ထားဝယ်မြို့အဝင် လမ်းမကြီးအား တွေ့ရစဉ်
တနင်္သာရီတိုင်းဒေသကြီး၏မြို့တော် ထားဝယ်မြို့ရှိ စည်ပင်သာယာရေး နယ်နိမိတ်အတွင်း လမ်းများပေါ်၌ မြေကြီး၊ သဲ၊ ကျောက်နှင့် အမှိုက်များ သယ်ဆောင်ရာတွင် လမ်းမပေါ် ကျကျန်ခဲ့သည့် ယာဉ်များအား စည်ပင်သာယာဥပဒေဖြင့် စတင်အရေးယူ ဆောင်ရွက်သွားမည်ဖြစ်ကြောင်း သိရသည်။
ထားဝယ်မြို့ပေါ်ရှိ ၁၅ ရပ်ကွက်မှ လမ်းမများပေါ်တွင် မြေကြီး၊ သဲ၊ ကျောက်နှင့် အမှိုက်သယ်ယာဉ်များထံမှ စည်းကမ်းမဲ့ သယ်ယူမှုကြောင့် လမ်းပေါ်သို့ မြေကြီးများ၊ သဲ၊ ကျောက်နှင့် အမှိုက်များ ကျကျန်ခဲ့မှုများ ရှိနေသောကြောင့် ခေါ်ယူသတိပေးမှုများ ဆောင်ရွက်ခဲ့သော်လည်း ထပ်မံဖြစ်ပွားလာသည့်အတွက် ယင်းလုပ်ငန်းရှင်များကို ဇူလိုင် ၁၃ ရက်က နောက်ဆုံးအကြိမ်အနေဖြင့် ခေါ်ယူအသိပေးခဲ့ပြီး ထပ်မံဖြစ်ပွားလာပါက စည်ပင်သာယာရေး ဥပဒေဖြင့် အရေးယူသွားမည်ဖြစ် ကြောင်း ထားဝယ်မြို့နယ် စည်ပင်သာယာရေး ကော်မတီ ဥက္ကဋ္ဌ ဦးလှဦးက ပြောကြားသည်။
“အရေးယူမယ့်ဟာ မလုပ်ခင် အသိပညာပေးတာပေါ့။ သူတို့လည်းသိတယ်။ တစ် ဖက်နိုင်ငံမှာ သဲ၊ ကျောက်ကားတွေဆိုရင် လမ်းတွေကောင်းတော့ လမ်းတွေ ပျက်စီးမှာစိုးလို့ ကျောက်စရစ်ခဲတစ်လုံးတောင် လမ်းပေါ်မကျ အောင်ဂရုစိုက်ကြတယ်။ ထားဝယ်မှာလည်း ပြောထားတာကြာပြီ။ ဥပဒေအသစ်ပြဋ္ဌာန်း ထားတာကလည်း ၂၀၁၇ ကတည်းက။ လုပ်ငန်းလိုင်စင် ပေးကတည်းက သူတို့ကိုမှာထားပြီးသား။ မလိုက်နာကြဘူး။ သိရဲ့သားနဲ့ထပ် ပြီးဖြစ်လာတော့ လမ်းပေါ်မှာ ကျောက်စရစ် ကျလို့ လုပ်ငန်းကိုစုံစမ်းပြီး သတိပေးတာတွေ လုပ်ခဲ့ပြီးပြီ။ မြေကားတွေလည်း ဒီလိုပဲ။နွေ ရာသီမှာ သယ်ရင် ဖုန်ထလို့မိုးရာသီမှာ သယ်ကြတော့ မိုးရာသီမှာ လမ်းတွေက ညစ်ပတ် ပြန်တယ်။ နေ့ဘက်မှာ လူတွေ ကျန်းမာရေးထိမှာ ရှေးရှုပြီး ညဘက်လူတွေ အိပ်တဲ့အချိန် မြို့ပြင်လမ်းကြောင်းရွေးပေးပြီး သယ်ခိုင်းတယ်။ ဒီလိုသယ်ခိုင်းရင်းနဲ့မြေတွေကျလာတယ်။ အဲဒီအချိန်မှာ လမ်းက မကောင်းသေးတော့ လမ်းကောင်းလာတော့ အဖုံးဖုံးကြပါ။ အဖုံးဖုံးပေမယ့် မြေသယ်ကားကြီးတွေက အလယ်မှာပဲတင်တော့ ပြဿနာ သိပ်မရှိပေမယ့် ဘီးမှာညှပ်ပြီးပါလာတဲ့ မြေတွေကို ရေဆေးဖို့ပြောတယ်။ ရေဆေးဖို့ အဆင်မပြေရင် ခြစ်ချဖို့ပေါ့။ ကျွန်တော်တို့က လမ်းပေါ်မှာ ကျောက်စရစ်တွေ မြေတွေမကျရင်ရပြီ” ဟု ထားဝယ်မြို့နယ် စည်ပင်သာယာရေး ကော်မတီဥက္ကဋ္ဌ ဦးလှဦးက ပြောကြားသည်။
လက်ရှိတွင် မြေကြီး၊ သဲ၊ ကျောက်နှင့် အမှိုက်သိမ်းယာဉ် လုပ်ငန်းရှင်များ အားလုံးကို နောက်ဆုံးအနေဖြင့် ခေါ်ယူအသိပေးခြင်း ဖြစ်ပြီး နောက်ထပ်တွေ့ရှိပါက ဒဏ်ငွေရိုက် အပြစ်ပေးသွားမည့်အပြင် ဒဏ်ကြေးငွေမှာ တစ်ကြိမ်ထက်တကြိမ် ဆတိုးမြင့်တက်လာမည်ဖြစ်ကာ စည်ပင်သာယာရေး ဥပဒေအရ အရေးယူခြင်းကို မခံယူပါက တရားစွဲဆိုသွား မည်ဖြစ်ကြောင်း သိရသည်။ ထို့အပြင် အဓိကအားဖြင့် လမ်းပေါ်၌ မြေကြီး၊ သဲ၊ ကျောက်နှင့် အမှိုက်များ မကျစေရန် လိုအပ်ပြီး မြေသယ်ယာဉ်များ အနေဖြင့် အပေါ်မှ အဖုံးဖြင့်ဖုံးကာ သယ်ယူရန်ဖြစ်ကြောင်း၊ အမှိုက်သိမ်းယာဉ်များ လမ်းပေါ်တွင် အမှိုက်ကျကျန်ခဲ့ပါက ပုဂ္ဂလိကသာမက စည်ပင်သာယာရေးအဖွဲ့မှ အမှိုက်သိမ်းယာဉ်များကိုပါ အရေးယူသွားမည်ဖြစ်ပြီး ပြည်သူများအနေဖြင့် လမ်းမများပေါ်၌ မြေကြီး၊ သဲ၊ ကျောက်နှင့် အမှိုက်များ ကျကျန်ခဲ့သည်ကို တွေ့ရှိပါက မြို့နယ်စည်ပင်သာယာရေး ကော်မတီထံ ဖုန်းဆက်တိုင်ကြား နိုင်သည်ဟု ဦးလှဦးက ဆက်လက်ပြောကြားသည်။
အများပြည်သူပိုင် လမ်းမများပေါ်၌ မြေကြီး၊ သဲ၊ ကျောက်နှင့် အမှိုက်များ စသည်တို့ ကျကျန်ခဲ့ပါက တနင်္သာရီတိုင်းဒေသကြီး လွှတ်တော်က အတည်ပြု ပြဋ္ဌာန်းထားသည့် ၂၀၁၇ ခုနှစ် တိုင်းဒေသကြီး စည်ပင်သာယာရေး ဥပဒေ အခန်း ၁၉၊ ပုဒ်မ ၇၀ ပါ ပြဋ္ဌာန်းချက်များအရ ပြစ်မှုကျူးလွန်ကြောင်း ထင်ရှားပါက အနိမ့်ဆုံးငွေဒဏ် ကျပ်သုံးသောင်းမှ ကျပ်သုံးသိန်းအထိ ချမှတ်နိုင်ကြောင်း သိရသည်။ ထားဝယ်မြို့ပေါ်ရှိ လမ်းများနှင့် မြို့အဝင်အထွက် လမ်းမများမှာ AC နိုင်လွန်ကတ္တရာနှင့် ကွန်ကရစ်လမ်းများဖြစ်ပြီး မြေကြီး၊ သဲ၊ ကျောက်ယာဉ်အချို့၏ စည်ကမ်းမဲ့ သယ်ယူမှုကြောင့် လမ်းပိုင်းအချို့ ပျက်စီးမှု ရှိနေသည့်အပြင် အရှိန်ပြင်းစွာ မောင်းနှင်မှုများကြောင့် ယာဉ်မတော်တဆ မှုများလည်း ဖြစ်ပွားခဲ့ဖူးကြောင်း သိရသည်။
