပ်စ်အသင်းသို့ ပေါင် (၇၅) သန်းဖြင့် ပြောင်းရွှေ့ခဲ့သူဖြစ်သည်။
ဟီဂွါအင်သည် ဂျူဗင်တပ်စ်အသင်းအတွက် ပြိုင်ပွဲစုံ (၁၄၈)ပွဲတွင် (၆၆)ဂိုးသွင်းယူခဲ့ပြီး အသင်းနှင့်အတူ စီးရီးအေချန်ပီယံဆု (၃)ကြိမ်အပါအဝင် ဆုဖလား (၅)လုံးအထိ ရရှိခဲ့သည်။
ဂျူဗင်တပ်စ်အသင်းနှင့် ချုပ်ဆိုထားသည့် ဟီဂွါအင်၏ စာချုပ်မှာ ၂၀၂၁ ခုနှစ်တွင် သက်တမ်းကုန်ဆုံးမည်ဖြစ်ပြီး ၎င်းကို ခေါ်ယူရန် မေဂျာလိဂ်ကလပ်များက စိတ်ဝင်စားနေကြောင်း သိရသည်။
