ဒီမိုကရက်တစ် ခေါင်းဆောင်မှု သို့မဟုတ် စုပေါင်းခေါင်းဆောင်မှုဟူသည် အုပ်စုအတွင်း၌ ပါဝင်သူများ အနေဖြင့် ဆုံးဖြတ်ချက်ချမှတ်ခြင်း လုပ်ငန်းစဉ်တွင် ပိုမိုပါဝင်ကြသည့် ခေါင်းဆောင်မှု စတိုင်တစ်မျိုးဖြစ်သည်။ ယင်းခေါင်းဆောင်မှုစတိုင်ကို အဖွဲ့အစည်းတစ်ခု၊ ပုဂ္ဂလိကလုပ်ငန်း တစ်ခုမှသည် ကျောင်းများနှင့် အစိုးရအဖွဲ့အထိ ကျင့်သုံးနိုင်သည်။ ယင်းခေါင်းဆောင်မှု စတိုင်တွင် လူတိုင်းပါဝင်ရန် အခွင့်အလမ်းရှိခြင်း၊ စိတ်ကူးသဘောထားများကို လွတ်လပ်စွာ ဖလှယ်နိုင်ခြင်းနှင့် ဆွေးနွေးညှိနှိုင်းမှုများကို အားပေးခြင်းတို့ရှိသည်။ ဒီမိုကရက်တစ် လုပ်ငန်းစဉ်သည် စိတ်ကူးသဘောထားများ လွတ်လပ်စွာ စီးဆင်းရေးနှင့် အုပ်စုတွင်း ညီမျှရေးတို့ကို အဓိကထားသော်လည်း လမ်းညွှန်မှုများ ပေးရန်နှင့် ထိန်းချုပ်မှုပြုလုပ်ရန် အုပ်စု၏ခေါင်းဆောင် ရှိနေဆဲဖြစ်သည်။ ဒီမိုကရက်တစ် ခေါင်းဆောင်သည် မည်သူသည် အုပ်စုအတွင်း၌ ရှိသည်ကိုလည်းကောင်း၊ ချမှတ်သည့် ဆုံးဖြတ်ချက်များကို မည်သူတို့က ထည့်ဝင်ရမည် ဟူသည်ကိုလည်းကောင်း ဆုံးဖြတ်ရန် တာဝန်ယူရသည်။ သုတေသနပြုသူများက ဒီမိုကရက်တစ် ခေါင်းဆောင်မှု စတိုင်သည် အထိရောက်ဆုံး ခေါင်းဆောင်မှု အမျိုးအစား တစ်မျိုးဖြစ်ပြီး ထုတ်လုပ်မှု ပိုမိုမြင့်မားခြင်း၊ အုပ်စုဝင်များထံမှ ထည့်ဝင်မှု ပိုမိုကောင်းမွန်ခြင်းနှင့် အုပ်စု၏ ကိုယ်ကျင့်တရား တိုးတက်လာခြင်းတို့ဆီသို့ ဦးတည်သွားစေနိုင်သည်ဟု ဆိုသည်။
ဒီမိုကရက်တစ် ခေါင်းဆောင်မှု၌ ပါဝင်သော အခြေခံစရိုက်လက္ခဏာရပ်အချို့မှာ ခေါင်းဆောင်ဖြစ်သူက ဆုံးဖြတ်ချက်နှင့် ပတ်သက်၍ နောက်ဆုံးတာဝန်ရှိသူ ဖြစ်သော်လည်း အုပ်စုဝင်များအား စိတ်ကူးများနှင့် သဘောထား ထင်မြင်ချက်များ ဖလှယ်ရန် အားပေးခြင်း၊ အုပ်စုဝင်များအနေဖြင့် လုပ်ငန်းစဉ်၌ ပိုမိုပါဝင်သည်ဟု ခံစားရခြင်းနှင့် ဖန်တီးနိုင်စွမ်းကို အားပေးချီးမြှင့်ခြင်းတို့ဖြစ်သည်။ ကောင်းမွန်သော ဒီမိုကရက်တစ် ခေါင်းဆောင်မှု လုပ်ငန်းစဉ်များ၌ ပါဝင်သည့် လက္ခဏာရပ်များမှာ ရိုးသားမှု၊ အသိဉာဏ်ရှိမှု၊ သတ္တိရှိမှု၊ တီထွင်ဖန်တီးနိုင်ခြင်းရှိမှု၊ ပြည့်စုံကျွမ်းကျင်မှုနှင့် မျှတမှုတို့ဖြစ်သည်။ အားကောင်းသော ဒီမိုကရက်တစ် ခေါင်းဆောင်များသည် ယုံကြည်မှုရရှိကြပြီး နောက်လိုက်များအကြား လေးစားမှုကို ရရှိကြသည်။ ၎င်းတို့သည် ရိုးသားဖြောင့်မတ်မှု ရှိကြပြီး ၎င်းတို့၏ ဆုံးဖြတ်ချက်များကို ၎င်းတို့၏ ကိုယ်ကျင့်တရားနှင့် ဒီမိုကရေစီ စံတန်ဖိုးများ အပေါ်၌ အခြေခံလေ့ရှိသည်။ နောက်လိုက်များ အနေဖြင့်လည်း ပါဝင်လုပ်ဆောင်ရန် စိတ်ဓာတ်တက်ကြွလာကြပြီး အုပ်စုအတွက် ထည့်ဝင်မှုများ ပြုလုပ်လာကြသည်။ ခေါင်းဆောင်ကောင်းများသည် မိမိနှင့် မတူခြားနားသော သဘောထား အမြင်များကို ရှာဖွေလေ့ရှိပြီး အတိုက်အခံ လုပ်သူများကို လည်းကောင်း၊ လူကြိုက်နည်းမည့် အမြင်ကို တင်ပြသူများကိုလည်းကောင်း အသံတိတ်သွားအောင် ကြိုးပမ်းကြခြင်း မရှိပေ။
အုပ်စုဝင်များသည် ၎င်းတို့၏ အတွေးအမြင်များအား မျှဝေရန် တိုက်တွန်းအားပေးမှု ခံရသောကြောင့် ဒီမိုကရက်တစ် ခေါင်းဆောင်မှုသည် ပိုမိုကောင်းမွန်သော စိတ်ကူးများနှင့် ပိုမိုဖန်တီးနိုင်စွမ်းရှိသော ပြဿနာ ဖြေရှင်းမှုများကို ရရှိနိုင်သည်။ အုပ်စုဝင်များသည် စီမံကိန်းတစ်ရပ်ကို ပိုမိုပါဝင်လိုစိတ်နှင့် လုပ်ဆောင်လိုစိတ်များ ဖြစ်ပေါ်ကြသည်။ ထို့ကြောင့် ၎င်းတို့အနေဖြင့် အဆုံးသတ်ရလဒ်များနှင့် ပတ်သက်၍လည်း ပိုမိုဂရုစိုက် လာကြသည်။ ဤသို့ဖြင့် ဒီမိုကရက်တစ် ခေါင်းဆောင်မှုသည် အုပ်စုဝင်များအကြား ပိုမိုမြင့်မားသော ထုတ်လုပ်မှုစွမ်းအားကို ဖြစ်ပေါ်စေသည်။
ထို့ကြောင့် ဒီမိုကရက်တစ် ခေါင်းဆောင်မှုစတိုင်ကို ကျင့်သုံးခြင်းသည် လုပ်ငန်းစဉ် တစ်ရပ်၌ သက်ဆိုင်ရာ အုပ်စုဝင်များအားလုံး တက်ကြွစွာ ပါဝင်လိုစိတ်ကို ဖြစ်ပေါ်စေသောကြောင့် အဆုံးသတ် ရလဒ်များကို ပို၍ကောင်းမွန် စေနိုင်ပါကြောင်း The Daily Eleven သတင်းစာက ရေးသားအပ်ပါသည်။
(ဖေဖော်ဝါရီ ၂၇ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်)
