ရှမ်းပြည်နယ် လင်းခေးမြို့တွင် ပြုလုပ်မည့် ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ယာယီရွှေ့ဆိုင်းကြောင်း NCA လက်မှတ်ရေးထိုးထားသည့် ရှမ်းပြည် ပြန်လည်ထူထောင်ရေးကောင်စီ (RCSS/SSA) ဗဟိုအလုပ်အမှုဆောင်ကော်မတီက ဇန်နဝါရီ ၈ ရက်တွင် ထုတ်ပြန်သည်။
တပ်မတော်နှင့် NCA ရေးထိုးထားသည့် ရှမ်းပြည်ပြန်လည်ထူထောင်ရေးကောင်စီ (RCSS/SSA) အကြား လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ (ရှမ်း) ကျင်းပမည့်နေရာ အငြင်းပွားနေမှုအပေါ် ၂၀၁၇ ခုနှစ် နိုဝင်ဘာ ၂၇ ရက်က ပြုလုပ်သည့် (၆) ကြိမ် မြောက် တစ်နိုင်ငံလုံး ပစ်ခတ်မှုရပ်စဲရေး သဘောတူစာချုပ် အကောင်အထည်ဖော်မှုဆိုင်ရာ ညှိနှိုင်းအစည်းအဝေး (JICM) တွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကြားဝင်စေ့စပ်ညှိနှိုင်းပေးမှုအရ ၂၀၁၈ ခုနှစ် ဇန်နဝါရီလအတွင်း ရှမ်း ပြည်နယ် လင်းခေးမြို့၌ပြုလုပ်ရန် သဘောတူဆုံးဖြတ်ထားခြင်းဖြစ်သည်။
“(ပြန်လုပ်မယ့်အချိန်) ကျွန်တော်တို့ ညှိနှိုင်းလို့ အဆင်ပြေတဲ့အချိန်ပေါ့။ အချိန်ကြောင့် မဟုတ်ဘူး။ အခြေအနေတွေကြောင့်ပါ” ဟု (RCSS/SSA) တောင်ကြီးဆက်ဆံရေးရုံး တာဝန်ခံ ဒုတိယဗိုလ်မှူးကြီးစိုင်းဦးက ပြောကြားသည်။
(RCSS/SSA) ၏ ထုတ်ပြန်ချက်တွင် NCA စာချုပ်ပါ နိုင်ငံရေးလမ်းပြမြေပုံအဆင့် (၃) အရဖြစ်စေ၊ နိုင်ငံရေးဆွေးနွေးမှုဆိုင်ရာ မူဘောင်အရဖြစ်စေ၊ JICM အစည်းအဝေး ဆုံးဖြတ်ချက်အရဖြစ်စေ၊ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို လင်းခေးခရိုင်၊ လင်းခေးမြို့တွင် RCSS/SSA က ဦးဆောင်ကမကထပြု ကျင်းပသွားမည် ဖြစ်ကြောင်း၊ လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲများ လုပ်ငန်းစဉ်အရ အမျိုးသားအဆင့် နိုင်ငံရေးဆွေးနွေးပွဲ (အကြို) သို့မဟုတ် လူထုတွေ့ဆုံပွဲများကို မြန်မာနိုင်ငံ တစ်ဝန်းရှိ ရှမ်းလူမျိုးများ နေထိုင်ရာဒေသများတွင် ကျင်းပရမည်ဖြစ်သောကြောင့် လူထုaတွ့ဆုံပွဲများကို ရှမ်းပြည်အတွင်း၌သော်လည်းကောင်း၊ ရှမ်းလူမျိုးများရှိရာ ရှမ်းပြည် ပြင်ပမြို့များတွင်သော်လည်းကောင်း အစိုးရ၏ သဘောတူညီချက်နှင့် ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးသဘောတူ စာချုပ်ပါအချက်တို့ဖြင့် ပြုလုပ်ရခြင်းဖြစ်ကြောင်း ရေးသားထားသည်။
ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ကျင်းပမည့်နေရာကို အစိုးရ၊ တပ်မတော်တို့နှင့် အကြိမ်ပေါင်းများစွာ ညှိနှိုင်းရာ၌ တောင်ကြီး၊ ကျိုင်းတုံ၊ လားရှိုး နှင့် အခြားနေရာများတွင် အမျိုးသားအဆင့် နိုင်ငံရေးဆွေးနွေးပွဲ (အကြို) နှင့် လူထုတွေ့ ဆုံပွဲများ ကျင်းပနိုင်သည်ဟု အစိုးရမှ သဘောတူခဲ့၍သာ RCSS/SSA အနေဖြင့် လင်းခေးမြို့၌ကျင်းပရန် လက်ခံခဲ့ခြင်းဖြစ်ကြောင်း၊ ရှမ်းပြည်နယ်မြို့တော်ဖြစ်သည့် တောင်ကြီးမြို့တွင် ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ (အကြို) ကျင်းပခြင်းသည် ရှမ်းအမျိုးသားတစ်ရပ်လုံး၏ သမိုင်းအစဉ် အလာအရသော်လည်းကောင်း၊ နိုင်ငံရေး ဂုဏ်သိက္ခာအရသော်လည်းကောင်း၊ အမျိုးသားတန်းတူရေးအရသော်လည်းကောင်း၊ အမျိုးသားအဆင့် နိုင်ငံရေးဆွေးနွေးပွဲများ၏ တရားဝင်မှုအရသော်လည်းကောင်း၊ ယုံကြည်မှုတည်ဆောက်ခြင်းအရသော်လည်း အလွန်အရေးကြီးလှကြောင်း RCSS/SSA ထုတ်ပြန်ချက်တွင် ပါရှိသည်။
ယင်းအပြင် ပြုလုပ်သွားခဲ့သည့် အကြိုလူထုတွေ့ဆုံပွဲများတွင် တပ်မတော်မှ နည်းအမျိုးမျိုးဖြင့် ခြိမ်းခြောက်ဟန့်တားခဲ့သည့်အတွက် တွေ့ဆုံပွဲသို့တက်ရောက်ခဲ့ကြသော ပြည်သူလူထုများသည် ၎င်းတို့၏ လွတ်လပ်သော အမြင်သဘောထားများကို ဒီမိုကရေစီ နည်းကျ အပြည့်အ၀ ထုတ်ဖော်တင်ပြဆွေးနွေးရန် မည်သို့မျှ မဖြစ်နိုင်ခဲ့ကြောင်းလည်း ထုတ်ပြန်ချက်တွင် ရေးသားထားသည်။
“ဒါဟာ ယုံကြည်မှုပျက်ပြားသွားတဲ့ သဘောကို ပြတာလို့ပဲပြောရပါမယ်။ အပြန်အလှန် လေးစားအသိအမှတ်ပြုမှုရှိဖို့ဆိုရင် ရိုးသားမှုရှိရမယ်။ အပြောနဲ့အလုပ် ကိုက်ညီဖို့လိုတယ်။ လင်းခေးက စလိုက်တဲ့ပြဿနာကြောင့် ၂၁ ပင်လုံ ပျက်ရတယ်ဆိုတာမျိုး ဖြစ်ချင် ဖြစ်လာဦးမှာ။ တိကျရှင်းလင်းတဲ့ မူဘောင်တွေ မရှိလို့၊ တိကျပြတ်သားတဲ့ လုပ်ငန်းလမ်းညွှန်တွေမရှိလို့၊ ရဲရင့်ပြတ်သားတဲ့ ဦးဆောင်လမ်းညွှန်တွေမရှိလို့ အမြန်ပြုပြင် သုံးသပ်ရပါမယ်။ အစိုးရကိုယ်တိုင် အမှားကို ဝန်မခံဘူး။ ထမင်းရည်ပူလျှာလွှဲ ဆက်လုပ်မယ်ဆိုရင် ငြိမ်းချမ်းရေးလုပ်ငန်းစဉ်တွေ ရပ်တန့်သွားပါလိမ့်မယ်” ဟု ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) တွဲဖက်အတွင်းရေးမှူ (၁) ဦးစိုင်းလိတ်က ပြောကြားသည်။
ရှမ်းပြည်နယ်အတွင်းရှိ ၅၅ မြို့နယ်အနက် မြို့နယ်ပေါင်း ၁၄ မြို့နယ်တွင် အမျိုးသားအဆင့် နိုင်ငံရေးဆွေးနွေးပွဲ (အကြို) လူထုတွေ့ဆုံပွဲများကို ၂၀၁၇ ခုနှစ် ဒီဇင်ဘာ ၁၇ ရက်မှ ၂၅ ရက်အတွင်း ပြုလုပ်ခဲ့ရာ မြို့နယ်အများစုတွင် တပ်မတော်၏ နည်းမျိုးစုံ ဖြင့် နှောင့်ယှက်ဟန့်တားခြင်းကို ခံခဲ့ရကြောင်း၊ ပင်လုံ၊ တာချီလိတ်၊ ကာလိ၊ ကျောက်မဲစသည့် မြို့နယ်များတွင် အဆိုးရွားဆုံးဖြစ်ပွားခဲ့ကြောင်း၊ ၂၀၁၇ ခုနှစ် ဒီဇင်ဘာ ၁၇ ရက်က ပင်လုံမြို့တွင် လူထုတွေ့ဆုံပွဲကျင်းပရန် စီစဉ်နေစဉ် တပ်မတော်မှ တိုက်ပွဲဝင်လက်နက်အပြည့်အစုံဖြင့် ဝင်ရောက်တားဆီးပိတ်ပင်ခြင်းသည် ပြည်ထောင်စုသမိုင်းတွင် အမည်းစက်ကြီးအဖြစ် ထာဝရ စွန်းထင်းစေခဲ့ပြီဖြစ်ကြောင်း RCSS/SSA ၏ ထုတ်ပြန်ချက်တွင်ပါရှိသည်။
ထို့ပြင် ၂၀၁၇ ခုနှစ် ဒီဇင်ဘာ ၁၉ ရက် တွင် တပ်မတော်က လူထုတွေ့ဆုံပွဲများ လုံး၀ မပြုလုပ်ရန် စာဖြင့် အကြောင်းကြားပိတ်ပင် တားဆီးခဲ့ကြောင်း၊ တစ်ဖက်တွင်လည်း ဒီဇင်ဘာ ၂၂ ရက်၌ ရှမ်းပြည်တွင်း အမျိုးသားအဆင့် နိုင်ငံရေးဆွေးနွေးပွဲ (အကြို) လူထုတွေ့ ဆုံပွဲများ ကျင်းပခွင့်ပြုသည့် သက်ဆိုင်ရာခရိုင်များအား ညွှန်ကြားခဲ့သော ညွှန်ကြားချက်ကို ရှမ်းပြည်နယ်အစိုးရအဖွဲ့က ပြန်လည်ရုပ်သိမ်းခဲ့သဖြင့် ကျန်ရှိသည့် တောင်ကြီး၊ ကာလိ၊ ကျောက်မဲ၊ မန္တလေး စသည့်မြို့နယ်များတွင် ကျင်းပမည့် လူထုတွေ့ဆုံဆွေးနွေးပွဲများအား ရပ်ဆိုင်းခဲ့ရကြောင်း ထုတ်ပြန်ချက်တွင် ရေးသားထားသည်။
လူထုတွေ့ဆုံပွဲမှ ရရှိလာသော ရှမ်းလူထု သဘောထားအမြင်များကိုစုစည်း၍ ၂၀၁၈ ခုနှစ် ဇန်နဝါရီ ၇၊ ၈၊ ၉ ရက်များတွင် တောင်ကြီးမြို့၌ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ (အကြို) နောက်ဆုံးပွဲ ကျင်းပကာ ရရှိလာသော ရှမ်းလူထုသဘော ထားစာတမ်း မူကြမ်းများအား အတည်ပြုစာတမ်းမူကြမ်းများဖြစ်အောင် ဆောင်ရွက်ရန် နှင့် ထိုမှတစ်ဆင့် တရားဝင်အမျိုးသားအဆင့် နိုင်ငံရေးဆွေးနွေးပွဲကို လင်းခေးမြို့တွင် သတ်မှတ်ထားသည့် နေ့ရက်အတိုင်း ဆက်လက် ကျင်းပသွားရန် စီစဉ်ခဲ့ကြောင်း၊ အဆိုပါ တောင်ကြီးမြို့တွင် အကြိုဆွေးနွေးပွဲကျင်းပနိုင်ရေးအတွက် RCSS/SSA ဥက္ကဋ္ဌက နိုင်ငံတော်၏အတိုင်ပင်ခံပုဂ္ဂိုလ်နှင့် တပ်မတော်ကာကွယ်ရေးဦးစီးချုပ်ထံသို့ စာရေးသားပေးပို့၍ ညှိနှိုင်းခဲ့သည့်အပြင် RCSS/SSA အတွင်းရေးမှူး (၃) ဗိုလ်မှူးကြီးစိုင်းငင်းကိုလည်း ရန်ကုန်နှင့် နေပြည်တော်တွင် အစိုးရ၏ ငြိမ်းချမ်းရေးကော်မရှင်၊ တပ်မတော်၏ကိုယ်စားလှယ်တို့နှင့် ၂၀၁၇ ခုနှစ် ဒီဇင်ဘာလကုန်ရက်များတွင် သွားရောက်တွေ့ဆုံဆွေးနွေး ညှိနှိုင်းစေခဲ့ကြောင်း၊ သို့သော် နိုင်ငံတော်၏ အတိုင်ပင်ခံပုဂ္ဂိုလ်နှင့် တပ်မတော်ကာကွယ် ရေးဦးစီးချုပ်ထံမှ မည်သည့် တရားဝင် အကြောင်းပြန်ကြားချက်ကိုမျှ လက်ခံရရှိခြင်း မရှိကြောင်း RCSS/SSA ထုတ်ပြန်ချက်တွင် ပါရှိသည်။
သို့ဖြစ်၍ အထက်ဖော်ပြပါ အကြောင်းရင်းများနှင့် တောင်ကြီးမြို့တွင် ရှမ်းလူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ (အကြို) ကျင်းပခြင်းကို တပ်မတော်မှ တားမြစ်ပိတ်ပင်ခဲ့သောကြောင့် RCSS/SSA သည် လင်းခေးမြို့တွင်ကျင်းပမည့် ရှမ်းလူမျိုး အလိုက် အမျိုးသားအဆင့် နိုင်ငံရေးဆွေးနွေးပွဲကို သတ်မှတ်ထားသည့် ၂၀၁၈ ခုနှစ် ဇန်နဝါရီ ၁၂ ရက်မှ ၁၄ ရက်များ၌ ကျင်းပခြင်းအား ယာယီရွှေ့ဆိုင်းထားကြောင်း RCSS/SSA က ထုတ်ပြန်သည်။
