မန္တလေးတိုင်းဒေသကြီး အတွင်းရှိ စိုက်ပျိုးရေး မွေးမြူးရေး လုပ်ငန်းများအတွက် ချေးငွေလိုအပ်သည့် တောင်သူလယ်သမားများနှင့် လုပ်ငန်းရှင်များကို မြန်မာ့လယ်ယာ ဖွံ့ဖြိုးရေးဘဏ်က MEB Two Step Loan ဖြင့် နှစ်တိုချေးငွေ နှစ်ရှည်ချေးငွေများ ထုတ်ချေးခြင်းကို ယခုသြဂုတ်လမှ စတင်ချေးပေးမည်ဟု မြန်မာ့လယ်ယာ ဖွံ့ဖြိုးရေးဘဏ်မှ သိရသည်။
အဆိုပါ နှစ်တိုနှစ်ရှည် ချေးငွေထုတ်ချေးခြင်းကို တစ်နိုင်ငံလုံးတွင် ယမန်နှစ်က စတင်ဆောင်ရွက်နေပြီး မန္တလေးတိုင်းဒေသကြီးတွင် ယခုနှစ် သြဂုတ်လမှ စတင်ချေးနိုင်ပြီး ချေးငွေဆောင်ရွက်လိုသူများ အနေနဲ့ မိမိတို့နှင့် သက်ဆိုင်ရာ နယ်မြေများမှ မြန်မာ့လယ်ယာ ဖွံ့ဖြိုးရေးဘဏ်များတွင် စုံစမ်းမေးမြန်းနိုင်ပြီး နှစ်တိုချေးငွေအဖြစ် ချေးငွေပမာဏ ကျပ်သိန်း ၅၀၀ နှင့် လုပ်ငန်းသုံး စက်ကိရိယာအတွက် အများဆုံး ကျပ်သိန်း၂၀၀ ထုတ်ချေးနိုင်ပြီး နှစ်ရှည်ချေးငွေအဖြစ် အများထုတ်ချေးမည် ပမာဏမှာ ကျပ်သိန်း ၅၀၀၀ ဖြစ်သည်ဟု မြန်မာ့လယ်ယာ ဖွံ့ဖြိုးရေးဘဏ် (မန္တလေးဘဏ်ခွဲ) တိုင်းမန်နေဂျာဦးစုက ပြောကြားသည်။
“မြန်မာ့လယ်ယာ ဖွံ့ဖြိုးရေးဘဏ် နှစ်စဉ်ရာသီစိုက်ပျိုးရေး ချေးငွေများအပြင် နှစ်ရှည်ချေးငွေဖြစ်တဲ့ သုံးနှစ် သုံးရစ်၊ ငါးနှစ် ငါးရစ် စသဖြင့် ချေးငွေတွေကိုလည်း ထုတ်ချေးနေပါတယ်။ JICA ချေးငွေတို့ မြန်မာစီးပွားရေးဘဏ်ကနေ ယူပေးတဲ့ MEB Two Step Loan တို့ ချေးပေးနေပါတယ်။ JICA ချေးငွေက ၂၀၁၇ -၂၀၁၈ ခုနှစ်က စတင်ချေးပေးနေ ပြီး မြန်မာစီးပွားရေး ဘဏ်ကနေတစ်ဆင့် ချေးပေးတဲ့ MEB Two Step Loan ကတော့ တစ်နိုင်ငံလုံး အနေနဲ့က ပြီးခဲ့တဲ့နှစ်ကစတာ ဖြစ်ပေမယ့် မန္တလေးတိုင်းဒေသကြီး အနေနဲ့ကတော့ အခု သြဂုတ်လကစပြီးတော့ စတင်အကောင်အထည်ဖော် ဆောင်ရွက်နေပြီး တောင်သူလယ်သမား လုပ်ငန်းရှင်တွေကို စတင်ချေးပေးသွားမှာ ဖြစ်ပါတယ်။ အဓိကတော့ နိုင်ငံတော်ရဲ့ မူဝါဒဖြစ်တဲ့ SME လုပ်ငန်းတွေ ဖွံ့ဖြိုးတိုးတက်ဖို့အတွက် ဒီချေးငွေကို ဆောင်ရွက်ပေးခြင်း ဖြစ်ပါတယ်။ ချေးငွေပေးတာက မြန်မာ့စီးပွားရေးဘဏ်ကနေ ပေးတာပါ ထုတ်ချေးပေးတဲ့ ငွေကြေးကို ကျွန်တော်တို့က ၉ ရာခိုင်နှုန်း ကောက်ခံသွားမှာပါ” ၎င်းကဆက်လက် ပြောကြားသည်။
အဆိုပါ ချေးငွေနှင့် ပတ်သက်အမျိုးအစား သတ်မှတ်ထားရာတွင် လုပ်ငန်းသုံး စက်ကိရိယာချေးငွေ အမျိုးအစားနှင့် စိုက်ပျိုးရေးလုပ်ငန်း၊ မွေးမြူရေးလုပ်ငန်း၊ စိုက်ပျိုးရေး မွေးမြူရေး အခြေခံစီးပွားရေး လုပ်ငန်းများအတွက် ချေးငွေအမျိုးအစားတို့ဖြစ်သည်။ လုပ်ငန်းအမျိုးအစား လုပ်ငန်းပမာဏနှင့် အာမခံပေးနိုင်မှု အခြေအနေအပေါ် မူတည်၍ ချေးငွေပမာဏ သတ်မှတ်ထုတ်ချေးမည် ဖြစ်ရာတွင် နှစ်တိုချေးငွေ အဖြစ်အများဆုံး ထုတ်ချေးငွေ ပမာဏမှာ ကျပ်သိန်း ၅၀၀ ဖြစ်ပြီး လုပ်ငန်းသုံး စက်ကိရိယာအတွက် အများဆုံး သိန်း၂၀၀ သတ်မှတ်ထားသည်။ နှစ်တိုချေးငွေ၏ သက်တမ်းမှာ သုံးနှစ်ဖြစ်ကာ ကျသင့်အတိုးကို သုံးလတစ်ကြိမ် ကောက်ခံမည်။ အရင်းပေးဆပ်မှုကို တစ်နှစ်ဆိုင်းငံ့ပြီး နှစ်နှစ်အတွင်း ခြောက်လတစ်ကြိမ် လေးရစ်ကောက်ခံမည်ဖြစ်ပြီး နှစ်ရှည်ချေးငွေမှာ အများဆုံး ထုတ်ချေးမည့် ငွေပမာဏမှာ ကျပ်သိန်း ၅၀၀၀ ဖြစ်သည်။ နှစ်ရှည်ချေးငွေ၏ သက်တမ်းမှာ ငါးနှစ်ဖြစ်ပြီး ကျသင့်အတိုးကို သုံးလတစ်ကြိမ် ကောက်ခံမည်ဖြစ်ပြီး အရင်းပေးဆပ်မှုကို နှစ်နှစ်ဆိုင်းငံ့ပြီး သုံးနှစ်အတွင်း ခြောက်လတစ်ကြိမ်ဖြင့် ခြောက်ရစ်ကောက်ခံမည် ဖြစ်ကြောင်း သိရသည်။
“ထုတ်ချေးနိုင်တဲ့သူတွေက တောင်သူလယ်သမား လုပ်ငန်းရှင်၊ လုပ်ငန်းရှင် အဖွဲ့အစည်း သို့မဟုတ် ကုမ္ပဏီတွေကို ကျွန်တော်တို့က ထုတ်ချေးပေးသွားမယ်။ ထုတ်ချေးတဲ့ အမျိုးအစားက လုပ်ငန်းသုံး စက်ကိရိယာအတွက်ချေးငွေ နောက်တစ်ခုကတော့ စိုက်ပျိုးရေးလုပ်ငန်း၊ မွေးမြူရေးလုပ်ငန်းများ စိုက်ပျိုးရေး မွေးမြူရေးကို အခြေခံတဲ့ အသုံးပြုမည့် အဆောက်အအုံနှင့် ပစ္စည်းများ တည်ဆောက် ထုတ်လုပ်တဲ့ လုပ်ငန်းများအတွက် ထုတ်ချေးပေးသွားမယ်။ ချေးငွေကာလ စက်ကိရိယာဆို သုံးနှစ် သုံးရစ်နဲ့ ချေးမယ်။ အများဆုံး ကျပ်သိန်းနှစ်ရာအထိ ချေးပါမယ်။ နှစ်တိုထဲမှာ စိုက်ပျိုးရေး မွေးမြူရေး အတွက် ကျပ်သိန်းငါးရာချေးလို့ ရတယ်။ နှစ်တိုထဲမှာပါတယ် သုံးနှစ် သုံးရစ်ဆပ်ပေါ့။ နှစ်ရှည်အနေနဲ့ ကျပ်ငါးနှစ် ငါးရစ်ဆို ကျပ်သိန်းနှစ်ရာ မြို့နယ်မှာဆို Limit ထားပါတယ်။ တိုင်းဒေသကြီး ဘဏ်ခွဲမန်နေဂျာကတော့ ကျပ်သိန်းငါးရာအထိ ခွင့်ပြုပေးနိုင်ပြီး အဲဒီအထက် ပိုသွားခဲ့ရင် ကျပ်သိန်းသုံးထောင် အထိဆိုရင် ကျွန်တော်တို့ ရုံးချုပ်ရဲ့ ချေးငွေဌာနက စိစစ်ဆောင်ရွက်မယ်။ အဲဒီထက် ကျော်လွန်သွားရင် ကျပ်သိန်းငါးထောင်အထိဆို စီမံကိန်းနှင့် ဘဏ္ဍာရေးဝန်ကြီးဌာနမှာရှိတဲ့ ချေးငွေဌာနကနေ စိစစ်ဆောင်ရွက်သွားမယ်။ ကျပ်သိန်းနှစ်ရာကနေ အများဆုံး ကျပ်သိန်းထောင်အထိ ထုတ်ချေးသွားမှာ ဖြစ်ပါတယ်။ အဓိက တကယ်လည်း လုပ်ရမယ်။ ပြည်ပပို့ကုန်တိုးမြှင့်ရေး သွင်းကုန်အစားထိုး ဆိုသည့် အဓိက အချက်နှစ်ချက်ကို အကောင်အထည် ပံ့ပိုးဆောင်ရွက်တာ ဖြစ်တယ်” ဟု မြန်မာ လယ်ယာဖွံ့ဖြိုးရေးဘဏ် (မန္တလေးဘဏ်ခွဲ) တိုင်းမန်နေဂျာဦးစုက ပြောကြားသည်။
မြန်မာ့လယ်ယာ ဖွံ့ဖြိုးရေးဘဏ်က MEP Two Step Loan ဖြင့် ချေးငွေ ထုတ်ချေးခြင်းပေးရာ၌ မြန်မာ့စီးပွားရေးဘဏ်က မြန်မာလယ်ယာ ဖွံ့ဖြိုးရေးဘဏ်သို့ သတ်မှတ်သည့် အတိုးနှုန်းမှာ တစ်နှစ်လျှင် ၈ ဒသမ ၅ ရာခိုင်နှုန်းဖြစ်ပြီး မြန်မာ့လယ်ယာ ဖွံ့ဖြိုးရေးဘဏ်က ငွေချေးယူသူအပေါ် သတ်မှတ်သည့် အတိုးနှုန်းမှာ တစ်နှစ်လျှင် ၉ ရာခိုင်နှုန်းအဖြစ် သတ်မှတ်ထားသည်။
