မြန်မာနိုင်ငံ၏ စီးပွားရေးကဏ္ဍ ပိုမိုဖွံ့ဖြိုးရေးအတွက် နိုင်ငံခြား ရင်းနှီးမြှုပ်နှံမှု၊ ပြည်ပပို့ကုန်များ၏ အခန်းကဏ္ဍနှင့် ကုန်ထုတ်လုပ်ငန်းများ ဖွံ့ဖြိုးတိုးတက်မှု အပါအဝင် စီးပွားရေးဆိုင်ရာ အညွှန်းကိန်းများတွင် ရလဒ်ကောင်းများ ရရှိနိုင်ရေးမှာ အရေးကြီးသော အခန်းကဏ္ဍတွင် ပါဝင်နေသည်။ နိုင်ငံ့စီးပွားရေး တိုးတက်ခြင်းနှင့်အတူ အခြားသော ကဏ္ဍများ၏ အလားအလာကောင်းများအတွက် အထောက်အကူ ပေးနိုင်မည်ဖြစ်သလို အလုပ်အကိုင် အခွင့်အလမ်း နည်းပါးမှု၊ ဆင်းရဲချမ်းသာကွာဟမှုနှင့် ဆင်းရဲမွဲတေမှု ပြဿနာများအတွက်ပါ ပိုမိုကောင်းမွန်သော အခြေအနေများကို ဖန်တီးပေးနိုင်မည်ဖြစ်သည်။ ထို့ပြင် စိုက်ပျိုးရေးကို အခြေခံထားသော နိုင်ငံတွင် စိုက်ပျိုးရေးထွက်ကုန်များ အပါအဝင် ကုန်ထုတ်လုပ်ငန်းများနှင့်အတူ ပြည်ပပို့ကုန်များ၏ ဈေးကွက်ဝေစုခိုင်မာရေး၊ ပို့ကုန်ကဏ္ဍ တိုးမြှင့်ရေးများမှာ ကဏ္ဍအသီးသီးအလိုက် အရေးပါလျက် ရှိနေသည်။
လက်ရှိတွင် တရားဝင် စာရင်းဇယားများအရ မြန်မာနိုင်ငံမှ ပြည်ပသို့တင်ပို့သည့် ပို့ကုန်များအနက် ဆန်တင်ပို့မှုသည် ဆယ်စုနှစ်အတွင်း အများဆုံးတင်ပို့သည့် နှစ်တစ်နှစ် ဖြစ်လာဖွယ် ရှိနေသည်။ မြန်မာနိုင်ငံမှ ဆန်စပါး တင်ပို့မှုနှင့် ပတ်သက်သော တရားဝင် ထုတ်ပြန်ချက်များတွင် ပြီးခဲ့သည့် ၂၀၀၈-၂၀၀၉ ဘဏ္ဍာနှစ်က ဆန်တင်ပို့မှုတန်ချိန် ၇၀၉၂၅၁ ဒသမ ၄၃၇ ရှိခဲ့ပြီး လက်ရှိ ၂၀၁၇-၂၀၁၈ ဘဏ္ဍာနှစ် သြဂုတ်လဆန်းအထိ ဆန်တင်ပို့မှုတန်ချိန် ၁၀၂၄၄၅၉ ရှိထားရာ ဆယ်စုနှစ်အတွင်း အများဆုံး တင်ပို့ခဲ့သည့် အနေအထားအဖြစ် မြင်တွေ့နိုင်မည်ဖြစ်သည်။ ထို့ပြင် မြန်မာနိုင်ငံဆန်စပါးအသင်းချုပ် အနေဖြင့် ယခုနှစ်အတွင်း ပြည်ပသို့ ဆန်တန်ချိန် နှစ်သန်းအထိ တင်ပို့နိုင်ရန်လည်း ခန့်မှန်းထားသည်။ မြန်မာနိုင်ငံမှဆန်ကို ပြည်ပနိုင်ငံပေါင်း ၅၀ ကျော်သို့ တင်ပို့လျက်ရှိသော်လည်း ပြည်ပသို့ဆန်တင်ပို့မှု၏ ရာခိုင်နှုန်း ၇၀ ကျော်ကို တရုတ်နိုင်ငံသို့ အဓိက တင်ပို့နေခြင်းဖြစ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ထုတ်ပြန်ထားသည်။
စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ တရားဝင် ကိန်းဂဏန်းများတွင် ပြည်ပဈေးကွက် တိုးချဲ့ရရှိမှုကြောင့် ယခုဘဏ္ဍာနှစ် သြဂုတ်ပထမပတ်အထိ လေးလကျော်ကာလအတွင်း မြန်မာနိုင်ငံမှ ဆန်နှင့် ဆန်ကွဲတန်ချိန် တစ်သန်းကျော် တင်ပို့ထားပြီး ယခင်နှစ်ကာလတူထက် တန်ချိန်ခြောက်သိန်းနှစ်သောင်းကျော် ပိုမိုတင်ပို့ထားကြောင်း ဖော်ပြထားသည်။ သီရိလင်္ကာနိုင်ငံမှ ယခုနှစ်အတွင်း မြန်မာနိုင်ငံမှ ဆန်တန်ချိန်ငါးသိန်း ဝယ်ယူရန် ကမ်းလှမ်းထားကြောင်းနှင့် နှစ်နိုင်ငံအကြား နားလည်မှု စာချွန်လွှာ (MoU) ရေးထိုးပြီး ဆန်တင်ပို့ရောင်းချနိုင်ရေး လုပ်ဆောင်လျက်ရှိသည်။ ယခုနှစ်အတွက် သီရိလင်္ကာနိုင်ငံမှ ဆန်တန်ချိန် ငါးသိန်းဝယ်ယူရန် ကမ်းလှမ်းမှုတွင် ပေါင်းဆန်တန်ချိန်နှစ်သိန်းနှင့် ဆန်ဖြူသုံးသိန်း ဝယ်ယူရန် ကမ်းလှမ်းခြင်းဖြစ်သလို မြန်မာနိုင်ငံမှဆန်အား ဖိလစ်ပိုင် အမျိုးသား စားနပ်ရိက္ခာ အာဏာပိုင်အဖွဲ့ (NFA) က ဝယ်ယူ တင်သွင်းနိုင်ရန်အတွက် မြန်မာနိုင်ငံသို့ တင်ဒါဖိတ်ခေါ်ထားသည်။ ဘင်္ဂလားဒေ့ရှ်နိုင်ငံသို့လည်း မြန်မာနိုင်ငံမှ ဆန်တန်ချိန်သုံးသိန်း တင်ပို့ရောင်းချရန် နှစ်နိုင်ငံ G to G လက်မှတ် ရေးထိုးထားသည်။
ယင်းအပြင် အဓိကပြည်ပပို့ကုန် တစ်ခုဖြစ်သော ပဲတင်ပို့မှုနှင့်ပတ်သက်၍ မြန်မာနိုင်ငံ တင်ပို့မှုအပေါ် အိန္ဒိယနိုင်ငံဘက်မှ ကန့်သတ်မှုများအား ရုပ်သိမ်းပေးရန် အိန္ဒိယဝန်ကြီးချုပ်၏ မြန်မာနိုင်ငံသို့ လာရောက်သည့် ခရီးစဉ်အတွင်း နိုင်ငံတော်၏အတိုင်ပင်ခံပုဂ္ဂိုလ်က တောင်းဆိုခဲ့ကြောင်း ပူးတွဲကြေညာချက်တွင် ပါဝင်သည်။ သို့ပါ၍ မြန်မာ့စီးပွားရေး ပိုမိုကောင်းမွန်ရန် ပြည်ပပို့ကုန်များ၏ အခန်းကဏ္ဍမှာ အရေးပါသလို အခြားသော စီးပွားရေးဆိုင်ရာ မူဝါဒနှင့် အစီအမံများမှာ မြန်မာ့စီးပွားရေး အလားအလာကောင်းများအတွက် အဓိကကျလျက် ရှိပါကြောင်း The Daily Eleven သတင်းစာက ရေးသားအပ်ပါသည်။
စက်တင်ဘာလ ၉ ရက်နေ့ထုတ် The Daily Eleven သတင်းစာ အယ်ဒီတာ့အာဘော်
