လူမှုရေးဆိုင်ရာ လှုပ်ရှားမှုများစွာတို့သည် နိုင်ငံရေးအသိစိတ်နှင့်ပတ်သက်သော မာ့က်စ်အတွေးအခေါ်ကို များစွာလိုက်နာလေ့မရှိပေ။ နိုင်ငံရေးအသိစိတ်ရှိခြင်းနှင့် ပတ်သက်၍ များစွာတို့သည် အာဏာရအီလစ်များက အသုံးပြုသော ဝါဒဖြန့်ချိရေးများကို ဆန့်ကျင်လျက် တစ်စုံတစ်ရာ မှန်ကန်သည့် သမိုင်းလမ်းကြောင်းကို ရှာဖွေသော နည်းလမ်းများကိုသာ ယုံကြည်ကြသည်။ ထို့ကြောင့် ဥပမာအားဖြင့် ဣတ္ထိယဝါဒီလှုပ်ရှားမှုသည် နိုင်ငံရေးအသိစိတ် မြှင့်တင်ရေးအကြောင်းပြောပြီး တောင်အာဖရိက တက်ကြွလှုပ်ရှားသူများစွာတို့က လူမည်းတို့၏ နိုင်ငံရေးအသိစိတ် နိုးကြားလာပုံအကြောင်း ပြောကြသည်။ လူမျိုးရေးခွဲခြားသော အစိုးရတစ်ရပ်က ချမှတ်ထားသော သဘောထားများကို ဆန့်ကျင်ကာ မိမိတို့၏ မှန်ကန်သည့် နိုင်ငံရေးဆိုင်ရာ လမ်းကြောင်းတစ်ရပ်ကိုလိုက်ရန် လူမည်းများကို လှုံ့ဆော်ခြင်းကို လူမည်းနိုင်ငံရေး အသိစိတ်နိုးကြားရေးဟု ခေါ်ဆိုကြသည်။ ဒုတိယဥပမာနှင့်ပတ်သက်၍ တောင်အာဖရိက လူမည်းများစွာတို့အတွက် နိုင်ငံရေးအသိစိတ်ဟူသည် လူမည်းများနှင့်ပတ်သက်သော လူမျိုးရေးခွဲခြားသည့် သဘောထားများကို ပယ်ချရေး၊ နိုင်ငံကို လူဖြူများ လွှမ်းမိုးအုပ်စိုးနေခြင်းကို ပယ်ချရေးနှင့် လူမည်းတို့၏ ကိုယ်ပိုင်စရိုက်လက္ခဏာ၊ သမိုင်းနှင့် ပါဝါတို့ကို ထိန်းသိမ်းရေးတို့ ဖြစ်သည်။
နိုင်ငံရေးက ချုပ်ကိုင်ထားသော အမြင်တစ်ရပ်တွင် ဖြစ်ပေါ်လာသည့် နိုင်ငံရေး အသိစိတ်ဟူသည် ပြည်သူများအနေဖြင့် ၎င်းတို့၏ စစ်မှန်သော နိုင်ငံရေးကဏ္ဍနှင့် မှန်ကန်သော ကိုယ်ပိုင်စရိုက်လက္ခဏာဆီသို့ နိုးကြားလာရေးဖြစ်သည်ဟု မှတ်ယူကြသည်။ မာ့က်စ်ဝါဒတွင် ယင်း၏ အဓိပ္ပာယ်မှာ အလုပ်သမားလူတန်းစားများအနေဖြင့် မိမိတို့ကိုယ် မိမိတို့ သမိုင်းကို ဖန်တီးသူများဖြစ်သည်ဟူသော အသိစိတ် ဖြစ်ပေါ်လာရေး ဖြစ်သည်။ အလုပ်သမားလူတန်းစားများအနေဖြင့် စည်းလုံးညီညွတ်ပြီး လုပ်အား၏ အသီးအပွင့်များကို မျှဝေခံစားရမည်ဟူသော အသိစိတ်ဖြစ်သည်။ မာ့က်စ်ဝါဒတွင် နိုင်ငံရေး အသိစိတ်ဟူသည် အလုပ်သမားလူတန်းစား၏ သမိုင်းဆိုင်ရာ အခန်းကဏ္ဍနှင့် ၎င်းတို့၏ အခွင့်အရေးများဖြစ်သည်။ (လုပ်ခအတွက် အလုပ်လုပ်ပေးရခြင်း၊ အရင်းရှင်လူတန်းစားတို့၏ကိုယ်စား စစ်တိုက်ပေးရခြင်းနှင့် အစရှိသည်တို့အား ဆန့်ကျင်ခြင်းဖြစ်သည်) အာဖရိကန်-အမေရိကန်များစွာတို့အတွက် နိုင်ငံရေးအသိစိတ်ဟူသည် လူဖြူများကြီးစိုးမှု ပုံစံအမျိုးမျိုးကို ဖော်ထုတ်ရှုတ်ချခြင်း ဖြစ်သည်။ နိုင်ငံရေးအသိစိတ်ဟူသည့် စကားလုံးကို ယင်းကဲ့သို့သော ပုံစံမျိုးဖြင့် သုံးနှုန်းသည့်အခါ အဓိပ္ပာယ်မှာ အမှန်တရား သို့မဟုတ် ရည်မှန်းချက်ပန်းတိုင် ဖြစ်သည်။ ဥပမာအားဖြင့် လူမည်းအမျိုးသမီးတစ်ဦးသည် လူဖြူ အမျိုးသားအရင်းရှင်တစ်ဦးက ကျင့်သုံးသော စနစ်တစ်ရပ်ကို ထောက်ခံပါကသူ့အား နိုင်ငံရေး အသိစိတ်နည်းပါးသည်ဟု ခေါ်ဆိုကြသည်။
များစွာသော မာ့က်စ်ဝါဒီများ၊ ဣတ္ထိယဝါဒီများ၊ အာဖရိကန်-အမေရိကန်များနှင့် အခြားသော အုပ်စုများအနေဖြင့် နိုင်ငံရေးအသိစိတ်နှင့်ပတ်သက်သော ပုံစံတစ်ခုအားပြောလျှင် အမှန်တရားတစ်ခုတည်း ရရှိမည်မဟုတ်ကြောင်း လက်ခံလိုက်ကြပြီး ဖြစ်သည်။ ယင်းအစား အုပ်စိုးသူ လူတန်းစားက လွှမ်းမိုးကြီးစိုးသော သဘောထားစိတ်ကူးတစ်ရပ်ကို ဖန်တီးပြီး ယင်းကို ပြည်သူများအား ထိခိုက်စေသော နည်းလမ်းများဖြင့် ကျင့်သုံးပါက အတိုက်အခံများအနေဖြင့် နိုင်ငံရေးအနေအထားအမျိုးမျိုးက သည်းခံနိုင်သည့်ပို၍ လစ်ဘရယ်ကျသော အနေအထားတစ်ရပ်ရရှိအောင် ထိန်းသိမ်းရမည်ဟူသည့် သဘောထားသာ ထွန်းကားလာသည်။
မည်သို့ပင်ဆိုစေကာမူ လူအုပ်စုအမျိုးမျိုးအတွက် နိုင်ငံရေးအသိစိတ်ဟူသည် အဓိပ္ပာယ်အရပင် အမျိုးမျိုး ကွဲပြားနေမည်ဖြစ်သော်လည်း လူအများစုအတွက် အဆင်ပြေနိုင်မည့် သဘောတရားများ ဖန်တီးကျင့်သုံးရေးသည်သာ ဒီမိုကရေစီစနစ်နှင့် လျော်ညီမည် ဖြစ်ပါကြောင်း The Daily Eleven သတင်းစာက တိုက်တွန်းရေးသားအပ်ပါသည်။
(မတ် ၉ ရက်နေ့ထုတ် The Daily Eleven သတင်းစာ အယ်ဒီတာ အာဘေ်ာ)
