စက်တင်ဘာ ၅ ရက်က M Gallery ဟိုတယ်တွင် ပြုလုပ်သည့် တရားမဝင်ကုန်သွယ်မှု တိုက်ဖျက်ရေးဖိုရမ်ကို တွေ့ရစဉ်
တရားမဝင် ကုန်သွယ်မှုများတွင် ငွေပေးနေကြသည့်အတွက် အဂတိလိုက်စားမှုများ တိုးမြင့်လာခြင်းနှင့် တရားဥပဒေ အာဏာသက်ရောက်မှုကို အဟန့်အတားဖြစ်စေကြောင်း အဂတိလိုက်စားမှု တိုက်ဖျက်ရေးကော်မရှင် ဥက္ကဋ္ဌ ဦးအောင်ကြည်က ပြောကြားသည်။
စက်တင်ဘာ ၅ ရက်က M Gallery ဟိုတယ်တွင် ပြုလုပ်သည့် တရားမဝင်ကုန်သွယ်မှု တိုက်ဖျက်ရေးဖိုရမ်တွင် အဂတိလိုက်စားမှု တိုက်ဖျက်ရေးကော်မရှင်ဥက္ကဋ္ဌ ဦးအောင်ကြည်က အမှာစကားပြောကြားရာတွင် အထက်ပါကဲ့သို့ ပြောကြားခဲ့ခြင်းဖြစ်သည်။
“အုပ်စုဖွဲ့ကျူးလွန်မှုများသည် တရားမဝင် ကုန်သွယ်မှုများအတွက် နှောင့်နှေးမှုမရှိဘဲ ငွေပေးနေကြသည့်အတွက်ကြောင့် အဂတိလိုက်စားမှုများ တိုးမြင့်လာခြင်းအပြင် တရားဥပဒေ အာဏာသက်ရောက်မှုများကို အဟန့်အတား ဖြစ်စေပါတယ်” ဟု ကော်မရှင်ဥက္ကဋ္ဌ ဦးအောင်ကြည်က ပြောကြားသည်။
ထို့ပြင် တရားမဝင်ကုန်သွယ်မှုသည် အများပြည်သူဆိုင်ရာ ကျန်းမာရေးနှင့် လုံခြုံမှုကို ဆိုးရွားစွာ ထိခိုက်နစ်နာစေပြီး အကောက်အခွန်ရှောင်မှုများ၊ လိမ်လည်မှုများ၊ အခြားပြစ်မှုဆိုင်ရာနှင့် အုပ်ချုပ်မှုဆိုင်ရာဥပဒေ ချိုးဖောက်ခြင်းများ ဖြစ်ပေါ်စေနိုင်ကြောင်း ကော်မရှင်ဥက္ကဋ္ဌက ပြောကြားသည်။
အစိုးရဌာနများအကြား ထိရောက်မှု မရှိခြင်း၊ အကန့်အသတ်ရှိနေသည့် ပူးပေါင်းမှုကို တရားမဝင်ကုန်ကူးသူများက တစ်ခါတစ်ရံတွင် အမြတ်ထုတ်လေ့ရှိကြောင်း ကမ္ဘာလုံးချီ တရားမဝင်ကုန်သွယ်မှု အခြေအနေ ကိန်းညွှန်း၏ အကြံပြုမှုပုံစံတွင် ပါရှိသည်။
ထို့ပြင် တရားမဝင်ကုန်ကူးမှုကို အားပေးအားမြှောက်ဖြစ်စေပြီး အမြစ်တွယ်နေသည့် အကောက်အခွန်၊ ဥပဒေစိုးမိုးမှုအာဏာပိုင်များ၊ တရားစီရင်ရေးနယ်ပယ်တို့တွင် အထူးသဖြင့် ကိုင်တွယ်ရန် လိုအပ်ကြောင်း အကြံပြုပုံစံတွင် ဖော်ပြထားသည်။
ယင်းသို့ရှိနေသည့်အတွက် ဗဟိုအစိုးရအဆင့်တွင် အဆင့်မြင့်အာဏာရှိသည့် တရားမဝင် ကုန်သွယ်မှုတိုက်ဖျက်ရေး ညှိနှိုင်းသူ တစ်ဦးအား မြန်မာအစိုးရအနေဖြင့် ခန့်အပ်သင့်ကြောင်း ကမ္ဘာလုံးချီ တရားမဝင်ကုန်သွယ်မှု အခြေအနေ ကိန်းညွှန်း၏ အကြံပြုမှုပုံစံတွင် ဖော်ပြထားသည်။
