အာဆင်နယ်ကစားသမားသစ် ဝီလီယံက မိမိအနေဖြင့် အာဆင်နယ်အသင်းသို့ ပြောင်းရွှေ့လာခြင်းမှာ နည်းပြ အာတီတာကြောင့် ဖြစ်သည်ဟု ပြောကြားခဲ့သည်။
အသက် (၃၂)နှစ်အရွယ်ရှိ ဘရာဇီးလ်ဝါရင့်တောင်ပံကစားသမား ဝီလီယံသည် ချယ်လ်ဆီးအသင်းနှင့် စာချုပ်သက်တမ်းကုန်ဆုံးပြီးနောက် အာဆင်နယ်အသင်းထံသို့ ပြောင်းရွှေ့ကြေးအလွတ်ဖြင့် ပြောင်းရွှေ့လာခြင်းဖြစ်သည်။
ဝီလီယံသည် အာဆင်နယ်အသင်းနှင့် (၃)နှစ်သက်တမ်းရှိ စာချုပ်တစ်ရပ်ချုပ်ဆိုခဲ့ပြီး တစ်ပတ်လစာ ပေါင် (၂၂၀၀၀၀) ရရှိဖွယ်ရှိသည်ဟု ဗြိတိန်သတင်းစာ Daily Mail က ဖော်ပြခဲ့သည်။
"အာဆင်နယ်အသင်းကို မပြောင်းရွှေ့မီက အာတီတာနဲ့ ကျွန်တော် စကားပြောခဲ့ပါတယ်။ ကျွန်တော်တို့ရဲ့ ဆွေးနွေးမှုတွေဟာ အရမ်းကို ကောင်းပြီး အာဆင်နယ်အသင်းကို ကျွန်တော် လာချင်အောင် ဆွဲဆောင်နိုင်ခဲ့ပါတယ်။ သူက ကျွန်တော် ကောင်းကြောင်းတွေကို အများကြီးပြောပါတယ်။ ဒါကြောင့် အာဆင်နယ်အသင်းကို ကျွန်တော် လာခဲ့တာပါ"ဟု ဝီလီယံက ပြောကြားခဲ့သည်။
ထို့ပြင် ဝီလီယံက မိမိအနေဖြင့် အာဆင်နယ်အသင်းကို အောင်မြင်မှုများ ပြန်လည်ရရှိအောင် ကူညီပေးလိုကြောင်းလည်း ပြောကြားခဲ့သည်။
ဝီလီယံက "အာဆင်နယ်အသင်းရဲ့ ကစားဟန်ကို ကျွန်တော် သဘောကျသလို အီမရိတ်ကွင်းကလည်း ကြီးကျယ်ခမ်းနားပါတယ်။ အာတီတာရဲ့ ဦးဆောင်မှုနဲ့အတူ အာဆင်နယ်အသင်းဟာ ပရီးမီးယားလိဂ်မှာရော ဥရောပမှာပါ ဆုဖလားတွေကို စိန်ခေါ်မယ့်အသင်း ဖြစ်လာမှာပါ။ ကျွန်တော့်အနေနဲ့ အသင်းဖော်သစ်တွေနဲ့ တွေ့ဆုံပြီး ပွဲတွေကစားဖို့တောင် မစောင့်ချင်တော့ပါဘူး။ အာဆင်နယ်အသင်းကို အရင်လို အောင်မြင်မှုတွေရအောင် ကူညီပေးချင်ပါတယ်"ဟု ပြောကြားခဲ့သည်။
