တောင်သားလူမျိုးများ၏ ပထမဆုံးအကြိမ်တွေ့ဆုံပွဲကို ဒီဇင်ဘာ ၃ ရက်တွင် မကွေးတိုင်းဒေသကြီး ထီးလင်းမြို့နယ် ဝက်သက်ကျေးရွာတွင် ကျင်းပစဉ်
မကွေးတိုင်းဒေသကြီး ယောဒေသအတွင်း အများဆုံးနေထိုင်သော ရှေးဟောင်းပျူ လူမျိုးများဟုသိရှိကြသော တောင်သားလူမျိုးများသည် ကုတ်နံပါတ်ရရှိသည်အထိ တင်ပြဆောင်ရွက်သွားမည်ဟု တောင်သားလူမျိုးတစ်ဦးဖြစ်သူ ဆောမြို့နယ် တိုင်းဒေသကြီး လွှတ်တော်ကိုယ်စားလှယ် ဦးကျော်မြင့်က ပြောကြားသည် ။
“ကျွန်တော်က မကွေးတိုင်းဒေသကြီး လွှတ်တော်မှာ တိုင်းရင်းသားရေးရာကော်မတီ အတွင်းရေးမှူးဖြစ်တဲ့အပြင် ကျွန်တော်ကိုယ်၌ကလည်း တောင်သားလူမျိုးဖြစ်တဲ့အတွက် တောင်သားလူမျိုးများ တွေ့ဆုံပွဲမှာ ပါဝင်ခဲ့တာပါ ။ တိုင်းရင်းသားရေးရာ ဥပဒေအခန်း ၅ (ည) မှာ ပျောက်ကွယ်လုဖြစ်နေသော၊ လူနည်းစုဖြစ်နေသော လူမျိုးများကို ဖော်ထုတ်ပေးရမယ်လို့ ဥပဒေမှာ ပြဋ္ဌာန်းထားပါတယ်။ ကျွန်တော်တို့ တောင်သားလူမျိုးများကလည်း ပျောက်ကွယ်လုလည်း ဖြစ်နေတယ်၊ လူနည်းစုဖြစ်နေတဲ့အတွက် ကျွန်တော်တို့ တောင်သားလူမျိုးတွေ ပပျောက်မသွားအောင် ဖော်ထုတ်နေရခြင်းဖြစ်ပါတယ်။ တွေ့ဆုံပွဲကနေပြီးတော့ နှစ်စဉ်တွေ့ဆုံပွဲ နှစ်စဉ်ကျင်းပနိုင်အောင်၊ တွေ့ဆုံနိုင်အောင်၊ ဖော်ထုတ်နိုင်အောင် ကော်မတီဖွဲ့ပါ့မယ်။ အဲဒီနောက် ကော်မတီအနေနဲ့ တိုင်းရင်းသားရေးရာဝန်ကြီးထံ အစီရင်ခံစာရေးပါမယ်။ ပျူလူမျိုးနွယ်တောင်သား လူမျိုးတွေ အမှန်တကယ်ရှိတဲ့အကြောင်း ဖော်ထုတ်ပေးဖို့ရာ တိုင်းလွှတ်တော်ကတစ်ဆင့် တိုင်းအစိုးရကို တင်ပြပါမယ်။ တိုင်းအစိုးရကနေ ထောက်ခံချက်ပေးမယ်ဆိုရင်တော့ ပြည်ထောင်စုလွှတ်တော်ကို တင်ပေးဖို့ရှိပါမယ်။ ဒါမှလည်း ကုတ်နံပါတ်ရလာမယ်၊ ကုတ်နံပါတ်ရလာရင် စာပေသင်ကြားဖို့၊ ယဉ်ကျေးမှုထိန်းသိမ်းဖို့တွေ ဖြစ်လာမှာပါ” ဟု ဦးကျော်မြင့်က ပြောကြားသည် ။
တောင်သားလူမျိုးများ၏ ပထမဆုံးအကြိမ် တွေ့ဆုံပွဲကို ဒီဇင်ဘာ ၃ ရက်တွင် မကွေးတိုင်းဒေသကြီး ထီးလင်းမြို့နယ် ဝက်သက်ကျေးရွာတွင် ကျင်းပခဲ့ပြီး မကွေးတိုင်းဒေသကြီးလွှတ်တော် ဥက္ကဋ္ဌဦးတာနှင့် တာဝန်ရှိသူများ၊ မကွေးတိုင်းဒေသကြီး ချင်းတိုင်းရင်းသားရေးရာဝန်ကြီး ဦးလှထွန်း၊ လွှတ်တော်ကိုယ်စားလှယ်များ၊ အနယ်နယ်အရပ်ရပ်ရှိ တောင်သားလူမျိုးများ တက်ရောက်ခဲ့ကြသည်ဟု သိရသည်။
“တောင်သားလူမျိုးတွေ ရှင်သန်နိုင်ဖို့ဆိုရင် နိုင်ငံတော်ကအသိအမှတ်ပြုမှပဲ ရှင်သန်နိုင်မယ်လေ။ ပထမဆုံး နိုင်ငံတော်က ကုတ်နံပါတ်ရဖို့အတွက် ပထမကြိုးစားမယ်ပေါ့။ တောင်သားလူမျိုးအင်အား ဘယ် လောက်ရှိသလဲဆိုတာ တွေ့ဆုံပွဲကြီးလုပ် လိုက်တာပါ။ ဒီပွဲမှာလာတဲ့ လွှတ်တော်က လူတွေ သတင်းမီဒီယာတွေကနေတစ်ဆင့် အင်အားဘယ်လောက်ရှိတယ်၊ တောင်သားလူမျိုး တကယ်ရှိတယ်ဆိုတာ ပြလိုက်တာပါ။ ဒီကတစ်ဆင့် ညီညွတ်စည်းလုံးမှုနဲ့တစ်ဆင့် ကုတ်နံပါတ်ရရှိအောင် တစ်နှစ်ပြီးတစ်နှစ် စာပေတွေ ပြုစုယဉ်ကျေးမှုတွေ ထိန်းသိမ်းကာ ဖော်ထုတ်မယ်လို့ စိတ်ကူးထားပါတယ်။ ဒီတွေ့ဆုံပွဲ လုပ်နိုင်လိုက်တဲ့အတွက် ရလိုက်တဲ့ ရည်ရွယ်ချက်က မြို့နယ်ပေါင်းစုံက စိတ်ဝင်စားတယ်။ တောင်သားတွေကတင် စိတ်ဝင်စားတာတင် မဟုတ်ဘဲနဲ့ တခြားလူမျိုးတွေကပါ စိတ်ဝင်စားလာတယ်။ တောင်သားတွေကိုယ်တိုင်လည်း အားလုံးလာရောက်ပြီးတော့ စိတ်ဝင်စားကြပါတယ်။ တောင်သားအကျိုး ဆောင်ရွက်မယ့်သူတွေလည်း ပေါ်ပေါက်လာကြပါတယ်။ ဒီကနေ ကော်မတီထပ်ဖွဲ့ပြီး စာပေပြုစုဖို့၊ ယဉ်ကျေးမှုထိန်းသိမ်းဖို့နဲ့ ကုတ်နံပါတ်ရရှိရေးအတွက် သက်ဆိုင်ရာ အစိုးရအဖွဲ့တွေ တင်ပြဖို့အတွက် ကြိုးစားသွားပါမယ်” ဟု ကျောက်ထုမြို့နယ်မှ တောင်သားလူမျိုး ဦးအောင်ကျော်ပိုင်က ပြောကြားသည်။
တောင်သားလူမျိုးများသည် ချင်းပြည်နယ် မင်းတပ်မြို့နယ်၊ မကွေးတိုင်းဒေသကြီးအတွင်း ထီးလင်းမြို့နယ်၊ ဂန့်ဂေါမြို့နယ်၊ ဆောမြို့နယ်နှင့် စေတုတ္တရာမြို့နယ်အတွင်း ပျံ့နှံနေထိုင်ကြသည်ဟု သိရသည်။
“တောင်သားလူမျိုးတွေက တဖြည်းဖြည်း ပျောက်ကွယ်တော့မယ်ဆိုတော့ ကိုယ့်ကိုယ်ကိုယ် တောင်သားလူမျိုးဆိုပြီးပြောဆိုဖို့အတွက် သိမ်ငယ်နေကြတယ်။ ငါတို့တောင်သား လူမျိုးတွေဆိုတာပြောဆိုဖို့အတွက်တောင် ကြောက်ရွံ့နေကြတယ်။ အဲဒီလိုဖြစ်နေတဲ့ တောင်သားလူမျိုးတွေကို စိတ်ဓာတ်နှိုးဆွ စည်းရုံးတဲ့အနေနဲ့ စာအုပ်ထုတ်လိုက်တာပါ။ အဲဒီလိုလုပ်ဆောင်မှုက အခုလို နိုးကြားလာပြီးတော့ တွေ့ဆုံပွဲပြီးဖြစ်မြောက်လာသည်အထိပါပဲ။ ဒီစာအုပ် သမိုင်းမှာပါတဲ့ တစ်ချိန်တုန်းက ပုပ္ပားနယ်ဒေသ တောင်ပရွာဒေကနေ ပုဂံသမုတိမင်းရဲ့ရန်ကို ကြောက်ရွံ့ပြီးတော့ ထွက်ပြေးတိမ်းရှောင်လာတဲ့ ပျူမျိုးနွယ်စုလို့ သက်ကြီးစကားသက်ငယ်စကားနဲ့ မှတ်သားခဲ့ရပါတယ်။ ပုပ္ပားနယ်ကနေ ဧရာဝတီကျော်ပြီးတော့ ပုံတောင်၊ ပုံညာကိုဖြတ်ကာ ထီးလင်းနယ်ကို ရောက်ခဲ့ရပါတယ်။ ထီးလင်းနယ်မှာလည်း အတည်တကျမနေနိုင်ကြတော့ မင်းရန်ကိုကြောက်ရတော့ ထပ်ပြီးတော့ ချင်းတောင်ကြားထဲကို ရောက်သွားတယ်။ အဲဒီမှာလည်း နှစ်ပေါင်းများစွာ ပုန်းအောင်းနေပြီးတော့ ပုဂံသမုတိမင်း နတ်ရွာစံတော့မှ ထီးလင်းနယ်ကို ဆင်းလာခဲ့တယ်။ အခု ဝက်သက်ကျေးရွာ (ထီးလင်းမြို့နယ်) ဟာ ထီးလင်းနယ်ကိုဆင်းတုန်းက အရင်ဆုံး တည်ထောင်ခဲ့တဲ့ရွာပေါ့။ ကျွန်တော်တို့ တောင်သားလူမျိုးတွေက ပြေးလွှားတိမ်းရှောင်ပြီးတော့ အားလုံးကိုကြောက်ရပြီး တိမ်မြုပ်ကာ အစစအရာရာ သိမ်ငယ်နေတာကို အားပေးချင်လို့ တောင်သားလူမျိုးစာအုပ်လေး ရေးပေးလိုက်တာပါ။ ဝယ်ပါဆို လူတိုင်းမဝယ်နိုင်ဘူး၊ အခမဲ့ဆိုတော့ လူတိုင်းဆီ ရောက်သွားတယ်” ဟု တောင်သားလူမျိုးများ တွေ့ဆုံပွဲတွင် တောင်သားလူမျိုးများအကြောင်း စာအုပ်အခမဲ့ဖြန့်ဝေခဲ့သူ ကျောက်ထုမြို့မှ တောင်သားလူမျိုး ဦးအောင်ကျော်ပိုင်က ပြောကြားသည်။
တောင်သားလူမျိုးများ တွေ့ဆုံပွဲတွင် တောင်သားလူမျိုးတို့၏ ရိုးရာအဝတ်အစားများ ဝတ်ဆင်ခြင်း၊ ရိုးရာအကများဖြင့် ဖျော်ဖြေခဲ့ကြပြီး တောင်သားလူမျိုးများကော်မတီ ဖွဲ့စည်းရန်လည်း စီစဉ်ဆောင်ရွက်ခဲ့သည်ဟု သိရသည်။
