အမျိုးသားဒီမိုကရေစီအဖွဲ့ချုပ်ပါတီ (NLD ) လွှတ်တော်ကိုယ်စားလှယ်များနှင့် ပတ်သက်သည့် တိုင်ကြားစာ နှစ်နှစ်အတွင်း ၃၅၀ ကျော်ရှိပြီး အဂတိလိုက်စားမှုနှင့်ပတ်သက်သည့် တိုင်စာများလည်းပါဝင်နေကြောင်း NLD ပါတီ၏ တိုင်ကြားစာကော်မတီဌာန တာဝန်ခံ၊ ပါတီပြောရေးဆိုခွင့်ရှိသူ ဒေါက်တာမျိုးညွန့်၏ ပြောကြားချက်အရ သိရသည်။
တိုင်ကြားစာကော်မတီဌာနသို့ ရောက်ရှိလာသည့် တိုင်စာများတွင် NLD လွှတ်တော်ကိုယ်စားလှယ်များ၏ လုပ်ငန်းဆောင်ရွက်မှုညံ့ဖျင်းခြင်း အကြောင်းအရာများ၊ သက်ဆိုင်ရာဒေသများတွင် တာဝန်ကျေပွန်မှု မရှိခြင်းနှင့် တာဝန်ပေးအပ်ခံထားရခြင်းမရှိဘဲ အုပ်ချုပ်ရေးပိုင်းများတွင် ဝင်ရောက်စွက်ဖက်ခြင်း စသည့်အကြောင်းအရာများကို အများဆုံးတိုင်ကြားထားကြောင်း ဒေါက်တာမျိုးညွန့်က ပြောကြားသည်။
ဒေါက်တာမျိုးညွန့်က “NLD လွှတ်တော်အမတ်တွေကို တိုင်ကြားထားတဲ့ တိုင်ကြားစာ ၃၅၀ ကျော်ဆိုတာက ကျွန်တော်တို့ နှစ်နှစ်အတွင်းကဟာကို ပြောတာပါ။ ကျွန်တော်တို့ တိုင်ကြားစာကော်မတီ စဖွဲ့ပြီးကတည်းက အခုချိန်အထိ လုပ်ခဲ့တာကိုပြောတာပါ။ တိုင်ကြားစာတွေထဲမှာ အဓိကတိုင်ကြားနေတာတွေက လွှတ်တော်ကိုယ်စားလှယ်တွေဟာ သက်ဆိုင်ရာမြို့နယ်တွေနဲ့ ပူးပေါင်းဆောင်ရွက်မှု မရှိဘူး။ ဆက်ဆံရာမှာ မောက်မာတယ်။ သူတို့ရဲ့ တာဝန်တွေကို ကျေပွန်ခြင်း မရှိဘူး။ ဒီလိုအချက်တွေများတယ်။ နောက်တစ်ခါ အုပ်ချုပ်ရေးတို့၊ ကိုယ်နဲ့မဆိုင်တဲ့ နေရာတွေမှာ တာဝန်ပေးအပ်ခြင်းမရှိဘဲနဲ့ ဝင်ရောက်စွက်ဖက်တယ်လို့ တိုင်ထားတာတချို့လည်း ရှိပါတယ်။ NLD လွှတ်တော်ကိုယ်စားလှယ်တွေကို တိုင်ကြားတဲ့ တိုင်ကြားစာတွေထဲမှာ အဂတိလိုက်စားမှုနဲ့ပတ်သက်ပြီးတော့ တိုင်စာပို့ထားတာတွေလည်း အနည်းငယ် တော့ရှိပါတယ်” ဟု ပြောကြားသည်။
အဂတိလိုက်စားမှုနှင့်ပတ်သက်၍ တိုင်ကြားစာ အနည်းငယ်ရှိသော်လည်း ကျယ်ကျယ်ပြန့်ပြန့် အပြစ်ပေးခဲ့ရခြင်းမျိုး မရှိခဲ့ကြောင်း ၎င်းက ဆက်လက်ပြောကြားသည်။
“ကျွန်တော်တို့က အဂတိလိုက်စားမှုကို အထူးအာရုံစိုက်ပြီးတော့ လုပ်ပါတယ်။ တိုင်ကြားစာဌာနက အဂတိလိုက်စားမှုထက်ကို ပိုပြီးကျယ်ပြန့်ပါတယ်။ ကျွန်တော်တို့ကျတော့ ပါတီရဲ့ ပုံရိပ်ထိခိုက်လောက်အောင် ကိုယ်စားလှယ်ရဲ့လုပ်ဆောင်မှုဟာ ပြည်သူတွေအမြင်မှာ အဂတိလိုက်စားတယ် ဒီလိုပုံစံဖြစ်လောက်အောင် သူ့ရဲ့ပြောဆိုမှုဟာ မသင့်တော်ဘူးထင်ရင် ကျွန်တော်တို့က ပါတီစည်းကမ်းအရ အရေးယူအပြစ်ပေးတော့ ကျွန်တော်တို့က ပိုပြီးကျယ်ပြန့်ပါတယ်။ အခုထိတော့ ကျယ်ကျယ်ပြန့်ပြန့် အပြစ်ပေးခဲ့ရတာမျိုးတော့ မရှိပါဘူး။ အဂတိလိုက်စားမှုနဲ့ တိုင်ကြားလို့ စစ်ဆေးတွေ့ရှိတယ်ဆိုရင် ကျွန်တော်တို့က သက်ဆိုင်ရာ အလုပ်အမှုဆောင်အဖွဲ့ကို တရားစွဲဆိုဖို့၊ ဒါမှမဟုတ် ဌာနဆိုင်ရာလူ ပုဂ္ဂိုလ်ကို သက်ဆိုင်ရာဥပဒေကြောင်းအရလုပ်ဖို့ ကျွန်တော်တို့က မူဝါဒထားပါတယ်။ ဒီလိုမှမဟုတ်ရင် ကျော်စောမှုလောက်ပဲ ဖြစ်တယ်ဆိုရင်တော့ ပါတီရဲ့စည်းကမ်းထိန်းသိမ်းရေးလုပ်ခြင်း၊ သတိပေးခြင်း၊ ဒါမှမဟုတ် ဒီထက်ပြင်းထန်တဲ့ စာဖြင့်ရေးသားသတိပေးခြင်း ပြစ်ဒဏ်တွေပေးပါတယ်” ဟု ဒေါက်တာမျိုးညွန့်က ဆိုသည်။
အဆိုပါ တိုင်စာ ၃၅၀ ကျော်ရှိသည့်အနက် ၄၀ ကျော်အား အရေးယူဆောင်ရွက်မှုများ လုပ်ဆောင်ထားကြောင်း၊ တချို့တိုင်ကြားစာများတွင် ပါတီနှင့်မသက်ဆိုင်သော၊ ပါတီလုပ်ပိုင်ခွင့်ထက်ကျော်လွန်သော မြေယာပြန်လည်ရလိုမှု၊ တရားရုံးအမှုများတွင် ကူညီဆောင်ရွက်ပေးစေလိုမှု စသည့်အကြောင်း အရာများလည်းပါဝင်ကြောင်း၊ တချို့တိုင်ကြားသူများအနေဖြင့်လည်း ပါတီစည်းကမ်းအရ ကိုယ်စားလှယ်များကို ထိန်းသိမ်းစေလိုခြင်းထက် ပုဂ္ဂိုလ်စွဲ၊ အာဃာတအစွဲများဖြင့် တိုင်ကြားသည်ဟု သံသယဖြစ်ဖွယ်ရာများလည်းတွေ့ရကြောင်း ဒေါက်တာမျိုးညွန့်က ပြောကြားသည်။
၂၀၁၈ ခုနှစ်အတွင်း NLD ပါတီဝင် အိမ်မဲမြို့နယ် မဲဆန္ဒနယ်အမှတ် (၂) လွှတ်တော်ကိုယ်စားလှယ် ဦးအောင်ကျော်မြိုင်သည် လုပ်ပိုင်ခွင့်အား အလွဲသုံးစားလုပ်၍ ကျေးရွာမီးလင်းရေးနှင့်ပတ်သက်၍ ဒေသခံများထံမှ ကျပ်သိန်း ၁၀၀ အား မမှန်မကန် တောင်းခံခဲ့သည်ဟုဆိုကာ NLD ပါတီနှင့် အဂတိလိုက်စားမှုတိုက်ဖျက်ရေးကော်မရှင်ထံ တိုင်ကြားခံခဲ့ရပြီး အဂတိလိုက်စားမှု တိုက်ဖျက်ရေးကော်မရှင်က အရေးယူခြင်းမရှိဘဲ သက်ဆိုင်ရာ လွှတ်တော်ကသာ အရေးယူ ဆောင်ရွက်ရန် အကြောင်းပြန်ကြားခဲ့သည့် ဖြစ်စဉ်တစ်ခု ဖြစ်ပေါ်ခဲ့သည်။
