၂၀၁၈ ခုနှစ် ဧပြီမှ စက်တင်ဘာလအထိ ကြားကာလခြောက်လအတွင်း ရင်းနှီးမြှုပ်နှံမများ ခွင့်ပြုပေးလျက်ရှိရာတွင် ဧပြီနှင့် မေနှစ်လအတွင်း သီလဝါအထူးစီးပွားရေးဇုန်တွင် ဝင်ရောက်ရင်းနှီးမြှုပ်နှံမှု၊ ရင်းနှီးမြှုပ်နှံမှု တိုးမြှင့်ခြင်းအပါအဝင် နိုင်ငံခြားရင်းနှီးမြှုပ်နှံမှုပမာဏ ဒေါ်လာ ၁၉၃ ဒသမ ၃၅၆ သန်း အထိ ဝင်ရောက်မြှုပ်နှံထားကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် သတင်းထုတ်ပြန်ချက်အမှတ်စဉ် (၇/ ၂၀၁၈) အရ သိရသည်။

မြန်မာနိုင်ငံရင်းနှီးမြှုပ်နှံမှုကော်မရှင်၏ အစည်းအဝေးအမှတ်စဉ် (၇/၂၀၁၈)  တွင် နိုင်ငံခြားရင်းနှီးမြှုပ်နှံမှု လုပ်ငန်းနှစ်ခုနှင့် အတည်ပြုလုပ်ငန်းခြောက်ခု စုစုပေါင်း လုပ်ငန်းရှစ်ခု ခွင့်ပြုခဲ့ကြောင်း သိရသည်။

အတည်ပြုလုပ်ငန်းခြောက်ခုမှာ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှ အတည်ပြုခဲ့သည့် လုပ်ငန်းငါးခု၊ ကရင်ပြည်နယ် ရင်းနှီးမြှုပ်နှံမှုကော်မတီမှ အတည်ပြုသည့် လုပ်ငန်းတစ်ခုရှိသဖြင့် အဆိုပါအစည်းအဝေးတွင် စုစုပေါင်းလုပ်ငန်းရှစ်ခုမှ ရင်းနှီးမြှုပ်နှံမှုပမာဏ ဒေါ်လာ ၃၃ ဒသမ ၂၉၉ သန်းကို ခွင့်ပြု/ အတည်ပြုပေးခဲ့ပြီး အဆိုပါလုပ်ငန်းများမှ ပြည်တွင်းလုပ်သားများအတွက် အလုပ်အကိုင်အခွင့်အလမ်းပေါင်း ၄၆၃၀ ခုကို ဖန်တီးပေးမည်ဖြစ်ကြောင်းနှင့် ခွင့်ပြု/ အတည်ပြုလုပ်ငန်းရှစ်ခုမှာ စက်မှုကဏ္ဍမှဖြစ်ကြောင်း သတင်းထုတ်ပြန်ထားသည်။

၂၀၁၈ ခုနှစ် ဧပြီလမှ စက်တင်ဘာလ ခြောက်လအတွင်း မေလအထိ နိုင်ငံခြားရင်းနှီးမြှုပ်နှံမှု ခွင့်ပြု/အတည်ပြုပေးခဲ့မှုမှာ နိုင်ငံခြားရင်းနှီးမြှုပ်နှံမှုလုပ်ငန်း ၁၅ ခု၊ ရင်းနှီးမြှုပ်နှံမှုပမာဏ ဒေါ်လာ ၉၇ ဒသမ ၁၃၆ သန်း ဖြစ်ကြောင်း သိရသည်။ ရင်းနှီးမြှုပ်နှံမှုတိုးမြှင့်ခြင်းအပါအဝင် စုစုပေါင်း ရင်းနှီးမြှုပ်နှံမှု ပမာဏ ဒေါ်လာ ၁၄၈ ဒသမ ၀၅၆ သန်းဖြစ်ကြောင်း သိရသည်။

အထူးစီးပွားရေးဇုန်ဥပဒေအရ သီလဝါ အထူးစီးပွားရေးဇုန်တွင် ရင်းနှီးမြှုပ်နှံမှုပမာဏ ဒေါ်လာ ၄၅ ဒသမ ၃၀၀ သန်း ခွင့်ပြုပေးခဲ့ကြောင်း သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင် ၏ (၇/၂၀၁၈) ကြိမ်မြောက် အစည်းအဝေးတွင် မော်တော်ယာဉ်နှင့် ဆိုင်ကယ်ထုတ်လုပ် ရောင်းချခြင်းနှင့် ပလတ်စတစ်ပစ္စည်းအမျိုးမျိုး ထုတ်လုပ်ရောင်းချခြင်းလုပ်ငန်းများ လုပ်ကိုင်ရန် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) က ခွင့်ပြုခဲ့ကြောင်း သိရသည်။

ရန်ကုန်တိုင်းဒေသကြီး ရွှေပြည်သာမြို့နယ်တွင် Shwe Daehan Motors Company Limited မှ ရာနှုန်းပြည့် နိုင်ငံခြားရင်းနှီးမြှုပ်နှံမှုဖြင့် မော်တော်ယာဉ်နှင့် မော်တော်ဆိုင်ကယ်များ ထုတ်လုပ်ရောင်းချခြင်းနှင့် ရောင်းချပြီးနောက်ပိုင်း ဝန်ဆောင်မှုပေးခြင်း လုပ်ငန်းများ လုပ်ကိုင်ခွင့်ပြုခဲ့ခြင်း ဖြစ်သည်။

မန္တလေးတိုင်းဒေသကြီး ပုသိမ်ကြီးမြို့နယ်တွင် Myanmar Conch (Mandalay) Green Building Materials Company Limited က ဆောက်လုပ်ရေးလုပ်ငန်းသုံး ပလတ်စတစ်ပစ္စည်းအမျိုးမျိုး ထုတ်လုပ်ရောင်းချခြင်းလုပ်ငန်းများကို ဖက်စပ်နိုင်ငံခြားရင်းနှီးမြှုပ်နှံမှုဖြင့် လုပ်ကိုင်ခွင့်ပြုခဲ့ခြင်း ဖြစ်သည်။

မြန်မာနိုင်ငံ ရင်းနှီးမြှုပ်နှံမှု ဥပဒေနှင့်အညီ တင်ပြလာသည့် အဆိုပြုချက်များအပေါ်  ဆွေးနွေးစိစစ်မှုပြုရန်အတွက် မြန်မာနိုင်ငံ ရင်းနှီးမြှုပ်နှံမှုကော်မရှင်၏ (၇/၂၀၁၈) ကြိမ်မြောက် အစည်းအဝေးကို မေ ၂၉ ရက်တွင် ရန်ကုန်မြို့၌ ကျင်းပသည်။

အဆိုပါအစည်းအဝေးတွင် ရင်းနှီးမြှုပ်နှံသူက တင်ပြလာသော ခွင့်ပြုမိန့်နှင့် အတည်ပြုမိန့် လျှောက်ထားလွှာများအားစိစစ်ခြင်း၊ မြန်မာနိုင်ငံရင်းနှီးမြှုပ်နှံမှုကော်မရှင်ခွင့်ပြု မိန့်ရရှိပြီးသောကုမ္ပဏီများမှ တင်ပြလာသည့် အထွေထွေကိစ္စရပ်များနှင့် စပ်လျဉ်း၍ဆွေးနွေးခြင်းတို့ကို ဆောင်ရွက်ခဲ့ကြသည်။