မြန်မာနိုင်ငံအနေဖြင့် တိုင်းပြည်အတွက် ကြိုးပမ်းဆောင်ရွက်မှုများ၊ အထူးသဖြင့် ပြည်သူများ၏ လူမှုစီးပွား ဖွံ့ဖြိုးတိုးတက်မှုကို မြှင့်တင်နိုင်ရေးအတွက် ကုလသမဂ္ဂနှင့် ဆက်လက်၍ ပူးပေါင်းဆောင်ရွက်သွားမည် ဖြစ်ကြောင်း နိုင်ငံတော်သမ္မတ ဦးထင်ကျော် က (၇၂) ကြိမ်မြောက် ကုလသမဂ္ဂနှစ်ပတ်လည်နေ့ သဝဏ်လွှာ ပေးပို့ရာတွင် ထည့်သွင်းဖော်ပြခဲ့သည်။
ရှေးဦးစွာ (၇၂) ကြိမ်မြောက် ကုလသမဂ္ဂ နှစ်ပတ်လည်နေ့ အခါသမယတွင် ကုလသမဂ္ဂ အဖွဲ့ကြီးအား ဂုဏ်ယူဝမ်းမြောက်ကြောင်းနှင့် ကမ္ဘာ့ငြိမ်းချမ်းရေးနှင့် အားလုံးသာတူညီမျှ စဉ်ဆက်မပြတ် ဖွံ့ဖြိုးတိုးတက်ရေးတို့အတွက် ကြိုးပမ်းဆောင်ရွက်ရာတွင် အောင်မြင်စေကြောင်း ဆုမွန်ကောင်းများ ပေးပို့အပ်ပါကြောင်း၊ ကုလသမဂ္ဂအဖွဲ့ကြီးအား အပြည်ပြည်ဆိုင်ရာ ငြိမ်းချမ်းရေးနှင့် လုံခြုံရေး၊ ကမ္ဘာ့နိုင်ငံများ အကြား ခင်မင်ရင်းနှီးသည့် ဆက်ဆံရေး တိုးတက်ရေးနှင့် လွတ်လပ်ပြီး တရားမျှတသော ဒီမိုကရေစီ အသိုက်အဝန်း ပေါ်ပေါက်စေရေး ရည်မှန်းချက်များဖြင့် ၁၉၄၅ ခုနှစ်တွင် စတင်တည်ထောင်ခဲ့ခြင်း ဖြစ်ကြောင်း၊ ကုလသမဂ္ဂ အဖွဲ့ကြီးအနေဖြင့် ထိုသို့မြင့်မြတ်သည့် ရည်မှန်းချက်များအား အစဉ်အမြဲနှလုံးသွင်း၍ ကမ္ဘာပေါ်ရှိ ပဋိပက္ခများကို ငြိမ်းချမ်းသော နည်းလမ်းဖြင့် ဖြေရှင်းနိုင်ရန် နိုင်ငံများအကြား ပူးပေါင်းဆောင်ရွက်ရေးနှင့် ဆွေးနွေးညှိနှိုင်းမှုများ ပြုလုပ်နိုင်ရေးကို အလေးထားဆောင်ရွက်ရန် လိုအပ်မည်ဖြစ်ကြောင်း ဖော်ပြထားသည်။
ဆက်လက်၍ ယနေ့ခေတ် ကမ္ဘာ့ရေးရာများသည် ကုလသမဂ္ဂ စတင်တည်ထောင်သည့် လွန်ခဲ့သော ဆယ်စုနှစ် ခုနစ်စုကျော်က အချိန်နှင့် များစွာကွာခြားလျက် ရှိသော်လည်း ကုလသမဂ္ဂ၏ ပဋိညာဉ်ပါ အခြေခံမူများမှာ ဆက်လက်ဆီလျော် မှန်ကန်နေဆဲဖြစ်ပြီး အဖွဲ့ဝင်နိုင်ငံများအကြား ကမ္ဘာ့ငြိမ်းချမ်းရေးနှင့် တည်ငြိမ်မှု တိုးတက်ရေးအတွက် လမ်းပြမြေပုံတစ်ခုအဖြစ် တည်ရှိနေဆဲဖြစ်ကြောင်း၊ သို့ရာတွင် ပြောင်းလဲလာသော အခြေအနေများအား ထင်ဟပ်စေရန်နှင့် ပိုမိုထိရောက်မှုရှိစေရန် ကုလသမဂ္ဂအနေဖြင့် ပြုပြင်ပြောင်းလဲမှုများကို လျင်မြန်စွာ ဆောင်ရွက်ရန် လိုအပ်လျက်ရှိကြောင်း ဖော်ပြပါရှိသည်။
ကုလသမဂ္ဂ အဖွဲ့ဝင်နိုင်ငံ ဖြစ်လာချိန်မှစ၍ မြန်မာနိုင်ငံအနေဖြင့် ကုလသမဂ္ဂနှင့် ပူးပေါင်းဆောင်ရွက်ရေးကို နိုင်ငံခြားရေးမူဝါဒ၏ အုတ်မြစ်တစ်ခုအဖြစ် သတ်မှတ်ထားကြောင်း၊ မြန်မာနိုင်ငံ အစိုးရအနေဖြင့် ကုလသမဂ္ဂနေ့ အခါသမယမှာ ကုလသမဂ္ဂပဋိညာဉ်ပါ ရည်ရွယ်ချက်များနှင့် အခြေခံမူများအပေါ် ယုံကြည်မှုအား ထပ်လောင်းအတည်ပြုလိုကြောင်း၊ (၇၂) ကြိမ်မြောက် ကုလသမဂ္ဂ အထွေထွေညီလာခံ၏ ဆောင်ပုဒ်ဖြစ်သည့် “ရေရှည်တည်တံ့ခိုင်မြဲသော ကမ္ဘာပေါ်ရှိ လူသားများ အားလုံးအတွက် ငြိမ်းချမ်းမှုနှင့် သင့်လျော်သည့် လူနေမှုဘ၀ ရရှိရေး ပြည်သူများကို အလေးပေး” ဟူသည်မှာ မြန်မာနိုင်ငံအနေဖြင့် ဆောင်ရွက်လျက်ရှိသည့် ငြိမ်းချမ်းရေးနှင့် အမျိုးသား ပြန်လည်သင့်မြတ်ရေး၊ ဒီမိုကရေစီ အသွင်ကူးပြောင်းရေး လုပ်ငန်းစဉ်၊ လူ့အခွင့်အရေး ကာကွယ်မြှင့်တင်ရေးနှင့် စီးပွားရေး ဖွံ့ဖြိုးတိုးတက်ရေး ဆောင်ရွက်မှု လုပ်ငန်းစဉ်များအတွက် တွန်းအားတစ်ရပ် ဖြစ်ကြောင်း၊ အဆိုပါ ဆောင်ပုဒ်နှင့်အညီ ကုလသမဂ္ဂအဖွဲ့ကြီး အနေဖြင့် ယင်း၏အခြေခံမူများနှင့် ကျင့်ဝတ်များကို လက်ကိုင်ပြုလျက် အဖွဲ့ဝင်နိုင်ငံများ၏ နိုင်ငံတည်ဆောက်ရေး၊ ဖွံ့ဖြိုးတိုးတက်ရေး လုပ်ငန်းစဉ်များအား အိမ်ရှင်နိုင်ငံ၏ ဦးစားပေးချက်များနှင့် လျော်ညီစွာ ဆက်လက်ပံ့ပိုး ပေးနိုင်မည်ဟု မျှော်လင့်ကြောင်း သဝဏ်လွှာတွင် ဖော်ပြထား သည်။
မြန်မာနိုင်ငံအနေဖြင့် အဖွဲ့ဝင်နိုင်ငံများနည်းတူ သဘာဝပတ်ဝန်းကျင် ရေရှည်ထိန်းသိမ်းရေး ကတိကဝတ်အဖြစ် ကမ္ဘာ့ရာသီဥတု ပြောင်းလဲမှုဆိုင်ရာ အပြည်ပြည်ဆိုင်ရာ ပါရီသဘောတူညီချက်ကို အတည်ပြု ပါဝင်ကြောင်း၊ ကျိုတိုနောက်ဆက်တွဲ စာချုပ်၏ ဒိုဟာပြင်ဆင်ချက်ကို လက်ခံကြောင်း စာချွန်လွှာတို့အား ယခုနှစ် ကုလသမဂ္ဂ အထွေထွေညီလာခံ ကာလတွင် ကုလသမဂ္ဂ အတွင်းရေးမှူးချုပ်ထံ ပေးအပ်အကြောင်းကြားခဲ့ကြောင်း၊ ထို့ပြင် လူ့အခွင့်အရေး ကာကွယ်မြှင့်တင်ရေးနှင့် အခြေခံလူ့အခွင့်အရေးများကို လေးစားကြောင်း ပြသသည့်အနေဖြင့် စီးပွားရေး၊ လူမှုရေးနှင့် ယဉ်ကျေးမှု အခွင့်အရေးများဆိုင်ရာ အပြည်ပြည်ဆိုင်ရာ သဘောတူစာချုပ်ကို ၂၀၁၇ ခုနှစ် အောက်တိုဘာ ၆ ရက်တွင် အတည်ပြု ပါဝင်ခဲ့ကြောင်း ဖော်ပြပါရှိသည်။
ထို့ပြင် မြန်မာနိုင်ငံသည် ၂၀၃၀ ပြည့်နှစ် စဉ်ဆက်မပြတ် ဖွံ့ဖြိုးရေး ရည်မှန်းချက်များ အား ကုလသမဂ္ဂ အဖွဲ့အစည်းများ၊ အပြည်ပြည်ဆိုင်ရာ အဖွဲ့အစည်းများ၊ အစိုးရမဟုတ်သော အဖွဲ့အစည်းများ၊ ပြည်သူများနှင့်အတူ လက်တွဲအကောင်အထည်ဖော် ဆောင်ရွက်လျက်ရှိကြောင်း၊ နုနယ်သေးသည့် ဒီမိုကရေစီနိုင်ငံ တစ်နိုင်ငံဖြစ်သော မြန်မာနိုင်ငံအနေဖြင့် စိန်ခေါ်မှုများစွာကို ရင်ဆိုင်နေရလျက် ရှိသော်လည်း အစိုးရအနေဖြင့် အဆိုပါစိန်ခေါ်မှုများကို အောင်မြင်စွာ ဖြေရှင်းကျော်လွှားရေး အတွက် ပြည်သူများ၏ တက်ကြွစွာ ပူးပေါင်းပါဝင်မှုနှင့် နိုင်ငံတကာမှ မိတ်ဆွေများ၏ စဉ်ဆက်မပြတ် ကူညီထောက်ပံ့မှုများဖြင့် မဆုတ်မနစ် ကြိုးပမ်းဆောင်ရွက်သွားမည် ဖြစ်ကြောင်း ဖော်ပြထားသည်။
