ဇန်နဝါရီ ၁၅ ရက်က ပြင်သစ်တရားရုံးချုပ်၌ မိန့်ခွန်းပြောနေသော ပြင်သစ်သမ္မတ မက်ခရွန် (Photo: AFP)

ဗြိတိန်သို့သွားရောက်နိုင်ရန် ကြိုးပမ်းသော ဒုက္ခသည်များနှင့် ရွှေ့ပြောင်းအခြေချများအား ကာလရှည်ကြာဆွဲဆောင်သည့် နေရာတစ်ခုဖြစ်သည့် ပြင်သစ်မြောက်ပိုင်းရှိ ဆိပ်ကမ်းမြို့ခိုင်လေတွင် ပြင်သစ်သမ္မတ အီမန်နျူရယ်မက်ခရွန်က ဇန်နဝါရီ ၁၆ ရက် ၌ ၎င်း၏အငြင်းပွားဖွယ် ရွှေ့ပြောင်းအခြေချမူဝါဒကို ကာကွယ်ပြောကြားခဲ့သည်။

ပြီးခဲ့သောနှစ် သမ္မတရွေးကောက်ပွဲတွင် နယ်စပ်များအား လွတ်လပ်စွာဖြတ်သန်းသွားလာခွင့်အတွက် မဲဆွယ်ခဲ့သော ဗဟိုဝါဒီသမ္မတမက်ခရွန်သည် ၎င်း၏အစိုးရတက်လာပြီးနောက်ပိုင်း ခိုင်လေနှင့် မြို့တော်ပါရီရှိလမ်းများပေါ်တွင် အိပ်စက်နေရသည့် ရွှေ့ပြောင်းအခြေချများအား အလျှော့မပေးသည့် အနေအထားကြောင့် ဝေဖန်ခံခဲ့ရသည်။

ပြင်သစ်သည် ပြီးခဲ့သောနှစ်တွင် ခိုလှုံခွင့်တောင်းခံသူ ၁၀၀,၀၀၀ အား စံချိန်တင်လက်ခံခဲ့ပြီး ဥရောပတွင် ရွှေ့ပြောင်းအခြေချများအား ထိပ်တန်းလက်ခံခဲ့သည့် နိုင်ငံတစ်နိုင်ငံဖြစ်ခဲ့သည်။

ဒုက္ခသည်အဖြစ် လျှောက်ထားမှု ငြင်းပယ်ခံခဲ့ရပြီးနောက် ပြင်သစ်တွင် ဆက်လက်ရှိနေသူများကို နှင်ထုတ်မှုအား အရှိန်မြှင့်နေစဉ် ခိုလှုံခွင့်တောင်းခံသူများ စောင့်ဆိုင်းနေရမှုများအတွက် အလျင်အမြန်ဆောင်ရွက်ပေးသွားမည်ဟု မက်ခရွန်က ကတိပြုခဲ့သည်။ အင်န်ဂျီအိုများ၊ အလုပ်သမားသမဂ္ဂများနှင့် လက်ဝဲယိမ်းပါတီများက အစိုးရနှင့် အမြင်ကွဲလွဲခဲ့ပြီး မက်ခရွန်သည် ကြမ်းကြမ်းတမ်းတမ်း ကိုင်တွယ်နေသည်ဟု အမြဲတမ်းစွပ်စွဲခဲ့ကြသည်။

ခိုင်လေသို့ရောက်ရှိလာသော ရွှေ့ပြောင်းအခြေချများ၏စခန်းများအား ခိုင်လေရှိ ရဲများက ပုံမှန်လိုလိုဖြိုခွင်းလေ့ရှိသည်။ ယင်းရွှေ့ပြောင်းအခြေချများသည် ရေလက်ကြားမှတစ်ဆင့် ဗြိတိန်ကိုသွားရောက်သော ကုန်တင်ကားများပေါ် ခိုးစီးလိုက်ပါကြပြီး အရှေ့အာဖရိကနှင့် အာဖဂန်နစ္စတန်များအတွက် အသွားချင်ဆုံးပန်းတိုင်တစ်ခုဖြစ်သော ဗြိတိန်သို့ရောက်ရှိနိုင်ရန် ကြိုးစားခဲ့ကြကြောင်း သိရသည်။

ပြင်သစ်ဆိုရှယ်လစ်အစိုးရဟောင်းက ခိုင်လေရှိ ပေရေစုတ်ချာသော ယာယီဒုက္ခသည်စခန်း Jungle အားဖျက်သိမ်းပြီး ယင်းစခန်းတွင် နေထိုင်သူ ၇၀၀၀ ကျော်ကို နိုင်ငံတစ်ဝန်းရှိ ယာယီစခန်းများသို့ ဖြန့်ကြက်ပို့ဆောင်ခဲ့ပြီးနောက် တစ်နှစ်ကျော်အကြာ ခိုင်လေတွင် ရွှေ့ပြောင်းအခြေချရာပေါင်းများစွာ နေထိုင်နေကြဆဲဖြစ်သည်။

၂၀၀၃ ခုနှစ်တွင် ရွှေ့ပြောင်းအခြေချများအား ပြင်သစ်နယ်စပ်သို့ မောင်းထုတ်ခဲ့သည့် ဗြိတိန်အနေဖြင့် ရွှေ့ပြောင်းအခြေချ ဝန်ထုပ်ဝန်ပိုးကို သက်သာရာရစေရန်အတွက် ပိုမိုလုပ်ဆောင်ပေးရန် မက်ခရွန်သည် ဇန်နဝါရီ ၁၈ ရက်တွင် အင်္ဂလန်တောင်ပိုင်းသို့သွားရောက်ပြီး ပြင်သစ်-ဗြိတိန်ထိပ်သီး၌ တောင်းဆိုသွားမည်ဖြစ်သည်။

ခိုင်လေတွင် ဖြစ်ပေါ်နေသောအခြေအနေများသည် ဗြိတိန်ကြောင့်ဖြစ်သည်ဟု ပြင်သစ်ရှိ လူအချို့က ရှုမြင်ထားကြပြီး ရွှေ့ပြောင်းအခြေချအများစုသည် ဗြိတိန်သို့သွားရန် ခိုင်လေသို့ရောက်ရှိလာခဲ့ခြင်းဖြစ်ကြောင်း ထောက်ပြခဲ့ကြသည်။