ပြည်နယ်နှင့် တိုင်းဒေသကြီးများရှိ ရေ လှောင်တမံ ၁၈ ခုမှ ရေပြည့်အမှတ် ကျော်လာသဖြင့် ရေပိုလွှဲများမှ ရေကျော်ထွက်ရှိနေမှုများသည် ပုံမှန်ဖြစ်စဉ်အတိုင်းသာဖြစ်ပြီး ဆည်တမံများ၏ ကြံ့ခိုင်မှုနှင့် ရေထွက်စီးဆင်း နေမှုများအပေါ် စိုးရိမ်ဖွယ်ရာ အခြေအနေ မရှိကြောင်း ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာနမှ ထုတ်ပြန်ထားသည်။
ဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာန၏ ဇွန် ၁၂ ရက်စွဲဖြင့် ဆည်တ မံများ၏ ရေဝင်ရေကျော်မှု အခြေအနေ ထုတ်ပြန်ချက်အရ ဆည်တမံများ၏ ရေဝင်ရောက်မှုနှင့် ရေပိုလွှဲများမှ ရေကျော်ထွက်ရှိနေမှု များသည် ပုံမှန်ဖြစ်စဉ်များ အတိုင်းသာ ရှိနေကြောင်း သိရသည်။
ဆည်တမံများ၏ ကြံ့ခိုင်မှုနှင့် ရေပိုလွှဲများမှ မူလချောင်းများပေါ်သို့ ရေထွက်စီးဆင်းနေမှုများအပေါ် စိုးရိမ်ဖွယ် အခြေအနေမရှိကြောင်း ထုတ်ပြန်ထားသည်။
ဇွန်၁၂ ရက်စွဲဖြင့် ထုတ်ပြန်ချက်အရ ချင်းပြည်နယ်ရှိ လိုင်ဗားရေလှောင်တမံတွင် ရေ ၁ ဒသမ ၁၀ ပေအထိ ရေကျော်နေကြောင်း၊ စစ်ကိုင်းတိုင်းဒေသကြီး၊ ပုလဲမြို့ မြောက်ယမား ရေလှောင်တမံတွင်မူ ရေ ၁ ဒသမ ၇၀ ပေအထိ ရေကျော်နေကြောင်း၊ ကလေးခရိုင်ရှိ ရာဇဂြိုလ်ရေလှောင်တမံတွင် ရေ ၃ ဒသမ ၅၀ ပေအထိ ရေကျော်နေကြောင်း၊ ပြည်ခရိုင်ရှိ တောင်နဝင်းရေထိန်း တမံတွင် ရေ ၂ ဒသမ ၄၆ ပေအထိ ရေကျော်နေကြောင်း ထုတ်ပြန်ထားသည်။
ပြည်ခရိုင် ခဝါရေလှောင်တမံတွင် ရေ ၃ ဒသမ ၇၀ ပေအထိ ရေကျော်နေကြောင်း၊ သာယာဝတီခရိုင် မုက္ခာရေလှောင်တမံတွင် ၂ ဒသမ ၄၀ ပေအထိလည်းကောင်း၊ မင်းဘူးခရိုင် ရင်းရှည်ရေလှောင်တမံတွင် ၁ ဒ သမ ၂၀ ပေအထိ လည်းကောင်း၊ ကြီးအုံကြီးဝရေ လှောင်တမံတွင် ရေ ၇ ဒသမ ၃၀ ပေအထိ လည်းကောင်း၊ သရက်ခရိုင် မဒေးရေလှောင်တမံတွင် ၄ ဒသမ ၈၀ ပေအထိလည်းကောင်း၊ မြောက်ဦးခရိုင် ကြက်တက် ရေလှောင်တမံတွင် ၃ ဒသမ ၇၀ ပေ၊ တမန်းဒူး ရေလှောင်တမံတွင် ၄ ဒသမ ၇၅ ပေအထိလည်းကောင်း၊ ဟင်္သာတခရိုင် ကွန်ချောင်း ရေလှောင်တမံတွင် ၃ ဒသမ ၆၀ ပေ၊ နန်ကလူ ရေလှောင်တမံတွင် ၄ ဒသမ ၃၀ ပေ၊ ကညင်ရေလှောင်တမံတွင် ၉ ဒသမ ၈၀ ပေအထိ လည်းကောင်း ရေကျော်နေကြောင်း ထုတ်ပြန်ထားသည်။
ဇွန် ၁၁ ရက်နေ့ ထုတ်ပြန်ချက်အရ ရေလှောင်တမံ ၁၈ ခုမှ ရေပြည့်အမှတ် ကျော်လွန်လာသဖြင့် ရေပိုလွှဲမှ ရေကျော်စီးထွက်မှုများ ရှိနေသော်လည်း ထူးခြားအဆင့်အထိ ရေအများအပြား ထွက်နေသည့် အခြေအနေ လုံးဝမရှိပါကြောင်းနှင့် ဆည်တမံများ အားလုံးကိုလည်း တာဝန်ရှိသူများက အချိန်ပြည့် စောင့်ကြည့် ကြပ်မတ်လျက် ရှိသကဲ့သို့ ဆည်တမံများ၏ ကြံ့ခိုင်လုံခြုံရေးနှင့် ရေပိုလွှဲ ရေဆင်းဧရိယာ တစ်လျှောက်တွင် ထိခိုက်မှုမရှိစေရေးကိုလည်း ဒေသတာဝန်ရှိသူများနှင့် ကြိုတင်စီမံ ဆောင်ရွက်လျက် ရှိနေကြောင်း သိရသည်။
